Psalms 36
The Book of Psalms
܀ ܡܙܡܘܪܐ ܠܘ ܀
ܐܰܡܺܝܪ ܠܕܰܘܺܝܕ ܥܰܠ ܦܰܪܨܽܘܦܶܗ ܘܢܶܟ݂ܠܶܗ ܕܫܳܐܳܘܠ ܕܨܶܐܕܰܘܗ̱ܝ
1 ܡܶܬܚܰܫܰܒ ܥܰܘܳܠܳܐ ܪܽܘܫܥܳܐ ܒܠܶܒܶܗ. ܡܶܛܽܠ ܕܠܰܝܬ ܕܶܚܠܬܶܗ ܕܰܐܠܳܗܳܐ ܠܽܘܩܒܰܠ ܥܰܝ̈ܢܰܘܗ̱ܝ.
2 ܡܶܛܽܠ ܕܣܰܢܝܳܐ ܗ̱ܝ ܒܥܰܝ̈ܢܰܘܗ̱ܝ ܕܢܶܫܒܽܘܩ ܚܛܳܗܰܘ̈ܗܝ ܘܢܶܣܢܶܐ ܐܶܢܽܘܢ.
3 ܦܶܬܓܳܡܳܐ ܕܦܽܘܡܶܗ ܟܺܐܒܳܐ ܘܢܶܟܠܳܐ. ܘܠܳܐ ܨܳܒܶܐ ܠܡܶܥܒܰܕ ܛܳܒܬܳܐ.
4 ܟܺܐܒܳܐ ܡܶܬܚܰܫܰܒ ܥܰܠ ܡܰܫܟܒܶܗ. ܘܰܡܗܰܠܶܟ ܒܽܐܘܪܚܳܐ ܐܰܝܕܳܐ ܕܠܳܐ ܫܰܦܺܝܪܳܐ ܕܢܰܒܐܶܫ.
5 ܡܳܪܝܳܐ ܒܰܫܡܰܝܳܐ ܖ̈ܰܚܡܰܝܟ. ܘܗ̱ܝܡܳܢܽܘܬܳܟ ܥܕܰܡܳܐ ܠܰܫ̈ܡܰܝ ܫܡܰܝܳܐ.
6 ܘܙܰܕܺܝܩܽܘܬܳܟ ܐܰܝܟ ܛܽܘܪܶܗ ܕܰܐܠܳܗܳܐ. ܘܕܺܝܢܰܝ̈ܟ ܐܰܝܟ ܬܗܽܘܡܳܐ ܪܰܒܳܐ. ܒܢܰܝ̈ܢܳܫܳܐ ܘܰܒܥܺܝܪܳܐ ܦܳܪܶܩ ܐܰܢ̱ܬ ܡܳܪܝܳܐ.
7 ܡܳܐ ܣܰܓܺܝܐܺܝܢ ܖ̈ܰܚܡܰܝܟ ܐܰܠܳܗܳܐ. ܘܰܒܢܰܝ̈ܢܳܫܳܐ ܒܛܶܠܳܠܳܐ ܕܟܶܢ̈ܦܰܝܟ ܢܶܬܟܰܣܽܘܢ.
8 ܘܢܶܪܘܢ ܡܶܢ ܫܽܘܡܢܶܗ ܕܒܰܝܬܳܟ. ܘܡܶܢ ܢܰܚܠܳܟ ܒܰܣܺܝܡܳܐ ܬܰܫܩܶܐ ܐܶܢܽܘܢ.
9 ܡܶܛܽܠ ܕܡܰܒܽܘܥܳܐ ܕܚܰܝ̈ܶܐ ܥܰܡܳܟ ܗܽܘ. ܘܰܒܢܽܘܗܪܳܟ ܗܽܘ ܚܳܙܶܝܢܰܢ ܢܽܘܗܪܳܐ.
10 ܛܰܪ ܖ̈ܰܚܡܰܝܟ ܠܩܰܖ̈ܺܝܒܰܝܟ. ܘܙܰܕܺܝܩܽܘܬܳܟ ܠܰܬܖ̈ܺܝܨܰܝ ܠܶܒܳܐ.
11 ܠܳܐ ܬܰܝܬܶܐ ܥܠܰܝܢ ܪܶܓܠܳܐ ܥܰܫܺܝܢܬܳܐ. ܘܺܐܝܕܗܽܘܢ ܕܖ̈ܰܫܺܝܥܶܐ ܠܳܐ ܬܙܺܝܥܰܢ.
12 ܡܶܛܽܠ ܕܬܰܡܳܢ ܢܳܦܠܺܝܢ ܟܽܠ ܥܳܒ̈ܕܰܝ ܫܽܘܩܪܳܐ. ܘܡܶܣܬܰܚܦܺܝܢ ܘܠܳܐ ܡܶܫܟܚܺܝܢ ܠܰܡܩܳܡ.