Psalms 97
The Book of Psalms
܀ ܡܙܡܘܪܐ ܨܙ ܀
ܡܒܰܕܶܩ ܥܰܠ ܦܽܘܢܳܝܶܗ ܕܥܰܡܳܐ ܟܰܕ ܡܪܰܟܶܒ ܙܡܺܝܪܬܳܐ ܕܙܳܟܽܘܬܳܐ ܘܥܳܒܶܕ ܐܶܣܟܺܡܳܐ ܠܬܽܘܩܳܢܶܗ ܕܰܐܠܳܗܳܐ ܘܠܰܩܝܳܡܬܳܐ ܓܰܘܳܢܳܝܬܳܐ
ܥܰܠ ܦܽܘܢܳܝܶܗ ܕܥܰܡܳܐ ܕܡܶܢ ܒܳܒܶܠ ܡܶܬܢܰܒܶܐ ܒܰܕܡܽܘܬ ܬܶܫܒܽܘܚܬܳܐ ܘܬܰܘܕܺܝܬܳܐ
1 ܡܳܪܝܳܐ ܐܰܡܠܶܟ ܬܕܽܘܨ ܐܰܪܥܳܐ ܘܢܶܚܕ̈ܝܳܢ ܓܳܙܖ̈ܳܬܳܐ ܣܰܓܺܝ̈ܐܳܬܳܐ.
2 ܥܢ̈ܳܢܶܐ ܘܥܰܖ̈ܦܶܠܶܐ ܚܕܳܖ̈ܰܘܗ̱ܝ. ܒܙܰܕܺܝܩܽܘܬܳܐ ܘܰܒܕܺܝܢܳܐ ܡܰܬܩܰܢ ܟܽܘܪܣܝܶܗ.
3 ܢܽܘܪܳܐ ܬܶܐܟܽܘܠ ܩܕܳܡܰܘܗ̱ܝ ܘܬܰܘܩܶܕ ܠܰܒܥܶܠܕ̈ܒܳܒܰܘܗ̱ܝ.
4 ܐܰܢܗܰܪܘ ܒܰܖ̈ܩܰܘܗ̱ܝ ܠܬܺܒܶܝܠ. ܚܙܳܬ ܘܶܐܬܕܰܠܚܰܬ ܐܰܪܥܳܐ.
5 ܘܛܽܘܖ̈ܶܐ ܐܰܝܟ ܫܥܽܘܬܳܐ ܐܶܬܦܰܫܰܪܘ ܡܶܢ ܩܕܳܡ ܡܳܪܝܳܐ ܡܳܪܳܐ ܕܟܽܠܳܗ̇ ܐܰܪܥܳܐ.
6 ܚܰܘܺܝܘ ܫܡܰܝ̈ܳܐ ܙܰܕܺܝܩܽܘܬܶܗ ܘܰܚܙܰܘ ܟܽܠܗܽܘܢ ܥܰܡ̈ܡܶܐ ܐܺܝܩܳܪܶܗ.
7 ܢܶܒܗܬܽܘܢ ܟܽܠ ܕܥܳܒܕܺܝܢ ܦܬܰܟܖ̈ܶܐ ܘܡܶܫܬܰܒܗܪܺܝܢ ܒܰܓܠܺܝ̈ܦܶܐ. ܣܓܽܘܕܘ ܠܶܗ ܟܽܠܗܽܘܢ ܡܰܠܰܐܟܰܘ̈ܗܝ̱.
8 ܬܶܫܡܰܥ ܘܬܶܚܕܶܐ ܨܶܗܝܽܘܢ ܘܰܢܕܽܘ̈ܨܳܢ ܒܢ̈ܳܬ ܝܺܗܽܘܕܳܐ ܡܶܛܽܠ ܕܺܝܢܰܝ̈ܟ ܡܳܪܝܳܐ.
9 ܡܶܛܽܠ ܕܰܐܢ̱ܬ ܗܽܘ ܡܳܪܝܳܐ ܡܪܰܝܡܳܐ ܥܰܠ ܟܽܠܳܗ̇ ܐܰܪܥܳܐ. ܘܛܳܒ ܐܶܬܬܪܺܝܡܬ ܥܰܠ ܟܽܠܗܽܘܢ ܐܰܠܳܗ̈ܶܐ.
10 ܖ̈ܳܚܡܰܘܗ̱ܝ ܕܡܳܪܝܳܐ ܣܳܢܶܝܢ ܠܒܺܝ̈ܫܳܬܳܐ. ܘܢܳܛܰܪ ܢܰܦ̈ܫܳܬܳܐ ܕܙܰܕܺܝܩܰܘ̈ܗܝ̱ ܘܡܶܢ ܐܺܝܕܳܐ ܕܖ̈ܰܫܺܝܥܶܐ ܢܦܰܨܶܐ ܐܶܢܽܘܢ.
11 ܢܽܘܗܪܳܐ ܕܰܕܢܰܚ ܠܙܰܕܺܝ̈ܩܶܐ ܘܠܰܬܖ̈ܺܝܨܰܝ ܠܶܒܳܐ ܚܰܕܽܘܬܳܐ.
12 ܚܕܰܘ ܙܰܕܺܝ̈ܩܶܐ ܒܡܳܪܝܳܐ ܘܰܐܘܕܰܘ ܠܕܽܘܟܪܳܢܳܐ ܕܩܽܘܕܫܶܗ.