Psalms 28
The Book of Psalms
܀ ܡܙܡܘܪܐ ܟܚ ܀
ܐܰܡܺܝܪ ܠܕܰܘܺܝܕ ܡܶܢ ܦܰܪܨܽܘܦ ܚܶܙܰܩܝܳܐ
1 ܠܳܟ ܡܳܪܝܳܐ ܩܪܺܝܬ ܐܰܠܳܗܝ ܠܳܐ ܬܶܫܬܽܘܩ ܡܶܢܝ̱. ܕܰܠܡܳܐ ܬܶܫܬܽܘܩ ܡܶܢܝ̱ ܘܶܐܫܬܠܶܡ ܥܰܡ ܢܳܚ̈ܬܰܝ ܓܽܘܒܳܐ.
2 ܫܡܰܥ ܩܳܠܳܐ ܕܒܳܥܽܘܬܝ̱ ܟܰܕ ܐܶܓܥܶܐ ܠܘܳܬܳܟ. ܘܟܰܕ ܐܰܪܺܝܡ ܐܺܝ̈ܕܰܝ ܠܗܰܝܟܠܳܟ ܩܰܕܺܝܫܳܐ.
3 ܠܳܐ ܬܶܡܢܶܝܢܝ̱ ܥܰܡ ܖ̈ܰܫܺܝܥܶܐ ܘܥܰܡ ܥܳܒ̈ܕܰܝ ܥܰܘܠܳܐ. ܕܰܡܡܰܠܠܺܝܢ ܫܠܳܡܳܐ ܥܰܡ ܚܰܒܖ̈ܰܝܗܽܘܢ ܘܒܺܝܫܬܳܐ ܒܠܶܒܗܽܘܢ.
4 ܦܪܽܘܥ ܐܶܢܽܘܢ ܐܰܝܟ ܥܒܳܕܰܝ̈ܗܽܘܢ ܘܰܐܝܟ ܒܺܝܫܽܘܬܗܽܘܢ.
5 ܡܶܛܽܠ ܕܠܳܐ ܐܶܣܬܰܟܰܠܘ ܒܰܥܒܳܕܰܘ̈ܗܝ ܕܡܳܪܝܳܐ ܘܒܰܥܒܳܕ ܐܺܝ̈ܕܰܘܗ̱ܝ. ܢܶܣܚܽܘܦ ܐܶܢܽܘܢ ܘܠܳܐ ܢܶܒܢܶܐ ܐܶܢܽܘܢ.
6 ܒܪܺܝܟ ܗܽܘ ܡܳܪܝܳܐ ܕܰܫܡܰܥ ܩܳܠܳܐ ܕܒܳܥܽܘܬܝ̱.
7 ܡܳܪܝܳܐ ܥܳܕܽܘܪܝ̱ ܘܰܡܣܰܝܥܳܢܝ̱. ܕܰܥܠܰܘܗ̱ܝ ܐܶܬܬܟܶܠ ܠܶܒܝ̱ ܘܰܫܘܰܚ ܒܶܣܪܝ. ܘܰܒܬܶܫܒܽܘܚܬܳܐ ܐܰܘܕܶܐ ܠܶܗ.
8 ܡܳܪܝܳܐ ܚܰܝܠܰܐ ܗܘ ܕܥܰܡܶܗ. ܘܡܣܰܝܥܳܢܳܐ ܕܦܽܘܪܩܳܢܳܐ ܕܰܡܫܺܝܚܶܗ.
9 ܦܪܽܘܩ ܠܥܰܡܳܟ ܘܒܰܪܶܟ ܠܝܳܪܬܽܘܬܳܟ. ܘܰܪܥܺܝ ܐܶܢܽܘܢ ܘܕܰܒܰܪ ܐܶܢܽܘܢ ܥܕܰܡܳܐ ܠܥܳܠܰܡ.