Psalms 51
The Book of Psalms
܀ ܡܙܡܘܪܐ ܢܐ ܀
ܡܶܬܢܰܒܶܐ ܥܰܠ ܥܰܡܳܐ ܕܰܒܒܳܒܶܠ. ܐܰܝܟ ܡܰܢ ܕܡܰܘܕܶܝܢ ܕܰܚܛܰܘ ܘܫܳܐܠܺܝܢ ܖ̈ܰܚܡܶܐ
1 ܪܰܚܶܡ ܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬܳܟ. ܘܰܐܝܟ ܣܽܘܓܳܐܐ ܕܖ̈ܰܚܡܰܝܟ ܠܚܺܝ ܚܛܳܗܰܝ̈.
2 ܐܰܣܓܳܐ ܐܰܫܺܝܓܰܝܢܝ̱ ܡܶܢ ܥܰܘܠܝ̱. ܘܡܶܢ ܚܛܳܗܰܝ̈ ܕܰܟܳܢܝ̱.
3 ܡܶܛܽܠ ܕܣܰܟܠ̈ܘܳܬܝ̱ ܝܳܕܰܥ ܐ̱ܢܳܐ. ܘܰܚܛܳܗܰܝ̈ ܠܽܘܩܒܰܠܝ̱ ܐܶܢܽܘܢ ܒܟܽܠܙܒܰܢ.
4 ܠܳܟ ܒܰܠܚܽܘܕܰܝܟ ܚܛܺܝܬ. ܘܒܺܝ̈ܫܳܬܳܐ ܩܕܳܡܰܝܟ ܣܶܥܪܶܬ. ܡܶܛܽܠ ܕܬܶܙܕܰܕܰܩ ܒܡܶܠܬܳܟ ܘܬܶܙܟܶܐ ܒܕܺܝ̈ܢܰܝܟ.
5 ܡܶܛܽܠ ܕܰܒܥܰܘܠܳܐ ܐܶܬܒܰܛܢܶܬ. ܘܒܰܚܛܳܗ̈ܶܐ ܒܛܶܢܬܰܢܝ̱ ܐܶܡܝ̱.
6 ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ. ܘܟܰܣ̈ܝܳܬܳܐ ܕܚܶܟܡܬܳܟ ܐܰܘܕܰܥܬܳܢܝ̱.
7 ܪܽܘܣ ܥܠܰܝ ܒܙܽܘܦܳܐ ܘܶܐܬܕܰܟܶܐ. ܚܰܠܶܠܰܝܢܝ̱ ܒܶܗ ܘܡܶܢ ܬܰܠܓܳܐ ܐܶܚܘܰܪ.
8 ܐܰܣܒܰܥܰܝܢܝ̱ ܒܽܘܣܳܡܳܟ ܘܚܰܕܽܘܬܳܟ. ܘܢܶܚܕܽܘܢ ܓܰܖ̈ܡܰܝ ܡܰܟܺܝ̈ܟܶܐ.
9 ܐܰܗܦܶܟ ܐܰܦܰܝ̈ܟ ܡܶܢ ܚܛܳܗܰܝ̈. ܘܟܽܠܗܶܝܢ ܣܰܟܠ̈ܘܳܬܝ̱ ܠܚܺܝ.
10 ܠܶܒܳܐ ܕܰܟܝܳܐ ܒܪܺܝ ܒܺܝ ܐܰܠܳܗܳܐ. ܘܪܽܘܚܳܟ ܬܩܰܢܬܳܐ ܚܰܕܶܬ ܒܓܰܘܝ̱.
11 ܠܳܐ ܬܶܫܕܶܝܢܝ̱ ܡܶܢ ܩܕܳܡܰܝܟ. ܘܪܽܘܚܳܟ ܩܰܕܺܝܫܳܐ ܠܳܐ ܬܶܣܰܒ ܡܶܢܝ̱.
12 ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܘܪܩܳܢܳܟ. ܘܪܽܘܚܳܟ ܡܫܰܒܰܚܬܳܐ ܬܣܰܡܟܰܢܝ̱.
13 ܕܰܐܠܶܦ ܠܥܰܘ̈ܳܠܶܐ ܐܽܘܪܚܳܟ. ܘܚܰܛܳܝ̈ܶܐ ܠܘܳܬܳܟ ܢܶܬܦܢܽܘܢ.
14 ܦܰܨܳܢܝ̱ ܡܶܢ ܕܡܳܐ ܐܰܠܳܗܝ ܐܰܠܳܗܳܐ ܕܦܽܘܪܩܳܢܝ̱. ܘܰܢܫܰܒܰܚ ܠܶܫܳܢܝ̱ ܙܰܕܺܝܩܽܘܬܳܟ.
15 ܡܳܪܝܳܐ ܦܬܰܚ ܠܺܝ ܣܶܦ̈ܘܳܬܝ̱. ܘܦܽܘܡܝ̱ ܢܙܰܡܰܪ ܬܶܫܒ̈ܚܳܬܳܟ.
16 ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ. ܐܳܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬܪܰܥܺܝܬ.
17 ܕܶܒܚܰܘ̈ܗܝ ܕܰܐܠܳܗܳܐ ܪܽܘܚܳܐ ܗ̱ܝ ܡܰܟܺܝܟܬܳܐ. ܠܶܒܳܐ ܫܚܺܝܩܳܐ ܐܰܠܳܗܳܐ ܠܳܐ ܡܰܣܠܶܐ.
18 ܐܰܛܐܶܒ ܒܨܶܒܝܳܢܳܟ ܠܨܶܗܝܽܘܢ. ܘܰܒܢܺܝ ܫܽܘܖ̈ܶܝܗ̇ ܕܽܐܘܪܺܫܠܶܡ.
19 ܗܳܝܕܶܝܢ ܬܶܨܛܒܶܐ ܒܕܶܒ̈ܚܶܐ ܕܩܽܘܫܬܳܐ ܘܰܒܝܰܩ̈ܕܶܐ ܫܰܠ̈ܡܶܐ. ܘܗܳܝܕܶܝܢ ܢܰܣܩܽܘܢ ܬܰܘܖ̈ܶܐ ܥܰܠ ܡܰܕܒܚܳܟ.