Psalms 77
The Book of Psalms
܀ ܡܙܡܘܪܐ ܥܙ ܀
ܡܶܫܬܰܥܶܐ ܡܶܢ ܦܰܪܨܽܘܦ ܥܰܡܳܐ ܕܰܐܝܠܶܝܢ ܫܟܺܝܖ̈ܳܬܳܐ ܐܶܬܪܰܥܺܝܘ ܥܰܠ ܐܰܠܳܗܳܐ ܒܫܶܒܺܝܗܽܘܢ ܟܰܕ ܐܶܬܶܥܨܺܝܘ ܡܶܢ ܐܳܠܽܘܨܰܝ̈ܗܽܘܢ
1 ܒܩܳܠܝ̱ ܠܘܳܬ ܐܰܠܳܗܳܐ ܩܪܺܝܬ ܘܫܰܡܥܰܢܝ̱. ܘܰܐܪܺܝܡܶܬ ܩܳܠܝ̱ ܠܘܳܬܶܗ ܘܰܥܢܳܢܝ̱.
2 ܒܝܰܘܡܳܐ ܕܽܐܘܠܨܳܢܝ̱ ܠܡܳܪܝܳܐ ܒܥܺܝܬ. ܘܺܐܝܕܶܗ ܒܠܺܠܝܳܐ ܢܰܓܶܕܬܰܢܝ̱ ܘܠܳܐ ܫܠܺܝܬ. ܘܠܰܝܬ ܡܒܰܝܐܳܢܳܐ ܠܢܰܦܫܝ̱.
3 ܐܶܬܕܰܟܪܶܬ ܐܰܠܳܗܳܐ ܘܶܐܬܕܰܠܚܶܬ. ܘܰܪܢܺܝܬ ܘܐܬܛܰܪܦܰܬ ܪܽܘܚܝ̱.
4 ܘܰܐܚܕܽܘܢܝ̱ ܨܰܘܖ̈ܳܢܶܐ ܒܥܰܝ̈ܢܰܝ. ܚܶܪܫܶܬ ܘܠܳܐ ܡܰܠܠܶܬ.
5 ܚܶܫܒܶܬ ܝܰܘ̈ܡܰܝ ܕܡܢ ܩܕܺܝܡ. ܘܰܫܢܰܝ̈ܳܐ ܕܡܶܢ ܥܳܠܡܺܝܢ ܐܶܬܕܰܟܪܶܬ.
6 ܪܢܺܝܬ ܒܠܺܠܝܳܐ ܘܰܒܠܶܒܝ̱ ܪܢܺܝܬ. ܘܰܒܨܺܝܬ ܪܽܘܚܝ̱ ܘܶܐܡܪܶܬ.
7 ܕܰܠܥܳܠܰܡ ܛܥܳܢܝ̱ ܡܳܪܝܳܐ. ܘܠܳܐ ܡܰܘܣܶܦ ܬܽܘܒ ܠܡܶܨܛܒܳܝܽܘ ܒܺܝ.
8 ܐܰܘ ܕܰܠܡܳܐ ܠܥܳܠܡ ܡܰܥܒܰܪ ܛܰܝܒܽܘܬܶܗ. ܐܰܘ ܡܫܰܠܶܡ ܡܶܠܬܶܗ ܠܕܳܪܕܳܖ̈ܺܝܢ. ܐܰܘ ܛܳܥܶܐ ܐܰܠܳܗܳܐ ܠܰܡܪܰܚܳܡܽܘ.
9 ܐܰܘ ܚܳܡܶܠ ܖ̈ܰܚܡܰܘܗ̱ܝ ܒܪܽܘܓܙܶܗ.
10 ܐܶܡܪܶܬ ܕܰܟܪܺܝܗܽܘܬܝ̱ ܗܺܝ. ܘܬܶܢܝܳܐ ܐܶܢܶܝܢ ܕܝܰܡܺܝܢܶܗ ܕܥܶܠܳܝܳܐ.
11 ܡܶܛܽܠ ܕܶܐܬܕܰܟܪܶܬ ܡܶܢ ܩܕܺܝܡ ܬܶܕܡܖ̈ܳܬܳܟ.
12 ܘܰܪܢܺܝܬ ܒܟܽܠܗܽܘܢ ܥܒܳܕܰܝ̈ܟ. ܘܰܒܨܶܢ̈ܥܳܬܳܟ ܪܢܺܝܬ.
13 ܐܰܠܳܗܳܐ ܐܽܘܪܚܳܟ ܩܰܕܺܝܫܳܐ ܗ̱ܝ ܘܠܰܝܬ ܕܪܰܒ ܐܰܝܟ ܐܰܠܳܗܰܢ.
14 ܐܰܢ̱ܬ ܗܽܘ ܐܰܠܳܗܳܐ ܕܰܥܒܰܕܬ ܬܶܕܡܖ̈ܳܬܳܐ. ܘܚܰܘܺܝܬ ܒܥܰܡ̈ܡܶܐ ܥܽܘܫܢܳܟ.
15 ܘܰܦܪܰܩܬ ܒܰܕܪܳܥܳܟ ܠܥܰܡܳܟ. ܠܰܒ̈ܢܰܝ ܝܰܥܩܽܘܒ ܘܝܰܘܣܶܦ.
16 ܚܙܰܐܟ ܡܰܝ̈ܳܐ ܐܰܠܳܗܳܐ. ܚܙܰܐܟ ܡܰܝ̈ܳܐ ܘܰܕܚܶܠܘ. ܐܳܦ ܬܗܽܘ̈ܡܶܐ ܙܳܥܘ.
17 ܘܰܥܢܳܢ̈ܶܐ ܖ̈ܙܰܦܝ ܡܰܝ̈ܳܐ. ܝܰܗܒܘ ܩܳܠܳܐ ܫܡܰܝ̈ ܫܡܰܝܳܐ. ܐܳܦ ܓܶܐܖ̈ܰܝܟ ܦܳܖ̈ܚܺܝܢ.
18 ܘܩܳܠܳܐ ܕܖ̈ܰܥܡܰܝܟ ܒܓܺܝܓ̈ܠܶܐ. ܐܰܢܗܰܪܘ ܒܰܖ̈ܩܰܝܟ ܠܬܺܒܶܝܠ. ܐܶܬܕܰܠܚܰܬ ܘܙܳܥܰܬ ܐܰܪܥܳܐ.
19 ܒܝܰܡܳܐ ܐܽܘܪܚܳܟ ܘܰܫܒܺܝ̈ܠܰܝܟ ܒܡܰܝ̈ܳܐ ܣܰܓܺܝ̈ܐܶܐ. ܘܥܶܩ̈ܒܳܬܳܟ ܠܳܐ ܐܶܬܺܝ̈ܕܰܥܝ̱.
20 ܕܰܒܰܪܬ ܠܥܰܡܳܟ ܐܰܝܟ ܥܳܢ̈ܳܐ. ܒܺܐܝܕܳܐ ܕܡܽܘܫܶܐ ܘܕܰܐܗܪܽܘܢ.