Psalms 9
The Book of Psalms
܀ ܡܙܡܘܪܐ ܛ ܀
ܬܰܘܕܺܝܬܶܗ ܕܕܰܘܺܝܕ ܕܥܰܠ ܐܰܦܰܝ̈ ܙܳܟܽܘܬܶܗ ܕܥܰܡܳܐ
1 ܐܰܘܕܶܐ ܠܡܳܪܝܳܐ ܡܶܢ ܟܽܠܶܗ ܠܶܒܝ̱. ܘܶܐܫܬܰܥܶܐ ܟܽܠܗܶܝܢ ܬܶܕܡܖ̈ܳܬܳܟ.
2 ܐܶܚܕܶܐ ܘܶܐܪܘܰܙ ܒܳܟ. ܘܶܐܙܡܰܪ ܠܰܫܡܳܟ ܡܪܰܝܡܳܐ.
3 ܟܰܕ ܢܶܗܦܟܽܘܢ ܒܥܶܠܕ̈ܒܳܒܰܝ ܠܒܶܣܬܰܪܗܽܘܢ. ܘܢܶܬܬܰܩܠܽܘܢ ܘܢܺܐܒܕܽܘܢ ܡܶܢ ܩܕܳܡܰܝܟ.
4 ܡܶܛܽܠ ܕܰܥܒܰܕܬ ܦܽܘܪܥܳܢܝ̱ ܘܕܺܝܢܝ̱. ܘܺܝܬܶܒܬ ܥܰܠ ܟܽܘܪܣܝܳܐ ܕܰܝܳܢܳܐ ܙܰܕܺܝܩܳܐ.
5 ܟܐܰܝܬ ܒܥܰܡ̈ܡܶܐ ܘܰܐܘܒܶܕܬ ܠܖ̈ܰܫܺܝܥܶܐ. ܘܰܫܡܳܗܰܝ̈ܗܽܘܢ ܥܛܰܝܬ ܠܥܳܠܰܡ ܥܳܠܡܺܝܢ.
6 ܒܥܶܠܕ̈ܒܳܒܰܝ ܓܡܰܪܘ ܒܣܰܝܦܳܐ ܠܥܳܠܰܡ. ܩܽܘܖ̈ܝܳܐ ܥܩܰܪܬ ܘܰܐܘܒܶܕܬ ܕܽܘܟܪܳܢܗܶܝܢ.
7 ܘܡܳܪܝܳܐ ܠܥܳܠܰܡ ܩܰܝܳܡ. ܘܡܰܬܩܰܢ ܟܽܘܪܣܝܶܗ ܠܕܺܝܢܳܐ.
8 ܕܰܢܕܽܘܢ ܬܺܒܶܝܠ ܒܩܽܘܫܬܳܐ. ܘܰܠܥܰܡ̈ܡܶܐ ܒܰܬܪܺܝܨܽܘܬܳܐ.
9 ܢܶܗܘܶܐ ܡܳܪܝܳܐ ܒܶܝܬ ܓܰܘܣܳܐ ܠܡܶܣ̈ܟܺܢܶܐ. ܘܰܡܥܰܕܪܳܢܗܽܘܢ ܒܙܰܒ̈ܢܶܐ ܕܽܐܘܠܨܳܢܳܐ.
10 ܘܰܢܣܰܒܪܽܘܢ ܒܳܟ ܟܽܠ ܝܳܕ̈ܥܰܝ ܫܡܳܟ. ܡܶܛܽܠ ܕܠܳܐ ܫܳܒܶܩ ܐܰܢ̱ܬ ܠܰܐܝܠܶܝܢ ܕܒܳܥܶܝܢ ܠܳܟ ܡܳܪܝܳܐ.
11 ܙܡܰܪܘ ܠܡܳܪܝܳܐ ܕܥܳܡܰܪ ܒܨܶܗܝܽܘܢ. ܘܚܰܘܰܘ ܒܥܰܡ̈ܡܶܐ ܨܶܢ̈ܥܳ̈ܬܶܗ.
12 ܡܶܛܽܠ ܕܶܐܬܕܟܰܪ ܠܡܶܬܒܰܥ ܕܶܡܗܽܘܢ. ܘܠܳܐ ܛܳܥܶܐ ܓܥܳܬܶܗ ܕܡܶܣܟܺܢܳܐ.
13 ܪܰܚܶܡ ܥܠܰܝ ܡܳܪܝܳܐ. ܘܰܚܙܺܝ ܫܽܘܥܒܳܕܝ ܕܡܶܢ ܣܳܢ̈ܰܐܝ. ܡܪܰܡܪܡܳܢܝ̱ ܡܶܢ ܬܰܖ̈ܥܰܘܗ̱ܝ ܕܡܰܘܬܳܐ.
14 ܡܶܛܽܠ ܕܶܐܫܬܰܥܶܐ ܟܽܠܗܶܝܢ ܬܶܕܡܖ̈ܳܬܳܟ. ܒܬܰܖ̈ܥܶܝܗ̇ ܕܒܰܪܬ ܨܶܗܝܽܘܢ. ܐܶܕܽܘܨ ܒܦܽܘܪܩܳܢܳܟ.
15 ܛܒܰܥܘ ܥܰܡ̈ܡܶܐ ܒܓܽܘܡܳܨܳܐ ܕܰܥܒܰܕܘ. ܘܒܰܡܨܺܝܕܬܳܐ ܕܰܛܡܰܪܘ ܐܶܬܬܰܚܕܰܬ ܪܶܓܠܗܽܘܢ.
16 ܡܰܘܕܰܥ ܡܳܪܝܳܐ ܕܺܝܢܳܐ ܕܥܳܒܶܕ. ܘܒܰܥܒܳܕ ܐܺܝ̈ܕܰܘܗ̱ܝ ܡܶܬܬܚܶܕ ܪܰܫܺܝܥܳܐ.
17 ܢܶܗܦܟܽܘܢ ܖ̈ܰܫܺܝܥܶܐ ܠܰܫܝܽܘܠ. ܘܟܽܠܗܽܘܢ ܥܰܡ̈ܡܶܐ ܕܛܳܥܶܝܢ ܠܰܐܠܳܗܳܐ.
18 ܡܶܛܽܠ ܕܠܳܐ ܠܥܳܠܰܡ ܡܶܬܛܥܶܐ ܡܶܣܟܺܢܳܐ. ܘܣܰܒܪܳܐ ܕܡܶܣ̈ܟܺܢܶܐ ܠܳܐ ܬܰܘܒܶܕ ܠܥܳܠܰܡ.
19 ܩܽܘܡ ܡܳܪܝܳܐ ܘܠܳܐ ܢܶܬܥܰܫܰܢ ܒܰܪܢܳܫܳܐ. ܘܢܶܬܬܕܺܝܢܽܘܢ ܥܰܡ̈ܡܶܐ ܩܕܳܡ ܐܰܦܰܝ̈ܟ.
20 ܐܰܩܺܝܡ ܠܗܽܘܢ ܣܳܐܶܡ ܢܳܡܽܘܣܳܐ. ܕܢܶܕܥܽܘܢ ܥܰܡ̈ܡܶܐ ܕܰܒܢܰܝ̈ܢܳܫܳܐ ܐܶܢܽܘܢ.