Psalms 35
The Book of Psalms
܀ ܡܙܡܘܪܐ ܠܗ ܀
ܥܰܠ ܐܰܝܠܶܝܢ ܕܶܐܣܬܥܰܪ ܠܘܳܬ ܐܶܪܰܡܝܳܐ ܡܶܢ ܥܰܡܳܐ
1 ܕܽܘܢ ܡܳܪܝܳܐ ܕܺܝܢܝ̱ ܘܶܐܬܟܰܬܫ ܥܰܡ ܐܰܝܠܶܝܢ ܕܡܶܬܟܰܬܫܺܝܢ ܥܰܡܝ̱.
2 ܐܰܚܽܘܕ ܙܰܝܢܳܐ ܘܣܰܟܪܳܐ ܘܩܽܘܡ ܒܥܽܘܕܪܳܢܝ̱.
3 ܫܡܽܘܛ ܣܰܦܣܺܝܪܳܐ. ܘܰܐܒܪܶܩ ܠܽܘܩܒܰܠ ܖ̈ܳܕܽܘܦܰܝ. ܘܶܐܡܰܪ ܠܢܰܦܫܝ̱ ܕܶܐܢܰܐ ܗ̱ܘ ܦܳܪܽܘܩܶܟܝ̱.
4 ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܒܳܥܶܝܢ ܠܢܰܫܦܝ̱. ܢܶܗܦܟܽܘܢ ܠܒܶܣܬܰܪܗܽܘܢ ܘܢܰܚܦܪܽܘܢ ܐܰܝܠܶܝܢ ܕܶܐܬܚܰܫܰܒܘ ܥܠܰܝ ܒܺܝܫܬܳܐ.
5 ܢܶܗܘܽܘܢ ܐܰܝܟ ܕܰܚܺܝܚܳܐ ܩܕܳܡ ܪܽܘܚܳܐ. ܘܡܰܠܰܐܟܶܗ ܕܡܳܪܝܳܐ ܢܶܪܕܽܘܦ ܐܶܢܽܘܢ.
6 ܬܶܚܫܰܟ ܐܽܘܪܚܗܽܘܢ ܘܢܶܗܘ̈ܝܳܢ ܒܳܗ̇ ܡܰܫܖ̈ܽܘܥܝܳܬܳܐ. ܘܡܰܠܰܐܟܶܗ ܕܰܐܠܳܗܳܐ ܢܶܪܕܽܘܦ ܐܶܢܽܘܢ.
7 ܥܰܠ ܕܰܛܡܰܪܘ ܠܺܝ ܦܰܚ̈ܶܐ. ܘܰܡܨܺܝܕܬܳܐ ܦܪܰܣܘ ܠܢܰܦܫܝ̱.
8 ܬܺܐܬܶܐ ܥܠܰܝܗܽܘܢ ܒܺܝܫܬܳܐ ܡܶܢ ܫܶܠܝܳܐ. ܘܰܡܨܺܝܕܬܳܐ ܕܰܛܡܰܪܘ ܬܶܐܚܽܘܕ ܐܶܢܽܘܢ. ܘܓܽܘܡܳܨܳܐ ܕܰܚܦܰܪܘ ܢܶܦܠܽܘܢ ܒܶܗ.
9 ܢܰܦܫܝ̱ ܕܶܝܢ ܬܶܪܘܰܙ ܒܰܐܠܳܗܳܐ. ܘܬܶܬܒܰܣܰܡ ܒܦܽܘܪܩܳܢܶܗ.
10 ܘܟܽܠܗܽܘܢ ܓܰܖ̈ܡܰܝ ܢܺܐܡܪܽܘܢ. ܡܳܪܝܳܐ ܡܰܢܽܘ ܐܰܟܘܳܬܳܟ. ܕܰܡܦܰܨܶܐ ܐܰܢ̱ܬ ܠܒܳܝܫܳܐ ܡܶܢ ܒܥܶܠܕܒܳܒܶܗ. ܘܰܠܡܶܣܟܺܢܳܐ ܘܰܠܒܳܝܫܳܐ ܡܶܢ ܡܰܢ ܕܚܳܛܶܦ ܠܶܗ ܒܰܩܛܺܝܪܳܐ.
11 ܩܳܡܘ ܣܳܗ̈ܕܶܐ ܕܥܰܘܠܳܐ. ܘܡܶܕܶܡ ܕܠܳܐ ܝܳܕܰܥ ܗ̱ܘܺܝܬ ܫܰܐܠܽܘܢܝ̱.
12 ܦܰܪܥܽܘܢܝ̱ ܒܺܝܫܬܳܐ ܚܠܳܦ ܛܳܒܬܳܐ. ܘܰܐܘܒܶܕܘ ܢܰܦܫܝ̱ ܡܶܢ ܒܢܰܝ̈ܢܳܫܳܐ.
13 ܘܶܐܢܳܐ ܒܰܟܪܺܝܗܽܘܬܗܽܘܢ ܠܶܒܫܶܬ ܣܰܩܳܐ. ܘܡܰܟܟܶܬ ܢܰܦܫܝ̱ ܒܨܰܘܡܳܐ. ܘܰܨܠܽܘܬܝ̱ ܠܥܽܘܒܝ̱ ܗܶܦܟܰܬ.
14 ܐܰܝܟ ܪܳܚܡܳܐ ܘܰܐܝܟ ܐܰܚܳܐ ܡܗܰܠܶܟ ܗ̱ܘܺܝܬ. ܘܰܐܝܟ ܗܰܘ ܕܝܳܬܶܒ ܒܶܐܒܠܳܐ ܐܶܬܕܘܺܝܬ.
15 ܒܚܰܫܝ̱ ܐܶܬܟܰܢܰܫܘ ܘܰܚܕܺܝܘ ܠܺܝ. ܐܶܬܟܰܢܰܫܘ ܥܠܰܝ ܢܽܘܓܪܳܐ ܘܠܳܐ ܝܶܕܥܶܬ.
16 ܒܫܽܘܒܗܳܪܗܽܘܢ ܘܰܒܒܽܘܙܳܚܗܽܘܢ ܚܰܪܶܩܘ ܥܠܰܝ ܫܶܢܰܝ̈ܗܽܘܢ.
17 ܡܳܪܝ ܟܰܕܽܘ ܚܙܰܝܬ. ܐܰܗܦܶܟ ܢܰܦܫܝ̱ ܡܶܢ ܫܓܽܘܫܺܝܗܽܘܢ. ܘܡܶܢ ܐܰܖ̈ܝܰܘܳܬܳܐ ܝܺܚܺܝܕܽܘܬܝ̱.
18 ܐܰܘܕܶܐ ܠܳܟ ܒܥܺܕܬܳܐ ܪܰܒܬܳܐ. ܘܰܒܥܰܡ̈ܡܶܐ ܣܰܓܺܝ̈ܐܶܐ ܐܶܙܰܡܰܪ ܠܳܟ.
19 ܠܳܐ ܢܶܚܕܽܘܢ ܠܺܝ ܒܥܶܠܕ̈ܒܳܒܰܝ. ܘܫܰܩܳܖ̈ܶܐ ܕܣܳܢܶܝܢ ܠܺܝ ܡܰܓܳܢ. ܕܰܡܪܰܡܙܺܝܢ ܒܥܰܝܢܰܝ̈ܗܽܘܢ ܘܰܫܠܳܡܳܐ ܠܳܐ ܐܳܡܪܺܝܢ.
20 ܘܥܰܠ ܡܰܟܺܝܟܳܐ ܕܰܐܪܥܳܐ ܢܶܟܠܳܐ ܡܶܬܚܰܫܒܺܝܢ.
21 ܦܬܰܚܘ ܥܠܰܝ ܦܽܘܡܗܽܘܢ ܘܶܐܡܰܪܘ. ܐܶܗܶܐ ܐܶܗܶܐ ܚܙܳܬ ܒܶܗ ܥܰܝܢܰܢ.
22 ܚܙܰܝܬ ܐܰܠܳܗܳܐ ܘܠܳܐ ܬܶܫܬܽܘܩ ܡܳܪܝ ܘܠܳܐ ܬܰܪܚܶܩ ܡܶܢܝ.
23 ܐܶܬܬܥܺܝܪ ܠܕܺܝܢܝ̱ ܐܰܠܳܗܝ ܘܡܳܪܝ̱ ܘܰܚܙܺܝ ܥܽܘܠܒܳܢܝ̱.
24 ܕܽܘܢܰܝܢܝ̱ ܐܰܝܟ ܙܰܕܺܝܩܽܘܬܳܟ ܡܳܪܝܳܐ. ܕܠܳܐ ܢܶܚܕܽܘܢ ܠܺܝ.
25 ܘܠܳܐ ܢܺܐܡܪܽܘܢ ܒܠܶܒܗܽܘܢ. ܕܶܐܬܬܢܺܝܚܰܬ ܢܰܦܫܰܢ ܘܛܰܒܰܥܢܳܝܗܝ̱.
26 ܢܶܒܗܬܽܘܢ ܘܢܰܚܦܪܽܘܢ ܐܰܟܚܕܳܐ. ܐܰܝܠܶܝܢ ܕܨܳܒܶܝܢ ܠܒܺܝܫܬܝ̱. ܘܰܐܝܠܶܝܢ ܕܡܶܬܪܰܘܪܒܺܝܢ ܥܠܰܝ ܢܶܠܒܫܽܘܢ ܒܶܗܬܬܳܐ.
27 ܢܫܰܒܚܽܘܢ ܘܢܶܚܕܽܘܢ. ܐܰܝܠܶܝܢ ܕܨܳܒܶܝܢ ܠܙܳܟܽܘܬܝ̱ ܘܢܺܐܡܪܽܘܢ ܒܟܽܠܙܒܰܢ ܕܪܰܒ ܗܽܘ ܡܳܪܝܳܐ. ܕܰܨܒܳܐ ܒܰܫܠܳܡܳܐ ܕܥܰܒܕܶܗ.
28 ܠܶܫܳܢܝ̱ ܢܰܘܕܶܐ ܒܙܰܕܺܝܩܽܘܬܳܟ ܘܟܽܠܶܗ ܝܰܘܡܳܐ ܒܬܶܫܒ̈ܚܳܬܳܟ.