Psalms 89
The Book of Psalms
܀ ܡܙܡܘܪܐ ܦܛ ܀
ܐܰܡܺܝܪ ܡܶܢ ܦܰܪܨܽܘܦ ܥܰܡܳܐ ܕܰܒܒܳܒܶܠ ܐܰܝܟ ܡܰܢ ܕܰܡܥܰܗܕܺܝܢ ܠܰܐܠܳܗܳܐ ܫܽܘܘܕܳܝܰܘ̈ܗܝ ܕܰܠܘܳܬ ܕܰܘܺܝܕ ܕܥܰܠ ܥܰܡܳܐ ܘܥܰܠ ܡܰܠ̈ܟܶܐ ܕܡܶܢܶܗ ܡܰܛܢܺܝܢ ܠܶܗ ܘܫܳܐܠܺܝܢ ܡܶܢܶܗ ܕܡܶܛܽܠ ܗܳܕܶܐ ܢܶܬܒܰܣܡܽܘܢ ܒܛܳܒ̈ܳܬܳܐ ܕܫܳܘܶܝܢ ܠܡܽܘܠܟܳܢܰܘ̈ܗܝ ܡܠܺܝ̈ܟܶܐ ܘܫܰܪܺܝܖ̈ܶܐ
1 ܛܰܝܒܽܘܬܶܗ ܕܡܳܪܝܳܐ ܠܥܳܠܰܡ ܐܶܙܡܰܪ. ܘܰܠܕܳܪܕܳܖ̈ܺܝܢ ܐܰܘܕܰܥ ܗܰܝܡܳܢܽܘܬܶܗ ܒܦܽܘܡܝ̱.
2 ܡܶܛܽܠ ܕܶܐܡܰܪܬ ܕܥܳܠܡܳܐ ܒܛܰܝܒܽܘܬܳܐ ܢܶܬܒܢܶܐ. ܘܰܫܡܰܝܳܐ ܬܰܬܩܶܢ ܗܰܝܡܳܢܽܘܬܳܟ.
3 ܩܝܳܡܳܐ ܐܰܩܺܝܡܶܬ ܠܓܰܒܺܝܝ̱ ܘܺܝܡܺܝܬ ܠܕܰܘܺܝܕ ܥܰܒܕܝ̱.
4 ܕܰܥܕܰܡܳܐ ܠܥܳܠܰܡ ܐܰܬܩܶܢ ܙܰܪܥܳܟ ܘܶܐܒܢܶܐ ܠܕܳܪܕܳܖ̈ܺܝܢ ܟܽܘܪܣܝܳܟ.
5 ܢܰܘܕܽܘܢ ܫܡܰܝ̈ܳܐ ܬܶܕܡܖ̈ܳܬܳܟ ܡܳܪܝܳܐ ܘܗܰܝܡܳܢܽܘܬܳܟ ܒܥܺܕܬܳܐ ܕܩܰܕܺܝ̈ܫܶܐ.
6 ܡܰܢܽܘ ܕܦܳܚܶܡ ܠܡܳܪܝܳܐ ܒܰܫܡܰܝ̈ ܫܡܰܝܳܐ. ܘܰܕܕܳܡܶܐ ܠܡܳܪܝܳܐ ܒܰܒ̈ܢܰܝ ܡܰܠܰܐܟ̈ܶܐ.
7 ܐܰܠܳܗܳܐ ܩܳܡ ܒܥܺܕܬܳܐ ܕܩܰܕܺܝ̈ܫܶܐ ܪܰܒ ܘܰܕܚܺܝܠ ܥܰܠ ܟܽܠܗܽܘܢ ܕܰܚܕܳܖ̈ܰܘܗ̱ܝ.
8 ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ. ܡܰܢܽܘ ܐܰܟܘܳܬܳܟ ܥܰܫܺܝܢܳܐ ܘܗܰܝܡܳܢܽܘܬܳܟ ܚܕܳܖ̈ܰܝܟ.
9 ܐܰܢ̱ܬ ܫܰܠܺܝܛ ܐܰܢ̱ܬ ܒܓܰܐܝܽܘܬܶܗ ܕܝܰܡܳܐ. ܘܰܕܠܽܘܚܝܳܐ ܕܓܰܠܠܰܘ̈ܗܝ ܐܰܢ̱ܬ ܡܫܰܬܶܩ.
10 ܐܰܢ̱ܬ ܡܡܰܟܶܟ ܐܰܢ̱ܬ ܠܫܰܒܰܗܖ̈ܳܢܶܐ ܐܰܝܟ ܕܠܰܩܛܺܝ̈ܠܶܐ. ܒܰܕܪܳܥܳܟ ܥܰܫܺܝܢܳܐ ܒܰܕܰܪܬ ܠܰܒܥܶܠܕ̈ܒܳܒܰܝܟ.
11 ܕܺܝܠܳܟ ܐܶܢܽܘܢ ܫܡܰܝ̈ܳܐ ܘܕܺܝܠܳܟ ܗܺܝ ܐܰܪܥܳܐ. ܬܺܒܶܝܠ ܒܰܡܠܳܐܳܗ̇ ܐܰܢ̱ܬ ܬܰܩܶܢܬ.
12 ܠܓܰܪܒܝܳܐ ܘܰܠܬܰܝܡܢܳܐ ܐܰܢ̱ܬ ܒܪܰܝܬ. ܬܳܒܽܘܪ ܘܚܶܪܡܽܘܢ ܠܰܫܡܳܟ ܗܽܘ ܡܫܰܒܚܺܝܢ.
13 ܕܺܝܠܳܟ ܗܽܘ ܕܪܳܥܳܐ ܘܕܺܝܠܳܟ ܗܺܝ ܓܰܢ̱ܒܳܪܽܘܬܳܐ. ܬܶܥܫܰܢ ܐܺܝܕܳܟ ܘܬܶܬܪܺܝܡ ܝܰܡܺܝܢܳܟ.
14 ܒܙܰܕܺܝܩܽܘܬܳܐ ܘܰܒܕܺܝܢܳܐ ܡܰܬܩܰܢ ܟܽܘܪܣܝܳܟ. ܘܛܰܝܒܽܘܬܳܐ ܘܰܒܩܽܘܫܬܳܐ ܡܩܰܕܡܺܝܢ ܐܰܦܰܝ̈ܟ.
15 ܛܽܘܒܰܘܗ̱ܝ ܠܥܰܡܳܐ ܕܝܳܕܰܥ ܬܶܫܒ̈ܚܳܬܳܟ. ܡܳܪܝܳܐ ܒܢܽܘܗܪܳܐ ܕܰܐܦܰܝ̈ܟ ܢܗܰܠܟܽܘܢ.
16 ܘܒܰܫܡܳܟ ܢܕܽܘܨܽܘܢ ܟܽܠܝܽܘܡ. ܘܰܒܙܰܕܺܝܩܽܘܬܳܟ ܢܶܬܬܪܺܝܡܽܘܢ.
17 ܡܶܛܽܠ ܕܬܶܫܒܽܘܚܬܳܐ ܕܥܽܘܫܢܰܢ ܐܰܢ̱ܬ ܗܽܘ ܘܰܒܨܶܒܝܳܢܳܟ ܬܶܬܪܺܝܡ ܩܰܪܢܰܢ.
18 ܡܶܛܽܠ ܕܡܳܪܝܰܐ ܗ̱ܘ ܬܽܘܟܠܳܢܰܢ ܘܩܰܕܺܝܫܳܐ ܕܺܝܣܪܳܐܶܝܠ ܡܰܠܟܰܢ.
19 ܗܳܝܕܶܝܢ ܡܰܠܶܠ ܒܚܶܙܘܳܢ̈ܶܐ ܥܰܡ ܙܰܕܺܝ̈ܩܰܘܗ̱ܝ ܘܶܐܡܰܪ ܕܣܳܡܶܬ ܥܽܘܕܪܳܢܳܐ ܠܓܰܒܪܳܐ. ܘܰܐܪܺܝܡܶܬ ܓܰܒܝܳܐ ܡܶܢ ܥܰܡܳܐ.
20 ܘܶܐܫܟܚܶܬ ܠܕܰܘܺܝܕ ܥܰܒܕܝ̱. ܡܶܫܚܳܐ ܕܩܽܘܕܫܝ̱ ܡܫܰܚܬܶܗ.
21 ܐܺܝܕܝ̱ ܥܰܕܰܪܬܶܗ ܐܳܦ ܕܪܳܥܝ̱ ܚܰܝܠܶܗ.
22 ܘܠܳܐ ܐܰܗܢܺܝ ܡܶܕܶܡ ܒܥܶܠܕܒܳܒܶܗ ܘܰܒܪܶܗ ܕܥܰܘܳܠܳܐ ܠܳܐ ܡܰܟܟܶܗ.
23 ܐܰܘܒܶܕ ܡܶܢ ܩܕܳܡܰܘܗ̱ܝ ܠܰܒܥܶܠܕ̈ܒܳܒܰܘܗ̱ܝ ܘܰܠܣܳܢܰܐܘ̈ܗܝ̱ ܐܶܬܰܒܰܪ.
24 ܗܰܝܡܳܢܽܘܬܝ̱ ܘܛܰܝܒܽܘܬܝ̱ ܥܰܡܶܗ ܘܰܒܫܶܡܝ̱ ܬܶܬܪܺܝܡ ܩܰܪܢܶܗ.
25 ܐܶܣܺܝܡ ܐܺܝܕܶܗ ܒܝܰܡܳܐ ܘܰܒܢܰܗܖ̈ܰܘܳܬܳܐ ܝܰܡܺܝܢܶܗ.
26 ܗܽܘ ܢܶܩܪܶܝܢܝ̱ ܐܳܒܝ̱ ܐܰܢ̱ܬ ܐܰܠܳܗܝ ܘܦܳܪܽܘܩܝ̱ ܬܰܩܺܝܦܳܐ.
27 ܐܳܦ ܐܶܢܳܐ ܒܽܘܟܪܳܐ ܐܶܥܒܕܺܝܘܗ̱ܝ. ܘܰܐܪܺܝܡܺܝܘܗ̱ܝ ܥܰܠ ܡܰܠܟ̈ܶܐ ܕܰܐܪܥܳܐ.
28 ܘܰܠܥܳܠܰܡ ܐܶܛܰܪ ܠܶܗ ܛܰܝܒܽܘܬܝ̱. ܘܰܩܝܳܡܝ̱ ܢܶܬܗܰܝܡܰܢ ܒܶܗ.
29 ܐܶܣܺܝܡ ܠܥܳܠܰܡ ܙܰܪܥܶܗ. ܘܟܽܘܪܣܝܶܗ ܐܰܝܟ ܝܰܘ̈ܡܳܬܳܐ ܕܰܫܡܰܝܳܐ.
30 ܐܶܢ ܢܶܫܒܩܽܘܢ ܒܢܰܘ̈ܗܝ̱ ܢܳܡܽܘܣܝ̱. ܘܰܒܦܽܘ̈ܩܕܳܢܰܝ ܠܳܐ ܢܗܰܠܟܽܘܢ.
31 (ܠܝܬ)
32 ܐܶܦܩܽܘܕ ܒܫܰܒܛܳܐ ܥܰܘܠܗܽܘܢ. ܘܒܰܡܚܽܘܬܳܐ ܚܛܳܗܰܝ̈ܗܽܘܢ.
33 ܘܛܰܝܒܽܘܬܝ̱ ܠܳܐ ܐܰܥܒܰܪ ܡܶܢܶܗ. ܘܠܳܐ ܐܶܕܰܓܶܠ ܒܗܰܝܡܳܢܽܘܬܝ̱. ܘܠܳܐ ܐܰܣܠܶܐ ܩܝܳܡܝ̱.
34 ܘܡܶܕܶܡ ܕܰܢܦܰܩ ܡܶܢ ܣܶܦ̈ܘܳܬܝ̱ ܠܳܐ ܐܶܫܰܚܠܶܦ.
35 ܚܕܳܐ ܝܺܡܺܝܬ ܒܩܽܘܕܫܝ̱ ܠܕܰܘܺܝܕ ܘܠܳܐ ܐܶܟܰܕܶܒ.
36 ܕܙܰܪܥܶܗ ܠܥܳܠܰܡ ܢܶܗܘܶܐ ܘܟܽܘܪܣܝܶܗ ܐܰܝܟ ܫܶܡܫܳܐ ܠܽܘܩܒܰܠܝ̱.
37 ܘܰܐܝܟ ܣܰܗܪܳܐ ܢܶܬܩܰܢ ܠܥܳܠܰܡ. ܣܳܗܕܳܐ ܒܰܫܡܰܝܳܐ ܡܗܰܝܡܰܢ.
38 ܘܰܐܢ̱ܬ ܛܥܰܝܬܳܢܝ̱ ܘܰܐܣܠܺܝܬܳܢܝ̱ ܘܰܐܗܦܶܟܬ ܐܰܦܰܘ̈ܗܝ̱ ܕܰܡܫܺܝܚܳܟ.
39 ܘܰܐܣܠܺܝܬ ܩܝܳܡܶܗ ܕܥܰܒܕܳܟ ܘܰܐܪܡܺܝܬ ܒܰܐܪܥܳܐ ܟܠܺܝܠܶܗ.
40 ܗܓܰܡܬ ܣܝܳܓܰܘ̈ܗܝ̱ ܘܣܰܚܶܦܬ ܚܶܣܢܰܘ̈ܗܝ̱.
41 ܘܕܳܫܽܘܗ̱ܝ ܟܽܠ ܥܳܒܖ̈ܰܝ ܐܽܘܪܚܳܐ. ܘܰܗܘܳܐ ܚܶܣܕܳܐ ܠܰܫܒܳܒܰܘ̈ܗܝ̱.
42 ܘܰܐܪܺܝܡܬ ܝܰܡܺܝܢܳܐ ܕܰܒܥܶܠܕ̈ܒܳܒܰܘܗ̱ܝ ܘܚܰܕܺܝܬ ܠܟܽܠܗܽܘܢ ܣܳܢܰܐܘ̈ܗܝ̱.
43 ܘܰܐܗܦܶܟܬ ܥܽܘܕܪܳܢܳܐ ܕܣܰܦܣܺܪܶܗ. ܘܠܳܐ ܣܰܝܰܥܬܳܝܗܝ̱ ܒܰܩܪܳܒܳܐ.
44 ܘܒܰܛܶܠܬ ܡܙܰܟܝܳܢܰܘ̈ܗܝ̱ ܘܟܽܘܪܣܝܶܗ ܠܰܐܪܥܳܐ ܣܚܰܦܬ.
45 ܘܒܰܨܰܪܬ ܝܰܘ̈ܡܳܬܳܐ ܕܛܰܠܝܽܘܬܶܗ ܘܰܐܥܛܶܦܬܳܝܗܝ̱ ܒܶܗܬܬܳܐ.
46 ܥܕܰܡܳܐ ܠܶܐܡܰܬܝ̱ ܪܳܓܶܙ ܐܰܢ̱ܬ ܡܳܪܝܳܐ ܠܥܳܠܰܡ. ܘܝܳܩܶܕ ܐܰܝܟ ܢܽܘܪܳܐ ܪܽܘܓܙܳܟ.
47 ܐܶܬܕܰܟܪܰܝܢܝ̱ ܡܶܢ ܚܶܦܪܳܐ. ܡܶܛܽܠ ܕܠܳܐ ܗܘܳܐ ܣܪܺܝܩܳܐܺܝܬ ܒܪܰܝܬ ܠܟܽܠܗܽܘܢ ܒܢܰܝ̈ܢܳܫܳܐ.
48 ܡܰܢܽܘ ܓܰܒܪܳܐ ܕܢܺܚܶܐ ܘܠܳܐ ܢܶܚܙܶܐ ܡܰܘܬܳܐ. ܘܰܢܦܰܨܶܐ ܢܰܦܫܶܗ ܡܶܢ ܐܺܝܕܳܐ ܕܰܫܝܽܘܠ.
49 ܐܰܝܟܳܐ ܐܶܢܶܝܢ ܛܰܝܒ̈ܘܳܬܳܟ ܡܳܪܝܳܐ ܩܰܕܡܳܝ̈ܳܬܳܐ. ܕܺܝܡܰܝܬ ܠܕܰܘܺܝܕ ܒܗܰܝܡܳܢܽܘܬܳܐ.
50 ܐܶܬܕܰܟܪ ܡܳܪܝܳܐ ܚܶܣܕܶܗ ܕܥܰܒܕܳܟ. ܕܫܶܩܠܶܬ ܒܚܰܝܰܝ̈ ܟܽܠܶܗ ܪܶܢܺܝܗܽܘܢ ܕܥܰܡ̈ܡܶܐ.
51 ܚܰܣܕܽܘܢܝ ܒܥܶܠܕ̈ܒܳܒܰܝܟ ܡܳܪܝܳܐ. ܘܚܰܣܶܕܘ ܥܶܩ̈ܒܰܘܗ̱ܝ ܕܰܡܫܺܝܚܳܟ.
52 ܒܪܺܝܟ ܗܽܘ ܡܳܪܝܳܐ ܠܥܳܠܰܡ ܐܰܡܺܝܢ ܘܰܐܡܺܝܢ.