Psalms 88
The Book of Psalms
܀ ܡܙܡܘܪܐ ܦܚ ܀
ܥܰܠ ܐܽܘܠ̈ܨܳܢܶܐ ܕܰܣܒܰܠܘ ܒܒܳܒܶܠ ܡܬܰܢܶܝܢ ܝܺܗܽܘ̈ܕܳܝܶܐ ܘܫܳܐܠܺܝܢ ܡܶܢ ܐܰܠܳܗܳܐ ܓܗܳܝܬܳܐ ܕܡܶܢܗܽܘܢ
1 ܡܳܪܝܳܐ ܐܰܠܳܗܳܐ ܕܦܽܘܪܩܳܢܝ̱. ܒܺܐܝܡܳܡܳܐ ܓܥܺܝܬ ܘܰܒܠܺܠܝܳܐ ܩܕܳܡܰܝܟ.
2 ܬܶܥܽܘܠ ܩܕܳܡܰܝܟ ܨܠܽܘܬܝ̱. ܘܰܐܪܟܶܢ ܐܶܕܢܳܟ ܠܒܳܥܽܘܬܝ̱.
3 ܡܶܛܽܠ ܕܣܶܒܥܰܬ ܢܰܦܫܝ̱ ܒܺܝ̈ܫܳܬܳܐ ܘܚܰܝܰܝ̈ ܠܰܫܝܽܘܠ ܡܰܛܺܝܘ̱.
4 ܐܶܬܚܰܫܒܶܬ ܥܰܡ ܢܳܚ̈ܬܰܝ ܓܽܘܒܳܐ. ܘܰܗܘܺܝܬ ܐܰܝܟ ܓܰܒܪܳܐ ܕܠܰܝܬ ܠܶܗ ܐܺܝܳܠܳܐ.
5 ܒܶܝܬ ܡܺܝ̈ܬܶܐ ܒܰܪ ܚܺܐܖ̈ܶܐ ܐܰܝܟ ܩܛܺܝ̈ܠܶܐ ܕܰܫܟܺܝܒܺܝܢ ܒܩܰܒܖ̈ܶܐ. ܐܰܝܠܶܝܢ ܕܬܽܘܒ ܠܳܐ ܐܶܬܕܟܰܪܬ ܐܶܢܽܘܢ. ܘܗܶܢܽܘܢ ܡܶܢ ܐܺܝ̈ܕܰܝܟ ܐܶܒܰܕܘ.
6 ܐܰܚܶܬܬܳܢܝ̱ ܠܓܽܘܒܳܐ ܬܰܚܬܳܝܳܐ ܠܚܶܫܽܘܟܳܐ ܘܰܠܛܶܠܳܠܰܝ̈ ܡܰܘܬܳܐ.
7 ܘܰܥܠܰܝ ܣܡܰܟ ܪܽܘܓܙܳܟ. ܘܟܽܠܗܽܘܢ ܡܰܚܫܽܘ̈ܠܰܝܟ ܐܰܝܬܺܝܬ ܥܠܰܝ.
8 ܐܰܪܚܶܩܬ ܡܶܢܝ̱ ܝܳܕ̈ܥܰܝ ܘܰܥܒܰܕܬܳܢܝ̱ ܠܗܽܘܢ ܛܰܡܳܐܐ. ܐܶܬܟܠܺܝܬ ܕܠܳܐ ܐܶܦܽܘܩ.
9 ܘܥܰܝܢܝ̱ ܕܳܒܰܬ ܡܶܢ ܡܽܘܟܳܟܝ̱. ܘܰܩܪܺܝܬܳܟ ܡܳܪܝܳܐ ܒܟܽܠܝܽܘܡ ܘܦܶܫܛܶܬ ܐܺܝ̈ܕܰܝ ܠܘܳܬܳܟ.
10 ܗܳܐ ܠܡܺܝ̈ܬܶܐ ܥܳܒܶܕ ܐܰܢ̱ܬ ܬܶܕܡܖ̈ܳܬܳܐ. ܘܓܰܢ̱ܒܳܖ̈ܶܐ ܢܩܽܘܡܽܘܢ ܘܢܰܘܕܽܘܢ ܠܳܟ.
11 ܘܢܶܫܬܰܥܽܘܢ ܕܰܒܩܰܒܖ̈ܶܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܰܐܒܕܳܢܳܐ.
12 ܬܶܬܺܝܕܰܥ ܒܚܶܫܽܘܟܳܐ ܬܶܕܡܽܘܪܬܳܟ ܘܙܰܕܺܝܩܽܘܬܳܟ ܒܰܐܪܥܳܐ ܕܶܐܬܛܰܥܝܰܬ.
13 ܘܶܐܢܳܐ ܠܘܳܬܳܟ ܡܳܪܝܳܐ ܓܥܺܝܬ ܘܰܒܨܰܦܪܳܐ ܨܠܽܘܬܝ̱ ܬܩܰܕܶܡ ܠܘܳܬܳܟ.
14 ܠܳܐ ܬܶܛܥܶܐ (ܝܶܗ̇) ܠܢܰܦܫܝ̱ ܡܳܪܝܳܐ ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܝ̱.
15 ܒܳܝܫܳܐ ܐ̱ܢܳܐ ܘܠܰܐܝܳܐ ܡܶܢ ܛܰܠܝܽܘܬܝ̱. ܐܶܬܬܪܺܝܡܶܬ ܘܶܐܬܡܰܟܟܶܬ ܘܬܶܘܪܶܬ.
16 ܘܰܥܠܰܝ ܥܒܰܪ ܪܽܘܓܙܳܟ ܘܰܕܠܽܘܚܝܳܟ ܫܰܬܩܰܢܝ̱.
17 ܐܶܬܟܰܪܟܽܘܢܝ̱ ܐܰܝܟ ܡܰܝ̈ܳܐ ܟܽܠܶܗ ܝܰܘܡܳܐ ܘܣܳܡܘ ܥܠܰܝ ܐܰܟܚܕܳܐ.
18 ܐܰܪܚܶܩܬ ܡܶܢܝ̱ ܖ̈ܳܚܡܰܝ ܘܚܰܒܖ̈ܰܝ ܘܝܳܕ̈ܥܰܝ ܐܰܦܪܶܩܬ ܡܶܢܝ̱.