Psalms 75
The Book of Psalms
܀ ܡܙܡܘܪܐ ܥܗ ܀
ܬܰܘܕܺܝܬܶܗ ܕܥܰܡܳܐ ܕܥܰܠ ܐܰܦܰܝ̈ ܙܳܟܽܘܬܗܽܘܢ ܕܡܶܢ ܐܳܬܽܘܖ̈ܳܝܶܐ ܕܰܒܝܰܘܡܰܝ̈ ܚܶܙܰܩܝܳܐ
1 ܐܰܘܕܺܝܢܰܢ ܠܳܟ ܐܰܠܳܗܳܐ. ܐܰܘܕܺܝܢܰܢ ܠܳܟ ܘܰܩܪܰܝܢ ܫܡܳܟ.
2 ܘܶܐܫܬܰܥܺܝܢ ܟܽܠܗܶܝܢ ܬܶܕܡܖ̈ܳܬܳܟ. ܡܶܛܽܠ ܕܶܐܣܰܒ ܙܰܒܢܳܐ ܘܶܐܢܳܐ ܒܰܬܪܺܝܨܽܘܬܳܐ ܐܶܕܽܘܢ.
3 ܬܶܬܡܰܟܰܟ ܐܰܪܥܳܐ ܘܟܽܠܗܽܘܢ ܥܳܡܽܘܖ̈ܶܝܗ̇. ܐܰܢ̱ܬ ܬܰܩܶܢܬ ܠܥܳܡܽܘܖ̈ܶܝܗ̇.
4 ܐܰܢ̱ܬ ܐܶܡܰܪܬ ܠܫܳܛܰܝ̈ܳܐ ܕܠܳܐ ܬܶܫܛܽܘܢ. ܘܰܠܖ̈ܰܫܺܝܥܶܐ ܕܠܳܐ ܬܪܺܝܡܽܘܢ ܩܰܪܢܳܐ.
5 ܠܳܐ ܬܪܺܝܡܽܘܢ ܠܰܡܪܰܘܡܳܐ ܩܰܪܢܟܽܘܢ ܘܰܬܡܰܠܠܽܘܢ ܒܨܰܘܪܳܐ ܪܳܡܳܐ.
6 ܡܶܛܽܠ ܕܠܳܐ ܡܰܦܩܳܐ ܡܶܢ ܡܰܥܪܒܳܐ ܐܳܦܠܳܐ ܡܶܢ ܡܰܕܒܪܳܐ ܕܛܽܘܖ̈ܶܐ.
7 ܡܶܛܽܠ ܕܰܐܠܳܗܳܐ ܗܽܘ ܕܰܝܳܢܳܐ. ܠܗܳܢܳܐ ܡܫܰܦܶܠ ܘܰܠܗܳܢܳܐ ܡܪܺܝܡ.
8 ܡܶܛܽܠ ܕܟܳܣܳܐ ܒܺܐܝܕܶܗ ܕܡܳܪܝܳܐ. ܘܰܡܠܶܐ ܡܙܳܓܳܐ ܕܚܰܡܪܳܐ ܬܛܺܝܪܳܐ. ܐܰܪܟܶܢ ܡܶܢ ܗܳܢܳܐ ܠܗܳܢܳܐ. ܬܶܛܪܶܗ ܢܶܡܨܽܘܢ ܢܶܫܬܽܘܢ ܟܽܠܗܽܘܢ ܖ̈ܰܫܺܝܥܶܐ ܕܰܐܪܥܳܐ.
9 ܘܶܐܢܳܐ ܐܺܚܶܐ ܠܥܳܠܰܡ. ܘܶܐܙܡܰܪ ܠܰܐܠܳܗܶܗ ܕܝܰܥܩܽܘܒ.
10 ܘܟܽܠܗܶܝܢ ܩܰܖ̈ܢܳܬܳܐ ܕܖ̈ܰܫܺܝܥܶܐ ܐܶܓܰܕܶܡ. ܘܢܶܬܬܖ̈ܺܝܡܳܢ ܩܰܖ̈ܢܳܬܗܽܘܢ ܕܙܕܺܝ̈ܩܶܐ.