Psalms 104
The Book of Psalms
܀ ܡܙܡܘܪܐ ܩܕ ܀
ܡܶܫܬܰܥܶܐ ܥܰܠ ܪܰܒܽܘܬܶܗ ܕܰܐܠܳܗܳܐ ܡܦܰܬܟܽܘܬܳܐ ܕܥܳܒܽܘܕܽܘܬܶܗ ܘܡܰܘܕܰܥ ܕܟܽܠ ܚܕܳܐ ܚܕܳܐ ܡܶܢ ܒܶܖ̈ܝܳܬܶܗ ܬܡܺܝܗܳܐܺܝܬ ܡܶܢܶܗ ܐܶܬܬܰܩܢܰܬ
1 ܒܰܪܶܟܝ̱ ܢܰܦܫܝ̱ ܠܡܳܪܝܳܐ. ܡܳܪܝܳܐ ܐܰܠܳܗܝ ܝܺܪܶܒ ܛܳܒ. ܙܺܝܘܳܐ ܘܗܶܕܪܳܐ ܠܒܶܫ.
2 ܐܶܬܟܰܣܺܝ ܢܽܘܗܪܳܐ ܐܰܝܟ ܡܰܪܛܽܘܛܳܐ. ܡܬܰܚ ܫܡܰܝܳܐ ܐܰܝܟ ܝܳܪܺܝܥܬܳܐ.
3 ܥܒܰܕ ܒܡܰܝ̈ܳܐ ܡܶܕܝܳܖ̈ܰܘܗ̱ܝ ܘܣܳܡ ܥܰܠ ܥܢ̈ܳܢܶܐ ܡܰܪܟܰܒܬܶܗ ܘܰܡܗܰܠܶܟ ܥܰܠ ܟܶܢ̈ܦܶܝܗ̇ ܕܪܽܘܚܳܐ.
4 ܥܒܰܕ ܡܰܠܰܐܟܰܘ̈ܗܝ̱ ܪܽܘܚ ܘܰܡܫܰܡܫܳܢܰܘ̈ܗܝ̱ ܢܽܘܪ ܝܳܩܕܳܐ.
5 ܐܰܬܩܶܢ ܐܰܪܥܳܐ ܥܰܠ ܡܰܬܩ̈ܢܶܝܗ̇ ܕܠܳܐ ܬܙܽܘܥ ܠܥܳܠܰܡ ܥܳܠܡܺܝܢ.
6 ܬܗܽܘܡܳܐ ܐܰܝܟ ܡܰܪܛܽܘܛܳܐ ܟܰܣܺܝܬܳܝܗܝ̱ ܘܥܰܠ ܛܽܘܖ̈ܶܐ ܩܳܡܘ ܡܰܝ̈ܳܐ.
7 ܘܡܶܢ ܟܳܐܬܳܟ ܥܳܪܩܺܝܢ ܘܡܶܢ ܩܳܠܳܐ ܕܖ̈ܰܥܡܰܝܟ ܡܶܬܪܰܗܒܺܝܢ.
8 ܣܠܶܩܘ ܛܽܘܖ̈ܶܐ ܘܰܢܚܶܬܘ ܦܰܩ̈ܥܳܬܳܐ ܒܰܐܬܪܳܐ ܕܬܰܩܶܢܬ ܠܗܽܘܢ.
9 ܬܚܽܘܡܳܐ ܣܳܡܬ ܠܗܽܘܢ ܕܠܳܐ ܢܶܥܒܪܽܘܢ ܘܰܢܟܰܣܽܘܢܳܗ̇ ܠܰܐܪܥܳܐ.
10 ܫܰܕܰܪ ܡܰܒܽܘ̈ܥܶܐ ܒܢܰܚ̈ܠܶܐ ܘܒܰܝܢܳܬ ܛܽܘܖ̈ܶܐ ܡܗܰܠܟܺܝܢ.
11 ܘܡܰܫܩܶܝܢ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ ܘܣܳܒܥܺܝܢ ܥܖ̈ܳܕܶܐ ܕܰܨܗܶܝܢ.
12 ܘܦܳܪܰܚܬܳܐ ܕܰܫܡܰܝܳܐ ܥܠܰܝܗܽܘܢ ܫܳܟܢܳܐ ܘܡܶܢ ܒܰܝܢܳܬ ܛܽܘܖ̈ܶܐ ܝܳܗܒܺܝܢ ܩܳܠܳܐ.
13 ܡܰܫܩܶܐ ܛܽܘܖ̈ܶܐ ܡܶܢ ܡܶܕܝܳܖ̈ܰܘܗ̱ܝ ܘܡܶܢ ܦܺܐܖ̈ܰܝ ܥܒܳܕܰܝ̈ܟ ܬܶܣܒܰܥ ܐܰܪܥܳܐ.
14 ܡܰܘܥܶܐ ܥܡܺܝܪܳܐ ܠܰܒܥܺܝܪܳܐ ܘܥܶܣܒܳܐ ܠܦܽܘܠܚܳܢܶܗ ܕܒܰܪܢܳܫܳܐ ܠܡܰܦܳܩܽܘ ܠܰܚܡܳܐ ܡܶܢ ܐܰܪܥܳܐ.
15 ܚܰܡܪܳܐ ܡܚܰܕܶܐ ܠܶܒܶܗ ܕܒܰܪܢܳܫܳܐ ܘܡܰܦܨܰܚ ܐܰܦܰܘ̈ܗܝ̱ ܒܡܶܫܚܳܐ. ܠܰܚܡܳܐ ܣܳܡܶܟ ܠܶܒܶܗ ܕܒܰܪܢܳܫܳܐ.
16 ܢܶܣܒܥܽܘܢ ܐܺܝܠܳܢܰܘ̈ܗܝ̱ ܕܡܳܪܝܳܐ ܘܰܐܖ̈ܙܶܐ ܕܠܶܒܢܳܢ ܕܰܢܨܰܒ.
17 ܬܰܡܳܢ ܐܰܩܶܢ ܨܶܦܖ̈ܶܐ ܘܚܽܘܪܒܳܐ ܩܶܢܳܗ̇ ܒܫܰܖ̈ܘܰܝܢܶܐ.
18 ܛܽܘܖ̈ܶܐ ܖ̈ܳܡܶܐ ܠܕܰܝ̈ܨܶܐ ܘܰܫܩܺܝ̈ܦܶܐ ܣܶܬܳܪܳܐ ܠܰܚ̈ܓܳܣܶܐ.
19 ܥܒܰܕ ܣܰܗܪܳܐ ܠܙܰܒ̈ܢܶܐ ܘܫܶܡܫܳܐ ܝܺܕܰܥ ܙܰܒܢܳܐ ܕܡܰܥܖ̈ܳܒܰܘܗ̱ܝ.
20 ܥܒܰܕ ܚܶܫܽܘܟܳܐ ܘܰܗܘܳܐ ܠܺܠܝܳܐ ܘܒܶܗ ܥܳܡܖ̈ܳܢ ܟܽܠܗܶܝܢ ܚܰܝܘ̈ܳܬܳܐ ܕܥܳܒܳܐ.
21 ܐܰܖ̈ܝܰܘܳܬܳܐ ܢܳܗܡܺܝܢ ܠܡܶܬܒܰܪ ܘܰܠܡܶܒܥܳܐ ܡܶܢ ܐܰܠܳܗܳܐ ܡܶܐܟܽܘܠܬܗܽܘܢ.
22 ܒܡܰܕ̈ܢܳܚܰܝ ܫܶܡܫܳܐ ܡܶܬܚܰܡܠܺܝܢ ܘܰܒܡܰܥܡܖ̈ܰܝܗܽܘܢ ܪܳܒܥܺܝܢ.
23 ܢܳܦܶܩ ܒܰܪܢܳܫܳܐ ܠܰܥܒܳܕܶܗ ܘܰܠܦܽܘܠܚܳܢܶܗ ܥܕܰܡܳܐ ܠܪܰܡܫܳܐ.
24 ܡܳܐ ܣܰܓܺܝܐܺܝܢ ܥܒܳܕܰܝ̈ܟ ܡܳܪܝܳܐ. ܘܟܽܠܗܽܘܢ ܒܚܶܟܡܬܳܐ ܥܒܰܕܬ ܐܶܢܽܘܢ. ܘܰܡܠܳܬ ܐܰܪܥܳܐ ܩܶܢܝܳܢܳܟ.
25 ܗܳܢܰܘ ܝܰܡܳܐ ܪܰܒܳܐ ܘܰܪܘܰܚܬܳܐ ܕܺܐܝ̈ܕܰܝܳܐ. ܕܒܶܗ ܐܺܝܬ ܖ̈ܰܚܫܳܐ ܕܠܳܐ ܡܶܢܝܳܢ ܚܰܝ̈ܘܳܬܳܐ ܖ̈ܰܘܪܒܳܬܳܐ ܥܰܡ ܕܰܩܕ̈ܩܳܬܳܐ.
26 ܘܒܶܗ ܗܽܘ ܡܗ̈ܰܠܟܳܢ ܣܦܺܝ̈ܢܶܐ. ܠܶܘܝܳܬܰܢ ܗܳܢܳܐ ܕܰܒܪܰܝܬ ܠܡܶܓܚܰܟ ܥܠܰܘܗ̱ܝ.
27 ܟܽܠܗܽܘܢ ܠܳܟ ܗܽܘ ܡܣܰܟܶܝܢ ܕܬܶܬܶܠ ܠܗܽܘܢ ܡܶܐܟܽܘܠܬܳܐ ܒܙܰܒܢܗܽܘܢ.
28 ܝܳܗܶܒ ܐܰܢ̱ܬ ܠܗܽܘܢ ܘܡܶܬܬܰܪܣܶܝܢ. ܦܳܬܰܚ ܐܰܢ̱ܬ ܐܺܝܕܳܟ ܘܣܳܒܥܺܝܢ.
29 ܡܰܗܦܶܟ ܐܰܢ̱ܬ ܐܰܦܰܝ̈ܟ ܘܡܶܬܕܰܠܚܺܝܢ. ܫܳܩܶܠ ܐܰܢ̱ܬ ܪܽܘܚܗܽܘܢ ܘܡܳܝܬܺܝܢ ܘܰܠܥܰܦܪܗܽܘܢ ܗܳܦܟܺܝܢ.
30 ܡܫܰܕܰܪ ܐܰܢ̱ܬ ܪܽܘܚܳܟ ܘܡܶܬܒܪܶܝܢ ܘܰܡܚܰܕܶܬ ܐܰܢ̱ܬ ܐܰܦܶܝ̈ܗ̇ ܕܰܐܪܥܳܐ.
31 ܢܶܗܘܶܐ ܫܽܘܒܚܶܗ ܕܡܳܪܝܳܐ ܠܥܳܠܰܡ. ܢܶܚܕܶܐ ܡܳܪܝܳܐ ܒܰܥܒܳܕܰܘ̈ܗܝ̱.
32 ܕܚܳܐܰܪ ܒܰܐܪܥܳܐ ܘܙܳܝܥܳܐ ܘܟܳܐܶܐ ܒܛܽܘܖ̈ܶܐ ܘܬܳܢܶܝܢ.
33 ܐܶܫܰܒܰܚ ܠܡܳܪܝܳܐ ܒܚܰܝܰܝ̈ ܘܶܐܙܡܰܪ ܠܰܐܠܳܗܳܐ ܥܰܕ ܩܰܝܳܡ ܐ̱ܢܳܐ.
34 ܬܶܒܣܰܡ ܠܶܗ ܬܶܫܒܽܘܚܬܝ̱ ܘܶܐܢܳܐ ܐܶܚܕܶܐ ܒܡܳܪܝܳܐ.
35 ܘܰܢܣܽܘܦܽܘܢ ܚܰܛܳܝ̈ܶܐ ܡܶܢ ܐܰܪܥܳܐ ܘܥܰܘ̈ܳܠܶܐ ܠܳܐ ܢܶܫܬܰܚܪܽܘܢ ܒܳܗ̇. ܒܰܪܶܟܝ̱ ܢܰܦܫܝ̱ ܠܡܳܪܝܳܐ.