Psalms 56
The Book of Psalms
܀ ܡܙܡܘܪܐ ܢܘ ܀
ܬܰܟܫܶܦܬܳܐ ܕܒܶܝܬ ܡܰܩܒܰܝ ܕܫܳܐܠܺܝܢ ܡܶܢ ܐܰܠܳܗܳܐ ܦܽܘܪܩܳܢܳܐ
1 ܪܰܚܶܡ ܥܠܰܝ ܐܰܠܳܗܳܐ ܡܶܛܽܠ ܕܕܳܫܰܢܝ̱ ܒܰܪܢܳܫܳܐ. ܘܝܰܘܡܳܐ ܟܽܠܶܗ ܩܪܰܒܬܳܢܳܐ ܐܰܠܨܰܢܝ̱.
2 ܕܳܫܽܘܢܝ̱ ܒܥܶܠܕ̈ܒܳܒܰܝ ܟܽܠܶܗ ܝܰܘܡܳܐ. ܡܶܛܽܠ ܕܣܽܘܓܳܐܐ ܕܰܩܖ̈ܰܒܬܳܢܶܐ ܐܶܬܬܪܺܝܡܘ ܥܠܰܝ.
3 ܒܺܐܝܡܳܡܳܐ ܠܳܐ ܐܶܕܚܰܠ ܡܶܛܽܠ ܕܰܥܠܰܝܟ ܗܽܘ ܬܟܺܝܠ ܐ̱ܢܳܐ.
4 ܒܰܐܠܳܗܳܐ ܐܶܫܬܰܒܰܚ ܒܰܐܠܳܗܳܐ ܣܰܒܪܶܬ ܠܳܐ ܐܶܕܚܰܠ. ܡܳܢܳܐ ܥܳܒܶܕ ܠܺܝ ܒܰܪܢܳܫܳܐ.
5 ܟܽܠܶܗ ܝܰܘܡܳܐ ܡܶܬܡܰܠܟܺܝܢ ܗ̱ܘܰܘ ܥܠܰܝ. ܘܡܶܬܚܰܫܒܺܝܢ ܗ̱ܘܰܘ ܥܠܰܝ ܒܺܝܫܬܳܐ.
6 ܢܶܛܫܽܘܢ ܘܢܶܥܡܪܽܘܢ ܘܗܶܢܽܘܢ ܥܶܩ̈ܒܰܝ ܢܶܛܪܽܘܢ. ܐܰܝܟ ܕܣܰܟܺܝܘ ܠܢܰܦܫܝ̱ ܘܶܐܡܰܪܘ.
7 ܕܠܰܝܬ ܠܳܗ̇ ܡܦܰܨܝܳܢܳܐ. ܒܪܽܘܓܙܳܐ ܕܥܰܡ̈ܡܶܐ ܕܽܘܢ ܐܶܢܽܘܢ.
8 ܐܰܠܳܗܳܐ ܬܰܘܕܺܝܬܝ̱ ܚܰܘܺܝܬܳܟ. ܣܺܝܡ ܕܶܡ̈ܥܰܝ ܩܕܳܡܰܝܟ ܘܰܒܣܶܦܪܳܟ.
9 ܘܗܳܝܕܶܝܢ ܢܶܗܦܟܽܘܢ ܒܥܶܠܕ̈ܒܳܒܰܝ ܠܒܶܣܬܰܪܗܽܘܢ. ܘܶܐܕܰܥ ܕܰܐܠܳܗܳܐ ܐܺܝܬ ܠܺܝ.
10 ܠܡܶܠܬܶܗ ܕܰܐܠܳܗܳܐ ܐܶܫܰܒܰܚ.
11 ܒܰܐܠܳܗܳܐ ܬܟܺܝܠ ܐ̱ܢܳܐ ܠܳܐ ܐܶܕܚܰܠ. ܡܳܢܳܐ ܥܳܒܶܕ ܠܺܝ ܒܰܪܢܳܫܳܐ.
12 ܠܳܟ ܐܰܠܳܗܳܐ ܐܶܫܰܠܶܡ ܢܶܕܖ̈ܰܝ. ܘܰܒܬܰܘܕܺܝܬܳܐ ܐܶܕܰܒܰܚ ܠܳܟ.
13 ܡܶܛܽܠ ܕܦܰܨܺܝܬ ܢܰܦܫܝ̱ ܡܶܢ ܡܰܘܬܳܐ. ܘܖ̈ܶܓܠܰܝ ܡܶܢ ܫܳܖ̈ܥܳܬܳܐ. ܕܶܐܫܦܰܪ ܩܕܳܡܰܝܟ ܐܰܠܳܗܳܐ ܒܰܐܪܥܳܐ ܕܚܰܝ̈ܶܐ.