Psalms 68
The Book of Psalms
܀ ܡܙܡܘܪܐ ܣܚ ܀
ܐܰܡܺܝܪ ܠܕܰܘܺܝܕ ܟܰܕ ܡܰܣܶܩ ܗܘܳܐ ܩܺܒܽܘܬܶܗ ܕܡܳܪܝܳܐ ܡܶܢ ܒܰܝܬܶܗ ܕܥܽܘܒܳܪ ܐܰܕܽܘܡ. ܘܗܽܘ ܩܕܰܡܶܝܗ̇ ܡܒܰܕܶܩ ܗܘܳܐ ܘܕܶܐܠܰܨ
1 ܢܩܽܘܡ ܐܰܠܳܗܳܐ ܘܢܶܬܒܰܕܪܽܘܢ ܟܽܠܗܽܘܢ ܒܥܶܠܕ̈ܒܳܒܰܘܗ̱ܝ. ܢܶܥܪܩܽܘܢ ܣܳܢ̈ܰܐܘܗ̱ܝ ܡܶܢ ܩܕܳܡܰܘܗ̱ܝ.
2 ܘܰܐܝܟ ܕܡܶܬܛܰܠܰܩ ܬܶܢܳܢܳܐ ܢܶܬܛܰܠܩܽܘܢ. ܘܰܐܝܟ ܕܡܶܬܦܰܫܪܳܐ ܫܥܽܘܬܳܐ ܡܶܢ ܩܕܳܡ ܢܽܘܪܳܐ. ܢܺܐܒܕܽܘܢ ܖ̈ܰܫܺܝܥܶܐ ܡܶܢ ܩܕܳܡ ܐܰܠܳܗܳܐ.
3 ܘܙܰܕܺܝ̈ܩܶܐ ܢܶܚܕܽܘܢ ܘܢܶܬܥܰܫܢܽܘܢ ܩܕܳܡ ܐܰܠܳܗܳܐ. ܘܢܶܚܕܽܘܢ ܒܒܽܘܣܳܡܶܗ.
4 ܙܡܰܪܘ ܠܰܐܠܳܗܳܐ ܘܫܰܒܰܚܘ ܠܰܫܡܶܗ. ܫܰܒܰܚܘ ܠܕܰܪܟܺܝܒ ܠܡܰܥܪܒܳܐ ܡܳܪܝܳܐ ܫܡܶܗ. ܐܶܬܥܰܫܰܢܘ̱ ܩܕܳܡܰܘܗ̱ܝ ܕܰܐܒܳܐ ܕܝܰܬܡ̈ܶܐ.
5 ܘܕܰܝܳܢܳܐ ܕܰܐܖ̈ܡܠܳܬܳܐ. ܐܰܠܳܗܳܐ ܒܡܰܥܡܪܶܗ ܩܰܕܺܝܫܳܐ.
6 ܐܰܠܳܗܳܐ ܡܰܘܬܶܒ ܝܺܚܺܝܕܳܝܳܐ ܒܒܰܝܬܳܐ. ܘܡܰܦܶܩ ܐܰܣܺܝܖ̈ܶܐ ܒܟܰܫܺܝܪܽܘܬܳܐ. ܘܡܳܖ̈ܽܘܕܶܐ ܢܶܫܪܽܘܢ ܒܶܝܬ ܩܒܽܘܖ̈ܶܐ.
7 ܐܰܠܳܗܳܐ ܟܰܕ ܢܦܰܩܬ ܩܕܳܡ ܥܰܡܳܟ. ܘܟܰܕ ܥܒܰܪܬ ܒܰܐܫܺܝܡܽܘܢ.
8 ܐܰܪܥܳܐ ܙܳܥܰܬ. ܐܳܦ ܫܡܰܝ̈ܳܐ ܢܰܛܶܦܘ. ܡܶܢ ܩܕܳܡ ܐܰܠܳܗܳܐ ܗܳܢܳܐ ܛܽܘܪܳܐ ܕܣܺܝܢܰܝ. ܡܶܢ ܩܕܳܡ ܐܰܠܳܗܳܐ ܐܰܠܳܗܶܗ ܕܺܝܣܪܳܐܶܝܠ.
9 ܡܶܛܪܳܐ ܕܨܶܒܝܳܢܳܐ ܝܰܗܒܬ ܐܰܠܳܗܳܐ ܠܝܳܪܬܽܘܬܳܟ. ܐܶܬܟܰܪܗܰܬ ܘܰܐܢ̱ܬ ܬܰܩܶܦܬܳܗ̇.
10 ܘܚܰܝ̈ܘܳܬܳܟ ܥܡܰܪܶܝܢ ܒܳܗ̇. ܬܰܩܶܦܬ ܒܛܰܝܒܽܘܬܳܟ ܠܒܳܝ̈ܫܶܐ ܐܰܠܳܗܳܐ.
11 ܡܳܪܝܳܐ ܢܶܬܶܠ ܡܶܠܬܳܐ ܕܰܣܒܰܪܬܳܐ ܒܚܰܝܠܳܐ ܪܰܒܳܐ.
12 ܡܰܠܟ̈ܶܐ ܕܚܰܝܠܰܘ̈ܳܬܳܐ ܢܶܬܟܰܢܫܽܘܢ. ܘܫܽܘܦܪܶܗ ܕܒܰܝܬܳܟ ܢܦܰܠܶܓ ܒܶܙܬܳܐ.
13 ܐܶܢ ܬܶܕܡܟܽܘܢ ܒܶܝܬ ܫܦܳܝ̈ܶܐ. ܓܶܦ̈ܶܐ ܕܝܰܘܢܳܐ ܕܰܩܪܺܝܡܺܝܢ ܒܟܶܣܦܳܐ. ܘܶܐܒܖ̈ܶܝܗ̇ ܒܕܰܗܒܳܐ ܣܢܺܝܢܳܐ.
14 ܟܰܕ ܦܪܰܫ ܐܰܠܳܗܳܐ ܡܰܠܟܳܐ ܒܶܗ ܐܰܬܠܓܰܬ.
15 ܒܨܰܠܡܽܘܢ ܛܽܘܪܶܗ ܕܰܐܠܳܗܳܐ.
16 ܛܽܘܖ̈ܶܐ ܕܒܰܝܫܳܢ ܛܽܘܖ̈ܶܐ ܕܰܓܒܶܢܝܰܡ. ܛܽܘܖ̈ܶܐ ܕܒܰܝܫܳܢ ܡܳܢܳܐ ܨܳܒܶܝܢ ܐܢ̱ܬܽܘܢ ܛܽܘܖ̈ܶܐ ܕܰܓܒܶܢܝܰܡ. ܛܽܘܪܳܐ ܕܰܓܒܳܐ ܠܶܗ ܐܰܠܳܗܳܐ ܠܡܶܬܰܒ ܒܶܗ. ܡܳܪܝܳܐ ܢܶܫܪܶܐ ܒܶܗ ܠܥܳܠܰܡ.
17 ܪܟܶܒ ܐܰܠܳܗܳܐ ܒܖ̈ܶܒܘܳܬܳܐ ܘܒܰܐܠܦ̈ܶܐ ܕܚܰܝܠܳܐ. ܡܳܪܝܳܐ ܒܗܽܘܢ ܣܺܝܢܰܝ ܒܩܽܘܕܫܶܗ.
18 ܣܠܶܩܬ ܠܰܡܪܰܘܡܳܐ ܘܰܫܒܰܝܬ ܫܒܺܝܬܳܐ. ܘܝܰܗܒܬ ܡܰܘܗ̈ܒܳ̈ܬܳܐ ܠܰܒܢܰܝ̈ܢܳܫܳܐ. ܐܳܦ ܡܳܖ̈ܽܘܕܶܐ ܠܳܐ ܢܶܥܡܪܽܘܢ ܩܕܳܡ ܐܰܠܳܗܳܐ.
19 ܒܪܺܝܟ ܗܽܘ ܡܳܪܝܳܐ ܒܟܽܠ ܝܽܘܡ ܕܰܐܓܒܝܰܢ ܝܳܪܬܽܘܬܶܗ.
20 ܐܰܠܳܗܳܐ ܦܳܪܽܘܩܰܢ ܐܰܠܳܗܳܐ ܡܦܰܨܝܳܢܰܢ. ܡܳܪܝܳܐ ܐܰܠܳܗܳܐ ܡܳܪܶܗ ܕܡܰܘܬܳܐ ܘܡܰܦܩܳܢܳܐ.
21 ܒܪܰܡ ܐܰܠܳܗܳܐ ܢܶܦܣܽܘܩ ܪܺܝܫܳܐ ܕܰܒܥܶܠܕ̈ܒܳܒܰܘܗ̱ܝ. ܘܒܺܝܥ̈ܳܬܳܐ ܕܣܰܥܪܳܐ ܕܰܐܝܠܶܝܢ ܕܰܡܗܰܠܟܺܝܢ ܒܰܚܛܳܗܰܝ̈ܗܽܘܢ.
22 ܐܶܡܰܪ ܡܳܪܝܳܐ ܕܡܶܢ ܒܶܝܬ ܫܶܢ̈ܶܐ ܐܰܦܶܩ ܘܰܐܗܦܶܟ ܡܶܢ ܥܽܘ̈ܡܩܰܘܗ̱ܝ ܕܝܰܡܳܐ.
23 ܡܶܛܽܠ ܕܬܶܨܛܒܰܥ ܪܶܓܠܳܟ ܒܰܕܡܳܐ. ܘܠܶܫܳܢܳܐ ܕܟܰܠܒܰܝ̈ܟ ܡܶܢ ܒܥܶܠܕ̈ܒܳܒܰܝܟ.
24 ܚܙܰܘ ܗܶܠܟ̈ܳܬܳܟ ܐܰܠܳܗܳܐ. ܗܶܠܟ̈ܳܬܶܗ ܕܰܐܠܳܗܝ ܘܰܕܡܰܠܟܝ̱ ܩܰܕܺܝܫܳܐ.
25 ܩܰܕܶܡܘ ܪܰܘܖ̈ܒܳܢܶܐ ܒܳܬܰܪ ܡܫܰܒ̈ܚܳܢܶܐ. ܒܰܝܢܳܬ ܥܠܰܝ̈ܡܳܬܳܐ ܕܢܳܩ̈ܫܳܢ ܒܰܦܠܰܓ̈ܶܐ ܒܰܟܢܽܘ̈ܫܳܬܳܐ.
26 ܒܰܪܶܟܘ ܠܡܳܪܝܳܐ ܐܰܠܳܗܳܐ ܡܶܢ ܡܰܒܽܘ̈ܥܶܐ ܕܺܝܣܪܳܐܶܝܠ.
27 ܬܰܡܳܢ ܒܶܢܝܳܡܶܝܢ ܙܥܽܘܪܳܐ ܒܫܶܠܝܳܐ. ܖ̈ܰܘܪܒܳܢܶܐ ܕܺܝܗܽܘܕܳܐ ܘܫܰܠܺܝ̈ܛܳܢܰܝܗܽܘܢ. ܖ̈ܰܘܪܒܳܢܶܐ ܕܰܙܒܽܘܠܽܘܢ ܘܖ̈ܰܘܪܒܳܢܶܐ ܕܢܰܦܬܳܠܺܝ.
28 ܦܩܽܘܕ ܐܰܠܳܗܳܐ ܥܽܘܫܢܳܟ. ܘܰܐܥܫܶܢ ܐܰܠܳܗܳܐ ܠܗܳܕܶܐ ܕܥܰܬܶܕܬ ܠܰܢ.
29 ܡܶܢ ܗܰܝܟܠܳܟ ܠܽܐܘܪܺܫܠܶܡ ܠܳܟ ܢܰܝܬܽܘܢ ܡܰܠܟ̈ܶܐ ܩܽܘܖ̈ܒܳܢܶܐ.
30 ܟܐܺܝ ܒܚܰܝܽܘܬܳܐ ܕܩܰܢܝܳܐ. ܟܢܽܘܫܬܳܐ ܕܰܐܖ̈ܘܳܢܶܐ. ܥܶܓ̈ܠܶܐ ܕܥܰܡ̈ܡܶܐ ܕܰܩܪܺܝܡܺܝܢ ܒܣܺܐܡܳܐ. ܒܰܕܰܪ ܥܰܡ̈ܡܶܐ ܕܨܳܒܶܝܢ ܩܖ̈ܳܒܶܐ.
31 ܢܺܐܬܽܘܢ ܐܺܝܙܓ̈ܰܕܶܐ ܡܶܢ ܡܶܨܪܶܝܢ. ܘܟܽܘܫ ܬܰܫܠܶܡ ܐܺܝܕܳܐ ܠܰܐܠܳܗܳܐ.
32 ܡܰܠܟܘ̈ܳܬܳܐ ܕܰܐܪܥܳܐ ܫܰܒܰܚܶܝ̈ܢ ܠܰܐܠܳܗܳܐ.
33 ܙܡܰܪܘ ܠܡܳܪܝܳܐ ܕܰܪܟܺܝܒ ܒܰܫ̈ܡܰܝ ܫܡܰܝܳܐ. ܡܶܢ ܡܰܕܢܚܳܐ ܝܰܗܒ ܩܳܠܶܗ. ܩܳܠܳܐ ܥܰܫܺܝܢܳܐ.
34 ܗܰܒܘ ܬܶܫܒܽܘܚܬܳܐ ܠܰܐܠܳܗܳܐ ܘܠܺܝܣܪܳܐܶܝܠ ܪܰܒܽܘܬ ܝܳܐܝܽܘܬܳܐ. ܕܥܽܘܫܢܶܗ ܒܰܫ̈ܡܰܝ ܫܡܰܝܳܐ.
35 ܕܚܺܝܠ ܐܰܢ̱ܬ ܐܰܠܳܗܳܐ ܡܶܢ ܡܰܩܕܫܳܟ. ܐܰܠܳܗܶܗ ܕܺܝܣܪܳܐܶܝܠ. ܗܽܘ ܢܶܬܶܠ ܚܰܝܠܳܐ ܘܥܽܘܫܢܳܐ ܠܥܰܡܶܗ ܒܪܺܝܟ ܗܽܘ ܐܰܠܳܗܳܐ.