Psalms 106
The Book of Psalms
܀ ܡܙܡܘܪܐ ܩܘ ܀
ܡܶܬܢܰܒܶܐ ܥܰܠ ܥܰܡܳܐ ܕܰܒܒܳܒܶܠ ܕܡܰܘܕܶܝܢ ܕܰܐܣܟܶܠܘ ܘܫܳܐܠܺܝܢ ܡܶܢ ܐܰܠܳܗܳܐ ܖ̈ܰܚܡܶܐ ܐܰܝܟ ܡܰܢ ܕܳܐܦ ܠܰܐܗܳܒܰܝ̈ܗܽܘܢ ܚܰܢ ܐܶܢܽܘܢ ܒܛܰܝܒܽܘܬܶܗ
1 ܐܰܘܕܰܘ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܛܰܝܒܽܘܬܶܗ.
2 ܡܰܢܽܘ ܢܶܫܬܰܥܶܐ ܬܶܕܡܖ̈ܳܬܶܗ ܕܡܳܪܝܳܐ ܘܢܶܫܡܰܥ ܟܽܠܗܶܝܢ ܬܶܫܒ̈ܚܳܬܶܗ.
3 ܛܽܘܒܰܝܗܽܘܢ ܠܰܐܝܠܶܝܢ ܕܢܳܛܪܺܝܢ ܕܺܝܢܰܘ̈ܗܝ̱ ܘܥܳܒܕܺܝܢ ܙܰܕܺܝܩܽܘܬܐ ܒܟܽܠܙܒܰܢ.
4 ܐܶܬܕܰܟܪܰܝܢ ܡܳܪܝܳܐ ܒܨܶܒܝܳܢܶܗ ܕܥܰܡܳܟ ܘܰܦܪܽܘܩܰܝܢܝ̱ ܒܦܽܘܪܩܳܢܳܟ.
5 ܕܶܢܚܙܶܐ ܒܛܳܒ̈ܳܬܳܐ ܕܰܓܒܰܝ̈ܟ. ܢܶܚܕܶܐ ܒܚܰܕܽܘܬܳܟ ܘܢܶܫܬܰܒܰܚ ܒܝܳܪܬܽܘܬܳܟ.
6 ܚܛܰܝܢ ܥܰܡ ܐܰܒܳܗܰܝ̈ܢ ܘܰܐܣܟܶܠܢ ܘܰܐܪܫܰܥܢ.
7 ܐܰܒܳܗܰܝ̈ܢ ܒܡܶܨܪܶܝܢ ܠܳܐ ܐܶܣܬܰܟܰܠܘ̱ ܬܶܕܡܖ̈ܳܬܳܟ ܘܠܳܐ ܐܶܬܕܟܰܪܘ ܣܽܘܓܳܐܐ ܕܛܰܝܒ̈ܘܳܬܳܟ ܘܕܶܐܬܚܪܺܝܘ ܥܰܠ ܡܰܝ̈ܳܐ ܒܝܰܡܳܐ ܕܣܽܘܦ.
8 ܘܰܦܪܰܩ ܐܶܢܽܘܢ ܡܶܛܽܠ ܫܡܶܗ ܕܰܢܚܰܘܶܐ ܓܰܢ̱ܒܳܪܽܘܬܶܗ.
9 ܘܰܟܐܳܐ ܒܝܰܡܳܐ ܕܣܽܘܦ ܘܺܝܒܶܫ ܘܗܰܠܶܟ ܐܶܢܽܘܢ ܒܰܬܗܽܘܡܳܐ ܐܰܝܟ ܕܰܒܡܰܕܒܪܳܐ.
10 ܘܰܦܪܰܩ ܐܶܢܽܘܢ ܡܶܢ ܐܺܝܕܳܐ ܕܰܒܥܶܠܕܒܳܒܳܐ ܘܦܰܨܺܝ ܐܶܢܽܘܢ ܡܶܢ ܐܺܝܕܳܐ ܕܳܐܠܽܘܨܳܐ.
11 ܘܟܰܣܺܝܘ̱ ܡܰܝ̈ܳܐ ܠܳܐܠܽܘܨܰܝ̈ܗܽܘܢ ܘܚܰܕ ܡܶܢܗܽܘܢ ܠܳܐ ܐܶܫܬܚܰܪ.
12 ܗܰܝܡܶܢܘ̱ ܒܡܶܠܰܘ̈ܗܝ̱ ܘܫܰܒܰܚܘ̱ ܬܶܫܒ̈ܚܳܬܶܗ.
13 ܐܶܣܬܰܪܗܰܒܘ̱ ܘܰܛܥܰܘ ܠܰܐܠܳܗܳܐ. ܘܠܳܐ ܣܰܒܰܪܘ ܠܬܰܪܥܺܝܬܶܗ.
14 ܪܰܓܘ ܪܶܓܬܳܐ ܒܡܰܕܒܪܳܐ. ܘܢܰܣܺܝܘ ܠܰܐܠܳܗܳܐ ܒܰܐܫܺܝܡܽܘܢ.
15 ܝܰܗܒ ܠܗܽܘܢ ܫܶܐܠܳ̈ܬܗܽܘܢ. ܘܫܰܕܰܪ ܣܰܒܥܳܐ ܠܢܰܦ̈ܫܳܬܗܽܘܢ.
16 ܛܰܢܘ̱ ܒܡܽܘܫܶܐ ܒܡܰܫܪܺܝܬܳܐ. ܘܒܰܐܗܪܽܘܢ ܩܰܕܺܝܫܶܗ ܕܡܳܪܝܳܐ.
17 ܐܶܬܦܰܬܚܰܬ ܐܰܪܥܳܐ ܘܒܶܠܥܰܬ ܠܕܳܬܳܢ. ܘܟܰܣܝܰܬ ܥܰܠ ܟܢܽܘܫܬܶܗ ܕܰܐܒܺܝܪܰܡ.
18 ܚܶܒܰܬ ܢܽܘܪܳܐ ܒܰܟܢܽܘ̈ܫܳܬܗܽܘܢ. ܘܫܰܠܗܶܒܺܝܬܳܐ ܐܰܘܩܕܰܬ ܠܥܰܘ̈ܳܠܶܐ.
19 ܥܒܰܕܘ ܥܶܓܠܳܐ ܒܚܽܘܪܺܝܒ ܘܰܣܓܶܕܘ ܠܰܢܣܺܝܟܳܐ.
20 ܘܚܰܠܶܦܘ ܐܺܝܩܳܪܗܽܘܢ ܒܰܕܡܽܘܬܳܐ ܕܬܰܘܪܳܐ ܕܳܐܟܶܠ ܥܶܣܒܳܐ.
21 ܘܰܛܥܰܘ ܠܰܐܠܳܗܳܐ ܕܰܦܪܰܩ ܐܶܢܽܘܢ. ܕܰܥܒܰܕ ܪܰܘܖ̈ܒܳܬܳܐ ܒܡܶܨܪܶܝܢ.
22 ܘܬܶܕܡܖ̈ܳܬܳܐ ܒܰܐܪܥܳܐ ܕܚܳܡ ܘܰܕܚܺܝ̈ܠܳܬܳܐ ܒܝܰܡܳܐ ܕܣܽܘܦ.
23 ܘܶܐܡܰܪ ܕܢܰܘܒܶܕ ܐܶܢܽܘܢ ܐܶܠܽܘܠܳܐ ܡܽܘܫܶܐ ܓܰܒܝܶܗ ܕܩܳܡ ܒܬܽܘܪܰܥܬܳܐ ܩܕܳܡܰܘܗ̱ܝ ܘܰܐܗܦܶܟ ܪܽܘܓܙܶܗ ܕܠܳܐ ܢܚܰܒܶܠ ܐܶܢܽܘܢ.
24 ܘܰܐܣܠܝܽܘܗ̇ ܠܰܐܪܥܳܐ ܕܪܶܓܬܳܐ ܘܠܳܐ ܗܰܝܡܶܢܘ̱ ܠܡܶܠܬܶܗ.
25 ܘܰܪܛܶܢܘ̱ ܒܡܰܫܟܢܰܝ̈ܗܽܘܢ ܘܠܳܐ ܫܡܰܥܘ̱ ܒܩܳܠܶܗ ܕܡܳܪܝܳܐ.
26 ܘܰܐܪܺܝܡ ܐܺܝܕܶܗ ܥܠܰܝܗܽܘܢ ܕܢܰܘܒܶܕ ܐܶܢܽܘܢ ܒܥܰܡ̈ܡܶܐ.
27 ܘܰܢܒܰܕܰܪ ܙܰܪܥܗܽܘܢ ܒܥܰܡ̈ܡܶܐ. ܘܢܰܘܒܶܕ ܐܶܢܽܘܢ ܒܰܐܖ̈ܥܳܬܳܐ.
28 ܥܰܠ ܕܶܐܬܢܰܩܰܦܘ ܠܰܦܬܰܟܖ̈ܶܐ ܕܰܦܥܽܘܪ ܘܶܐܟܰܠܘ̱ ܕܶܒܚ̈ܶܐ ܕܡܺܝ̈ܬܶܐ.
29 ܘܰܐܪܓܙܽܘܗ̱ܝ ܒܰܥܒܳܕܰܝ̈ܗܽܘܢ ܘܒܰܦܬܰܟܖ̈ܰܝܗܽܘܢ ܐܰܛܢܽܘܗ̱ܝ ܘܰܐܥܫܶܢ ܥܠܰܝܗܽܘܢ ܡܰܘܬܳܢܳܐ ܡܶܢ ܫܶܠܝܳܐ.
30 ܩܳܡ ܦܺܝܢܚܶܣ ܘܨܰܠܺܝ ܘܶܐܬܟܠܺܝ ܡܰܘܬܳܢܳܐ.
31 ܘܶܐܬܚܰܫܒܰܬ ܠܶܗ ܙܳܟܽܘܬܳܐ ܠܕܳܪܕܳܖ̈ܺܝܢ ܘܰܥܕܰܡܳܐ ܠܥܳܠܰܡ.
32 ܘܰܐܪܓܙܽܘܗ̱ܝ ܥܰܠ ܡܰܝ̈ܳܐ ܕܚܶܪܝܳܢܳܐ ܘܰܐܒܐܶܫ ܠܡܽܘܫܶܐ ܡܶܛܽܠܬܗܽܘܢ.
33 ܡܶܛܽܠ ܕܡܰܪܡܰܪܘ ܪܽܘܚܶܗ ܘܡܰܠܶܠ ܒܣܶܦ̈ܘܳܬܶܗ.
34 ܘܠܳܐ ܐܰܘܒܶܕܘ ܠܥܰܡ̈ܡܶܐ ܕܶܐܡܰܪ ܠܗܽܘܢ ܡܳܪܝܳܐ.
35 ܐܶܠܳܐ ܐܶܬܚܰܠܰܛܘ ܒܥܰܡ̈ܡܶܐ ܘܺܝܠܶܦܘ ܥܒܳܕܰܝ̈ܗܽܘܢ.
36 ܘܰܕܚܶܠܘ ܠܰܦܬܰܟܖ̈ܰܝܗܽܘܢ ܘܰܗܘܰܘ ܠܗܽܘܢ ܠܬܽܘܩܰܠܬܳܐ.
37 ܕܰܒܰܚܘ ܒܢܰܝ̈ܗܽܘܢ ܘܰܒ̈ܢܳܬܗܽܘܢ ܠܫܺܐܕ̈ܶܐ.
38 ܘܶܐܫܰܕܘ ܕܡܳܐ ܙܰܟܳܝܳܐ ܕܡܳܐ ܕܰܒܢܰܝ̈ܗܽܘܢ ܘܕܰܒ̈ܢܳܬܗܽܘܢ ܕܰܒܰܚܘ ܠܰܦܬܰܟܖ̈ܶܐ ܕܰܟܢܰܥܢ ܘܶܐܬܛܰܢܦܰܬ ܐܰܪܥܳܐ ܒܰܕܡܳܐ.
39 ܘܶܐܬܛܰܢܰܦܘ ܒܰܥܒܳܕܰܝ̈ܗܽܘܢ ܘܙܰܢܺܝܘ ܒܨܶܢ̈ܥܳܬܗܽܘܢ.
40 ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܥܰܡܶܗ ܘܰܐܣܠܺܝ ܠܝܳܪܬܽܘܬܶܗ.
41 ܘܰܐܫܠܶܡ ܐܶܢܽܘܢ ܒܺܐܝܕܳܐ ܕܥܰܡ̈ܡܶܐ ܘܶܐܫܬܰܠܰܛܘ ܒܗܽܘܢ ܣܳܢܰܐܝ̈ܗܽܘܢ.
42 ܘܫܰܥܒܶܕܘ ܐܶܢܽܘܢ ܒܥܶܠܕ̈ܒܳܒܰܝܗܽܘܢ ܘܶܐܫܬܰܥܒܰܕܘ ܬܚܶܝܬ ܐܺܝܕܰܝ̈ܗܽܘܢ.
43 ܙܰܒ̈ܢܳܬܳܐ ܣܰܓܺܝ̈ܐܳܬܳܐ ܦܰܨܺܝ ܐܶܢܽܘܢ ܘܗܶܢܽܘܢ ܡܰܪܡܪܽܘܗ̱ܝ ܒܬܰܖ̈ܥܝܳܬܗܽܘܢ ܘܶܐܬܡܰܟܰܟܘ̱ ܒܥܰܘܠܗܽܘܢ.
44 ܘܰܚܙܳܐ ܒܽܐܘܠܨܳܢܰܝ̈ܗܽܘܢ ܘܰܫܡܰܥ ܒܳܥܽܘܬܗܽܘܢ.
45 ܘܶܐܬܕܟܰܪ ܩܝܳܡܶܗ ܘܪܰܚܶܡ ܥܠܰܝܗܽܘܢ ܘܕܰܒܰܪ ܐܶܢܽܘܢ ܐܰܝܟ ܣܽܘܓܳܐܐ ܕܛܰܝܒ̈ܘܳܬܶܗ.
46 ܘܝܰܗܒ ܐܶܢܽܘܢ ܒܖ̈ܰܚܡܶܐ ܩܕܳܡ ܟܽܠ ܫܳܒܰܝ̈ܗܽܘܢ.
47 ܦܪܽܘܩܰܝܢ ܡܳܪܝܳܐ ܐܰܠܳܗܰܢ ܘܟܰܢܶܫܰܝܢ ܡܶܢ ܥܰܡ̈ܡܶܐ ܕܢܰܘܕܶܐ ܠܰܫܡܳܟ ܩܰܕܺܝܫܳܐ ܘܢܶܫܬܰܒܰܚ ܒܝܳܪܬܽܘܬܳܟ.
48 ܒܪܺܝܟ ܗܽܘ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ. ܘܢܺܐܡܰܪ ܟܽܠܶܗ ܥܰܡܳܐ ܐܰܡܺܝܢ ܘܰܐܡܺܝܢ.