Psalms 32
The Book of Psalms
܀ ܡܙܡܘܪܐ ܠܒ ܀
ܡܒܰܕܶܩ ܥܰܠ ܐܰܝܠܶܝܢ ܕܶܐܣܬܥܰܪ ܠܘܳܬ ܚܶܙܰܩܝܳܐ
1 ܛܽܘܒܰܘܗ̱ܝ ܠܡܰܢ ܕܶܐܫܬܒܶܩ ܠܶܗ ܥܰܘܠܶܗ. ܘܶܐܬܟܰܣܺܝܘ ܠܶܗ ܚܛܳܗܰܘ̈ܗܝ̱.
2 ܛܽܘܒܰܘܗ̱ܝ ܠܒܰܪܢܳܫܳܐ ܕܠܳܐ ܢܶܚܫܽܘܒ ܠܶܗ ܡܳܪܝܳܐ ܚܛܺܝܬܶܗ. ܘܠܰܝܬ ܢܶܟܠܳܐ ܒܠܶܒܶܗ.
3 ܡܶܛܽܠ ܕܫܶܬܩܶܬ ܒܠܺܝܘ ܓܰܖ̈ܡܰܝ. ܟܰܕ ܢܳܗܶܡ ܗ̱ܘܺܝܬ ܝܰܘܡܳܐ ܟܽܠܶܗ.
4 ܡܶܛܽܠ ܕܠܺܠܝܳܐ ܘܺܐܝܡܳܡܳܐ ܝܶܩܪܰܬ ܥܠܰܝ ܐܺܝܕܳܟ. ܘܶܐܬܗܦܶܟ ܒܚܰܕܺܝܝ ܟܺܐܒܳܐ ܠܡܶܩܛܠܰܢܝ̱.
5 ܚܛܳܗܰܝ̈ ܐܰܘܕܰܥܬܳܟ ܘܣܰܟ̈ܠܘܳܬܝ̱ ܠܳܐ ܟܰܣܺܝܬ ܡܶܢܳܟ. ܐܶܡܪܶܬ ܕܰܐܘܕܶܐ ܠܡܳܪܝܳܐ ܥܰܠ ܣܰܟ̈ܠܘܳܬܝ̱. ܘܰܐܢ̱ܬ ܫܳܒܶܩ ܐܰܢ̱ܬ ܠܺܝ ܟܽܠܗܽܘܢ ܚܛܳܗܰܝ̈.
6 ܡܶܛܽܠ ܗܳܢܳܐ ܢܨܰܠܶܐ ܠܳܟ ܟܽܠ ܡܰܢ ܕܰܓܒܶܐ ܠܳܟ ܒܙܰܒܢܳܐ ܡܩܰܒܠܳܐ. ܚܺܐܦ̈ܶܐ ܕܶܝܢ ܕܡܰܝ̈ܳܐ ܣܰܓܺܝ̈ܐܶܐ ܠܘܳܬܶܗ ܠܳܐ ܢܶܬܩܰܪܒܽܘܢ.
7 ܐܰܢ̱ܬ ܣܰܬܰܪܰܝܢܝ̱ ܘܡܶܢ ܒܥܶܠܕ̈ܒܳܒܰܝ ܢܰܛܰܪܰܝܢܝ̱. ܫܽܘܒܚܳܐ ܘܦܽܘܪܩܳܢܳܐ ܐܰܟܪܶܟܰܝܢܝ̱ ܕܶܐܣܬܰܟܠܳܟ.
8 ܐܰܘܕܥܳܟ ܐܽܘܪܚܳܐ ܕܬܺܐܙܰܠ ܒܳܗ̇. ܘܶܐܣܺܝܡ ܥܰܝ̈ܢܰܝ ܥܠܰܝܟ.
9 ܠܳܐ ܬܶܗܘܢ ܐܰܝܟ ܣܽܘܣܝܳܐ ܘܰܐܝܟ ܟܽܘܕܰܢܝܳܐ ܕܠܳܐ ܚܰܟܺܝܡܺܝܢ. ܕܒܰܦܓܽܘܕܬܳܐ ܡܟܰܒܫܺܝܢ ܠܗܽܘܢ ܡܶܢ ܛܰܠܝܽܘܬܗܽܘܢ. ܘܠܳܐ ܩܳܪܒܺܝܢ ܠܘܳܬܶܗ.
10 ܣܰܓܺܝܐܺܝܢ ܟܺܐܒܰܘ̈ܗܝ̱ ܕܥܰܘܳܠܳܐ. ܘܰܐܝܢܳܐ ܕܰܡܣܰܒܰܪ ܒܡܳܪܝܳܐ ܛܰܝܒܽܘܬܳܐ ܬܶܚܕܪܺܝܘܗ̱ܝ.
11 ܚܕܰܘ ܙܰܕܺܝ̈ܩܶܐ ܘܶܐܬܒܰܣܡܘ ܒܡܳܪܝܳܐ. ܘܫܰܒܚܽܘܗ̱ܝ ܟܽܠ ܬܖ̈ܺܝܨܰܝ ܠܶܒܳܐ.