Psalms 40
The Book of Psalms
܀ ܡܙܡܘܪܐ ܡ ܀
ܡܶܬܢܰܒܶܐ ܥܰܠ ܥܰܡܳܐ ܚܠܳܦ ܓܗܳܝܬܶܗ ܕܡܶܢ ܫܶܒܝܳܐ
1 ܡܣܰܒܳܪܽܘ ܣܰܒܪܶܬ ܒܡܳܪܝܳܐ. ܕܶܐܬܦܢܺܝ ܠܘܳܬܝ̱ ܘܰܫܡܰܥ ܒܳܥܽܘܬܝ̱.
2 ܘܰܐܣܩܰܢܝ̱ ܡܶܢ ܓܽܘܒܳܐ ܕܕܽܘܘܳܢܳܐ. ܘܡܶܢ ܣܝܳܢܳܐ ܕܰܚܒܳܠܳܐ. ܐܰܩܺܝܡ ܥܰܠ ܫܽܘܥܳܐ ܖ̈ܶܓܠܰܝ ܘܰܐܬܩܶܢ ܗܶܠܟ̈ܳܬܝ̱.
3 ܝܰܗܒ ܒܦܽܘܡܝ̱ ܬܶܫܒܽܘܚܬܳܐ ܚܕܰܬܳܐ ܬܶܫܒܽܘܚܬܳܐ ܠܰܐܠܳܗܳܐ. ܕܢܶܚܙܽܘܢ ܣܰܓܺܝ̈ܐܶܐ ܘܢܶܚܕܽܘܢ. ܘܰܢܣܰܒܪܽܘܢ ܒܡܳܪܝܳܐ.
4 ܛܽܘܒܰܘܗ̱ܝ ܠܒܰܪܢܳܫܳܐ ܕܥܰܠ ܫܡܶܗ ܕܡܳܪܝܳܐ ܬܟܺܝܠ. ܘܠܳܐ ܦܳܢܶܐ ܠܰܣܪܺܝܩܽܘܬܳܐ. ܐܳܦܠܳܐ ܠܡܰܡܠܠܳܐ ܕܰܓܳܠܳܐ.
5 ܣܰܓܺܝ̈ܐܳܢ ܐܶܢܶܝܢ ܕܰܥܒܰܕܬ ܡܳܪܝܳܐ ܐܰܠܳܗܰܢ. ܬܶܕܡܖ̈ܳܬܳܟ ܘܡܰܚܫ̈ܒܳܬܳܟ ܥܠܰܝܢ ܘܠܰܝܬ ܐܰܟܘܳܬܳܟ. ܚܰܘܺܝܬ ܘܶܐܡܰܪܬ ܘܣܰܓܺܝ̈ܐܳܢ ܐܶܢܶܝܢ ܡܶܢ ܡܶܢܝܳܢܳܐ.
6 ܒܕܶܒ̈ܚܶܐ ܘܰܒܩܽܘܖ̈ܒܳܢܶܐ ܠܳܐ ܨܒܰܝܬ. ܐܶܕܢ̈ܶܐ ܕܶܝܢ ܢܰܩܶܒܬ ܠܺܝ. ܘܝܰܩ̈ܕܶܐ ܫܰܠܡ̈ܶܐ ܕܰܚܠܳܦ ܚܛܳܗ̈ܶܐ ܠܳܐ ܫܐܶܠܬ.
7 ܗܳܝܕܶܝܢ ܐܶܡܪܶܬ ܕܗܳܐ ܐܶܬܺܝܬ. ܕܰܒܪܺܝܫ ܟܬܳܒ̈ܶܐ ܟܬܺܝܒ ܥܠܰܝ.
8 ܠܡܶܥܒܰܕ ܨܶܒܝܳܢܳܟ ܐܰܠܳܗܳܐ ܨܒܺܝܬ. ܘܢܳܡܽܘܣܳܟ ܒܓܰܘ ܟܰܪܣܝ̱.
9 ܣܰܒܪܶܬ ܙܰܕܺܝܩܽܘܬܳܟ ܒܥܺܕܬܳܐ ܪܰܒܬܳܐ. ܘܣܶܦ̈ܘܳܬܝ̱ ܠܳܐ ܟܠܺܝܬ. ܡܳܪܝܳܐ ܐܰܢ̱ܬ ܝܳܕܰܥ ܐܰܢ̱ܬ.
10 ܕܠܳܐ ܛܰܫܺܝܬ ܙܰܕܺܝܩܽܘܬܳܟ ܒܓܰܘ ܠܶܒܝ̱. ܐܶܠܳܐ ܦܽܘܪܩܳܢܳܟ ܘܗܰܝܡܳܢܽܘܬܳܟ ܐܶܡܪܶܬ. ܘܠܳܐ ܛܰܫܺܝܬ ܛܰܝܒܽܘܬܳܟ ܘܗܰܝܡܳܢܽܘܬܳܟ ܡܶܢ ܥܺܕܬܳܐ ܪܰܒܬܳܐ.
11 ܐܳܦ ܐܰܢ̱ܬ ܡܳܪܝܳܐ ܠܳܐ ܬܶܟܠܶܐ ܡܶܢܝ̱ ܖ̈ܰܚܡܰܝܟ. ܐܶܠܳܐ ܖ̈ܰܚܡܰܝܟ ܘܗܰܝܡܳܢܽܘܬܳܟ ܒܟܽܠܙܒܰܢ ܢܢܰܛܪܽܘܢܳܢܝ̱.
12 ܡܶܛܽܠ ܕܚܰܕܖ̈ܳܢܝ̱ ܒܺܝ̈ܫܳܬܳܐ ܕܠܳܐ ܡܶܢܝܳܢ. ܘܰܐܕܪܟܽܘܢܝ̱ ܚܛܳܗܰܝ̈ ܘܠܳܐ ܐܶܫܟܚܶܬ ܠܡܶܚܙܳܐ. ܘܰܥܫܶܢܘ ܡܶܢ ܣܰܥܪܳܐ ܕܪܺܝܫܝ̱ ܘܠܶܒܝ̱ ܫܰܒܩܰܢܝ̱.
13 ܨܒܺܝ ܡܳܪܝܳܐ ܠܰܡܦܰܨܳܝܽܘܬܰܢܝ̱. ܡܳܪܝܳܐ ܠܥܽܘܕܪܳܢܝ̱ ܟܰܬܰܪ.
14 ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܒܳܥܶܝܢ ܠܡܶܩܛܰܠ ܠܢܰܦܫܝ̱. ܢܶܗܦܟܽܘܢ ܠܒܶܣܬܰܪܗܽܘܢ ܘܢܰܚܦܪܽܘܢ. ܐܰܝܠܶܝܢ ܕܨܳܒܶܝܢ ܠܒܺܝܫܬܝ̱.
15 ܢܶܬܡܗܽܘܢ ܒܬܶܢܝܳܐ ܕܒܶܗܬܰܬܗܽܘܢ ܐܰܝܠܶܝܢ ܕܶܐܡܰܪܘ ܥܠܰܝ ܐܶܗܶܐ ܐܶܗܶܐ.
16 ܢܶܚܕܽܘܢ ܒܳܟ ܟܽܠ ܕܒܳܥܶܝܢ ܠܳܟ. ܘܢܺܐܡܪܽܘܢ ܒܟܽܠܙܒܰܢ ܕܪܰܒ ܗܽܘ ܡܳܪܝܳܐ. ܐܰܝܠܶܝܢ ܕܪܳܚܡܺܝܢ ܦܽܘܪܩܳܢܳܟ.
17 ܘܶܐܢܳܐ ܡܶܣܟܺܢܳܐ ܐ̱ܢܳܐ ܘܒܳܝܫܳܐ. ܡܳܪܝ ܐܶܬܚܰܫܰܒܘ ܥܠܰܝ. ܡܥܰܕܪܳܢܝ ܐܰܢ̱ܬ ܘܰܡܦܰܨܝܳܢܝ̱ ܐܰܠܳܗܝ ܠܳܐ ܬܰܘܚܰܪ.