Psalms 111
The Book of Psalms
܀ ܡܙܡܘܪܐ ܩܝܐ ܀
ܡܰܠܶܦ ܠܥܰܡܳܐ ܕܰܒܡ̈ܶܠܶܐ ܕܬܰܘܕܺܝܬܳܐ ܕܰܐܝܟ ܗܳܠܶܝܢ ܢܶܬܚܰܫܚܽܘܢ ܚܠܳܦ ܛܰܝ̈ܒܘܳܬܶܗ ܕܰܐܠܳܗܳܐ ܕܰܠܘܳܬܗܽܘܢ
1 ܐܰܘܕܶܐ ܠܡܳܪܝܳܐ ܡܶܢ ܟܽܠܶܗ ܠܶܒܝ̱ ܒܡܶܠܟܳܐ ܕܰܬܖ̈ܺܝܨܶܐ ܒܥܺܕܬܳܐ.
2 ܖ̈ܰܘܪܒܺܝܢ ܥܒܳܕܰܘ̈ܗܝ̱ ܕܡܳܪܝܳܐ ܘܡܶܬܒܥܶܝܢ ܠܟܽܠ ܕܨܳܒܶܝܢ ܒܗܽܘܢ.
3 ܡܫܰܒܚܺܝܢ ܘܖ̈ܰܘܪܒܺܝܢ ܥܒܳܕܰܘ̈ܗܝ ܘܙܰܕܺܝܩܽܘܬܶܗ ܩܰܝܳܡܳܐ ܠܥܳܠܰܡ.
4 ܥܽܘܗܕܳܢܳܐ ܝܰܗܒ ܠܬܶܕܡܖ̈ܳܬܶܗ ܡܪܰܚܡܳܢ ܗܽܘ ܘܰܡܪܰܚܦܳܢ ܡܳܪܝܳܐ.
5 ܡܶܐܟܽܘܠܬܳܐ ܝܰܗܒ ܠܕܳܚ̈ܠܰܘܗ̱ܝ ܘܡܶܬܕܟܰܪ ܠܥܳܠܰܡ ܩܝܳܡܶܗ.
6 ܚܰܝܠܳܐ ܕܒܰܥܒܳܕܰܘ̈ܗܝ̱ ܚܰܘܺܝ ܠܥܰܡܶܗ ܕܢܶܬܶܠ ܠܗܽܘܢ ܝܳܪܬܽܘܬܳܐ ܕܥܰܡ̈ܡܶܐ.
7 ܥܒܳܕ ܐܺܝ̈ܕܰܘܗ̱ܝ ܩܽܘܫܬܳܐ ܘܕܺܝܢܳܐ. ܩܰܝܳܡܺܝܢ ܠܥܳܠܰܡ ܥܳܠܡܺܝܢ.
8 ܘܰܡܫܰܪܪܺܝܢ ܟܽܠܗܽܘܢ ܦܽܘܩ̈ܕܳܢܰܘܗ̱ܝ ܘܰܥܒܺܝܕܺܝܢ ܒܙܰܕܺܝܩܽܘܬܳܐ ܘܰܒܩܽܘܫܬܳܐ.
9 ܦܽܘܪܩܳܢܳܐ ܫܰܕܰܪ ܠܥܰܡܶܗ ܘܡܶܬܕܟܰܪ ܠܥܳܠܰܡ ܩܝܳܡܶܗ. ܩܰܕܺܝܫ ܗܽܘ ܘܰܕܚܺܝܠ ܫܡܶܗ.
10 ܪܺܝܫ ܚܶܟܡܬܳܐ ܕܶܚܠܬܶܗ ܕܡܳܪܝܳܐ. ܘܣܽܘܟܳܠܳܐ ܛܳܒܳܐ ܠܥܳܒܽܘܕܶܗ. ܘܬܶܫܒܽܘܚܬܶܗ ܩܰܝܳܡܳܐ ܠܥܳܠܰܡ.