Psalms 27
The Book of Psalms
܀ ܡܙܡܘܪܐ ܟܙ ܀
ܬܰܘܕܺܝܬܶܗ ܕܚܶܙܰܩܝܳܐ ܡܶܢ ܒܳܬܰܪ ܡܰܘܬܗܽܘܢ ܕܳܐܬܽܘܖ̈ܳܝܶܐ
1 ܡܳܪܝܳܐ ܢܽܘܗܪܝ̱ ܘܦܽܘܪܩܳܢܝ̱ ܡܶܢ ܡܰܢ ܐܶܕܚܰܠ. ܡܳܪܝܳܐ ܥܽܘܫܢܳܐ ܕܚܰܝܰܝ̈ ܡܶܢ ܡܰܢܽܘ ܙܳܐܰܥ ܐ̱ܢܳܐ.
2 ܟܰܕ ܩܪܶܒܘ̱ ܠܺܝ ܒܺܝ̈ܫܶܐ ܠܡܶܐܟܰܠ ܒܶܣܪܝ̱. ܒܥܶܠܕ̈ܒܳܒܰܝ ܘܣܳܢ̈ܰܐܝ. ܐܰܟܚܕܳܐ ܐܶܣܬܰܚܰܦܘ ܘܰܢܦܰܠܘ.
3 ܐܶܢ ܬܶܫܪܶܐ ܥܠܰܝ ܡܰܫܪܺܝܬܳܐ ܠܳܐ ܕܳܚܶܠ ܠܶܒܝ̱. ܘܶܐܢ ܢܩܽܘܡ ܥܠܰܝ ܩܪܳܒܳܐ ܒܗܳܕܶܐ ܬܟܺܝܠ ܐ̱ܢܳܐ.
4 ܕܰܚܕܳܐ ܫܶܐܠܶܬ ܡܶܢ ܡܳܪܝܳܐ ܘܠܳܗ̇ ܗܽܘ ܒܳܥܶܐ ܐ̱ܢܳܐ. ܕܶܐܥܡܰܪ ܒܒܰܝܬܶܗ ܕܡܳܪܝܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈. ܘܶܐܚܙܶܐ ܒܒܰܣܺܝܡܽܘܬܶܗ ܕܡܳܪܝܳܐ ܘܶܐܦܩܽܘܕ ܗܰܝܟܠܶܗ.
5 ܡܶܛܽܠ ܕܰܢܛܰܫܶܝܢܝ ܒܣܶܬܳܪܶܗ ܒܝܰܘܡܳܐ ܒܺܝܫܳܐ. ܘܰܢܛܰܫܶܝܢܝ̱ ܒܛܶܠܳܠܳܐ ܕܡܰܫܟܢܶܗ ܘܥܰܠ ܫܽܘܥܳܐ ܢܪܺܝܡܰܢܝ̱.
6 ܡܶܢ ܗܳܫܳܐ ܢܶܬܬܪܺܝܡ ܪܺܝܫܝ̱ ܥܰܠ ܒܥܶܠܕ̈ܒܳܒܰܝ ܕܚܰܕܪܽܘܢܝ̱. ܘܶܐܕܰܒܰܚ ܒܡܰܫܟܢܶܗ ܕܶܒܚ̈ܶܐ ܕܫܽܘܒܚܳܐ. ܐܶܫܰܒܰܚ ܘܶܐܙܡܰܪ ܠܡܳܪܝܳܐ.
7 ܫܡܰܥ ܡܳܪܝܳܐ ܩܳܠܝ̱ ܡܳܐ ܕܰܩܪܺܝܬܳܟ. ܪܰܚܶܡ ܥܠܰܝ ܘܰܥܢܺܝܢܝ̱.
8 ܠܳܟ ܐܳܡܰܪ ܠܶܒܝ̱ ܘܒܳܥ̈ܝܳܢ ܐܰܦܰܝ̈ ܠܰܐܦܰܝ̈ܟ.
9 ܡܳܪܝܳܐ ܠܳܐ ܬܰܗܦܶܟ ܐܰܦܰܝ̈ܟ ܡܶܢܝ̱. ܘܠܳܐ ܬܶܐܠܨܺܝܘܗ̱ܝ ܒܪܽܘܓܙܳܐ ܠܥܰܒܕܳܟ. ܥܳܕܽܘܪܝ̱ ܗ̱ܘܰܝܬ ܡܳܪܝܳܐ. ܠܳܐ ܬܶܫܕܶܝܢܝ̱ ܘܠܳܐ ܬܶܫܒܩܰܢܝ̱ ܐܰܠܳܗܝ ܘܦܳܪܽܘܩܝ̱.
10 ܡܶܛܽܠ ܕܳܐܒܝ̱ ܘܶܐܡܝ̱ ܫܰܒܩܽܘܢܝ̱ ܘܡܳܪܝܳܐ ܚܰܡܠܰܢܝ̱.
11 ܐܰܠܶܦܰܝܢܝ̱ ܡܳܪܝܳܐ ܐܽܘܪܚܳܟ. ܘܕܰܒܰܪܰܝܢܝ̱ ܒܰܫܒܺܝ̈ܠܰܝܟ ܬܖ̈ܺܝܨܶܐ.
12 ܘܠܳܐ ܬܰܫܠܶܡܰܝܢܝ̱ ܠܰܒܥܶܠܕ̈ܒܳܒܰܝ. ܡܶܛܽܠ ܕܩܳܡܘ ܥܠܰܝ ܣܳܗ̈ܕܶܐ ܕܫܽܘܩܪܳܐ ܘܡܰܠܶܠܘ ܥܰܘܠܳܐ.
13 ܐܶܢܳܐ ܕܶܝܢ ܗܰܝܡܢܶܬ ܕܶܐܚܙܶܐ ܒܛܳܒ̈ܳܬܶܗ ܕܡܳܪܝܳܐ ܒܰܐܪܥܳܐ ܕܚܰܝ̈ܶܐ.
14 ܣܰܒܰܪܘ ܒܡܳܪܝܳܐ ܘܢܶܬܚܰܝܰܠ ܠܶܒܟܽܘܢ. ܣܰܒܰܪܘ ܒܡܳܪܝܳܐ.