Psalms 30
The Book of Psalms
܀ ܡܙܡܘܪܐ ܠ ܀
ܬܰܘܕܺܝܬܶܗ ܕܚܶܙܰܩܝܳܐ ܥܰܠ ܐܰܦܰܝ̈ ܦܽܘܪܩܳܢܶܗ
1 ܐܶܪܰܡܪܡܳܟ ܡܳܪܝܳܐ ܕܰܐܪܺܝܡܬܳܢܝ̱. ܘܠܳܐ ܚܰܕܺܝܬ ܒܺܝ ܠܰܒܥܶܠܕ̈ܒܳܒܰܝ.
2 ܡܳܪܝܳܐ ܐܰܠܳܗܝ ܒܥܺܝܬ ܡܶܢܳܟ ܘܰܐܣܺܝܬܳܢܝ̱.
3 ܘܰܐܣܶܩܬ ܡܶܢ ܫܝܽܘܠ ܠܢܰܦܫܝ̱. ܘܰܐܚܺܝܬܳܢܝ̱ ܡܶܢ ܢܳܚ̈ܬܰܝ ܓܽܘܒܳܐ.
4 ܙܡܰܪܘ ܠܡܳܪܝܳܐ ܓܒܰܘ̈ܗܝ̱. ܘܰܐܘܕܰܘ ܠܕܽܘܟܪܳܢܳܐ ܕܩܽܘܕܫܶܗ.
5 ܡܶܛܽܠ ܕܰܟܐܳܬܳܐ ܒܪܽܘܓܙܶܗ ܘܚܰܝ̈ܶܐ ܒܨܶܒܝܳܢܶܗ. ܒܪܰܡܫܳܐ ܬܒܽܘܬ ܒܟܳܬܳܐ ܘܰܒܨܰܦܪܳܐ ܚܰܕܽܘܬܳܐ.
6 ܐܶܢܳܐ ܐܶܡܪܶܬ ܒܫܰܠܝܽܘܬܝ̱ ܕܠܳܐ ܐܶܙܽܘܥ ܠܥܳܠܰܡ.
7 ܐܰܠܳܗܳܐ ܒܨܶܒܝܳܢܳܟ ܐܰܩܺܝܡܬ ܥܰܠ ܫܽܘܒܚܝ̱ ܚܰܝܠܳܐ. ܘܰܐܗܦܶܟܬ ܐܰܦܰܝ̈ܟ ܘܙܳܥܶܬ.
8 ܘܰܩܪܺܝܬܳܟ ܡܳܪܝܳܐ ܘܡܶܢܳܟ ܡܳܪܝ ܒܥܺܝܬ.
9 ܡܳܢܳܐ ܝܽܘܬܪܳܢܳܐ ܐܺܝܬ ܒܕܶܡܝ̱ ܕܶܐܚܽܘܬ ܠܰܚܒܳܠܳܐ. ܠܳܐ ܡܰܘܕܶܐ ܠܳܟ ܥܰܦܪܳܐ. ܘܠܳܐ ܡܚܰܘܶܐ ܗܰܝܡܳܢܽܘܬܳܟ.
10 ܫܡܰܥ ܐܰܠܳܗܳܐ ܘܪܰܚܶܡ ܥܠܰܝ. ܡܳܪܝܳܐ ܗܘܺܝ ܠܺܝ ܥܳܕܽܘܪܳܐ.
11 ܕܰܐܗܦܶܟܬ ܡܰܖ̈ܩܕܳܬܝ̱ ܠܚܰܕܽܘܬܳܐ. ܫܪܰܝܬ ܣܰܩܝ̱ ܘܰܐܟܒܶܢܬܳܢܝ̱ ܚܰܕܽܘܬܳܐ.
12 ܡܶܛܽܠ ܗܳܢܳܐ ܐܶܙܡܰܪ ܠܳܟ ܫܽܘܒܚܳܐ ܘܠܳܐ ܐܶܫܬܽܘܩ. ܡܳܪܝܳܐ ܐܰܠܳܗܝ ܠܥܳܠܰܡ ܐܰܘܕܶܐ ܠܳܟ.