Psalms 99
The Book of Psalms
܀ ܡܙܡܘܪܐ ܨܛ ܀
ܡܶܬܢܰܒܶܐ ܥܰܠ ܦܽܘܢܳܝܶܗ ܕܥܰܡܳܐ ܕܡܶܢ ܒܳܒܶܠ ܘܡܶܢ ܩܰܕ̈ܡܳܝܳܬܳܐ ܕܶܐܣܬܥܰܪ ܡܰܪܬܶܐ ܠܗܽܘܢ ܠܬܶܫܒܽܘܚܬܳܐ ܕܰܐܠܳܗܳܐ
ܥܰܠ ܦܽܘܢܳܝܶܗ ܕܥܰܡܳܐ ܕܡܶܢ ܒܳܒܶܠ ܡܶܬܢܰܒܶܐ ܒܰܕܡܽܘܬ ܬܶܫܒܽܘܚܬܳܐ ܘܬܰܘܕܺܝܬܳܐ
1 ܡܳܪܝܳܐ ܐܰܡܠܶܟ ܢܙܽܘܥܽܘܢ ܥܰܡ̈ܡܶܐ. ܝܺܬܶܒ ܥܰܠ ܟܖ̈ܽܘܒܶܐ ܬܙܽܘܥ ܐܰܪܥܳܐ.
2 ܡܳܪܝܳܐ ܪܰܒ ܒܨܶܗܝܽܘܢ. ܘܪܳܡ ܥܰܠ ܟܽܠܗܽܘܢ ܥܰܡ̈ܡܶܐ.
3 ܢܰܘܕܽܘܢ ܠܰܫܡܳܟ ܪܰܒܳܐ ܘܰܕܚܺܝܠܳܐ ܕܩܰܕܺܝܫ ܗܽܘ.
4 ܥܽܘܫܢܶܗ ܕܡܰܠܟܳܐ ܪܳܚܶܡ ܕܺܝܢܳܐ. ܐܰܢ̱ܬ ܬܰܩܶܢܬ ܬܪܺܝܨܽܘܬܳܐ ܘܕܺܝܢܳܐ ܘܙܰܕܺܝܩܽܘܬܳܐ ܒܝܰܥܩܽܘܒ ܐܰܢ̱ܬ ܥܒܰܕܬ.
5 ܪܰܡܪܶܡܘ ܠܡܳܪܝܳܐ ܐܰܠܳܗܰܢ ܘܰܣܓܽܘܕܘ ܠܟܽܘܒܫܳܐ ܕܖ̈ܶܓܠܰܘܗ̱ܝ. ܩܰܕܺܝܫ ܗܽܘ.
6 ܡܽܘܫܶܐ ܘܰܐܗܪܽܘܢ ܒܟܽܘܡܖ̈ܰܘܗ̱ܝ ܘܰܫܡܽܘܐܶܝܠ ܒܩܳܖ̈ܝܰܝ ܫܡܶܗ. ܕܰܩܪܰܘ ܠܡܳܪܝܳܐ ܘܰܥܢܳܐ ܐܶܢܽܘܢ.
7 ܘܰܒܥܰܡܽܘܕܳܐ ܕܰܥܢܳܢܳܐ ܡܰܠܶܠ ܥܰܡܗܽܘܢ. ܢܛܰܪܘ ܣܳܗܕܽܘܬܶܗ ܘܰܩܝܳܡܳܐ ܕܝܰܗܒ ܠܗܽܘܢ.
8 ܡܳܪܝܳܐ ܐܰܠܳܗܰܢ ܐܰܢ̱ܬ ܥܢܰܝܬ ܐܶܢܽܘܢ. ܐܰܠܳܗܳܐ ܬܳܒܽܘܥܳܐ ܗܘܰܝܬ ܠܗܽܘܢ. ܦܪܽܘܥ ܐܶܢܽܘܢ ܐܰܝܟ ܥܒܳܕܰܝ̈ܗܽܘܢ.
9 ܪܰܡܪܶܡܘ ܠܡܳܪܝܳܐ ܐܰܠܳܗܰܢ ܘܰܣܓܽܘܕܘ ܠܛܽܘܪܶܗ ܩܰܕܺܝܫܳܐ. ܡܶܛܽܠ ܕܩܰܕܺܝܫ ܗܽܘ ܡܳܪܝܳܐ ܐܰܠܳܗܰܢ.