Psalms 48
The Book of Psalms
܀ ܡܙܡܘܪܐ ܡܚ ܀
ܡܶܫܬܰܥܶܐ ܥܰܠ ܪܰܒܽܘܬ݂ ܥܽܘܕܪܳܢܶܗ ܕܰܐܠܳܗܳܐ
1 ܪܰܒ ܗܽܘ ܡܳܪܰܢ ܘܰܡܫܰܒܰܚ ܪܰܘܪܒܳܐܺܝܬ ܒܰܩܪܺܝܬܶܗ ܕܰܐܠܳܗܰܢ. ܘܒܛܽܘܪܶܗ ܩܰܕܺܝܫܳܐ ܘܰܡܫܰܒܚܳܐ.
2 ܚܰܕܽܘܬܳܐ ܒܟܽܠܳܗ̇ ܐܰܪܥܳܐ ܛܽܘܪܳܐ ܕܨܶܗܝܽܘܢ ܕܒܰܫܦܽܘ̈ܠܰܝ ܓܰܪܒܝܳܐ. ܩܪܺܝܬܶܗ ܗܺܝ ܕܡܰܠܟܳܐ ܪܰܒܳܐ.
3 ܐܰܠܳܗܳܐ ܒܣܳܚܖ̈ܳܬܳܗ̇ ܡܰܘܕܰܥ ܥܽܘܫܢܶܗ.
4 ܡܶܛܽܠ ܕܗܳܐ ܡܰܠܟ̈ܶܐ ܐܶܬܛܰܝܰܒܘ ܘܰܥܒܰܪܘ ܐܰܟܚܕܳܐ.
5 ܗܶܢܽܘܢ ܚܙܰܘ ܘܰܬܡܰܗܘ ܘܙܳܥܘ.
6 ܘܰܪܬܺܝܬܳܐ ܐܶܚܰܕ ܐܶܢܽܘܢ. ܘܚܶܒ̈ܠܐ ܐܰܝܟ ܕܝܳܠܶܕܬܳܐ.
7 ܒܪܽܘܚܳܐ ܥܰܫܺܝܢܬܳܐ ܢܶܬܬܰܒܖ̈ܳܢ ܐܶܠܦ̈ܶܐ ܕܬܰܪܫܺܝܫ.
8 ܐܰܝܟ ܕܰܫܡܰܥܢ ܗܳܟܰܢܳܐ ܚܙܰܝܢ. ܒܰܩܪܺܝܬܶܗ ܕܡܳܪܝܳܐ ܚܰܝܠܬܳܢܳܐ. ܒܰܩܪܺܝܬܶܗ ܕܰܐܠܳܗܰܢ. ܐܰܠܳܗܳܐ ܢܰܬܩܢܺܝܗ̇ ܥܕܰܡܳܐ ܠܥܳܠܰܡ.
9 ܣܰܒܰܪܢ ܐܰܠܳܗܳܐ ܠܛܰܝܒܽܘܬܳܟ ܒܓܰܘܶܗ ܕܗܰܝܟܠܳܟ.
10 ܐܰܝܟ ܫܡܳܟ ܐܰܠܳܗܳܐ ܗܳܟܰܢܳܐ ܬܶܫܒ̈ܚܳܬܳܟ. ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ ܙܰܕܺܝܩܽܘܬܳܐ ܡܰܠܝܳܐ ܝܰܡܺܝܢܳܟ.
11 ܢܶܚܕܶܐ ܛܽܘܪܳܐ ܕܨܶܗܝܽܘܢ ܘܰܢܕܽܘ̈ܨܳܢ ܒܢ̈ܳܬ ܝܺܗܽܘܕܳܐ ܡܶܛܽܠ ܕܺܝܢܰܝ̈ܟ ܡܳܪܝܳܐ.
12 ܐܶܬܟܰܪܟܽܘܗ̇ ܠܨܶܗܝܽܘܢ ܘܚܽܘܕܪܽܘܗ̇ ܘܰܡܢܰܘ ܡܰܓܕ̈ܠܶܝܗ̇.
13 ܣܺܝܡܘ ܠܶܒܟܽܘܢ ܥܰܠ ܚܰܝܠܳܗ̇ ܘܰܥܩܽܘܪܘ ܣܳܚܖ̈ܳܬܳܗ̇. ܕܬܶܫܬܰܥܽܘܢ ܠܕܳܪܳܐ ܐ̱ܚܪܳܝܳܐ.
14 ܕܗܳܢܰܘ ܐܰܠܳܗܳܐ ܐܰܠܳܗܰܢ ܠܥܳܠܰܡ ܘܰܠܥܳܠܰܡ ܥܳܠܡܺܝܢ. ܕܗܽܘ ܢܕܰܒܪܰܢ ܠܥܶܠ ܡܶܢ ܡܰܘܬܳܐ.