Psalms 2
The Book of Psalms
܀ ܡܙܡܘܪܐ ܒ ܀
ܡܶܬܢܰܒܶܐ ܥܰܠ ܟܽܠ ܕܶܐܣܬܥܰܪ ܒܚܰܫܶܗ ܕܡܳܪܰܢ ܡܶܢ ܝܺܗܽܘ̈ܕܳܝܶܐ
1 ܠܡܳܢܳܐ ܪܓܰܫܘ ܥܰܡ̱̈ܡܶܐ. ܘܶܐܡ̈ܘܳܬ݂ܳܐ ܖ̈ܢܰܝ ܣܪܺܝܩܽܘܬܳܐ.
2 ܩܳܡܘ ܡܰܠܟ̈ܶܐ ܕܰܐܪܥܳܐ ܘܫܰܠܺܝ̈ܛܳܢܶܐ. ܘܶܐܬܡܰܠܰܟܘ ܐܰܟܚܕܳܐ. ܥܰܠ ܡܳܪܝܳܐ ܘܥܰܠ ܡܫܺܝܚܶܗ.
3 ܕܰܢܦܰܣܶܩ ܚܢܳܩܰܝ̈ܗܽܘܢ. ܘܢܶܫܪܶܐ ܡܶܢܰܢ ܢܺܝܪܗܽܘܢ.
4 ܕܝܳܬܶܒ ܒܰܫܡܰܝܳܐ ܢܶܓܚܰܟ. ܘܡܳܪܝܳܐ ܢܡܰܝܶܩ ܒܗܽܘܢ.
5 ܗܳܝܕܶܝܢ ܢܡܰܠܶܠ ܥܠܰܝܗܽܘܢ ܒܪܽܘܓܙܶܗ. ܘܰܒܚܶܡܬܶܗ ܢܕܰܠܰܚ ܐܶܢܽܘܢ.
6 ܐܶܢܳܐ ܐܰܩܺܝܡܶܬ ܡܰܠܟܝ̱ ܥܰܠ ܨܶܗܝܽܘܢ ܛܽܘܪܳܐ ܕܩܽܘܕܫܝ̱.
7 ܕܢܶܫܬܰܥܶܐ ܥܰܠ ܩܝܳܡܝ̱. ܡܳܪܝܳܐ ܐܶܡܰܪ ܠܺܝ ܕܒܶܪܝ̱ ܐܰܢ̱ܬ. ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ.
8 ܫܐܰܠ ܡܶܢܝ̱ ܘܶܐܬܶܠ ܠܳܟ. ܥܰܡ̈ܡܶܐ ܠܝܳܪܬܽܘܬܳܟ.
9 ܐܘܚܕܳܢܰܝ̈ܟ ܥܶܒܖ̈ܶܝܗ̇ ܕܰܐܪܥܳܐ. ܬܶܪܥܶܐ ܐܶܢܽܘܢ ܒܫܰܒܛܳܐ ܕܦܰܪܙܠܳܐ. ܘܰܐܝܟ ܡܳܐܢܰܝ̈ ܦܰܚܳܪܳܐ ܬܢܰܦܶܨ ܐܶܢܽܘܢ.
10 ܗܳܫܳܐ ܡܰܠܟ̈ܶܐ ܐܶܣܬܰܟܠܘ. ܘܶܐܬܪܕܰܘ ܕܰܝܳܢ̈ܶܐ ܕܰܐܪܥܳܐ.
11 ܦܠܽܘܚܘ ܠܡܳܪܝܳܐ ܒܕܶܚܠܬܳܐ. ܐܚܕܽܘܢܳܝܗܝ ܒܰܪܬܺܝܬܳܐ.
12 ܢܰܫܶܩܘ ܒܪܳܐ ܕܠܳܐ ܢܶܪܓܰܙ. ܘܬܺܐܒܕܽܘܢ ܡܶܢ ܐܽܘܪܚܶܗ. ܡܶܛܽܠ ܕܥܰܕ ܩܰܠܺܝܠ ܝܳܩܶܕ ܪܽܘܓܙܶܗ. ܛܽܘܒܰܝܗܽܘܢ ܠܟܽܠ ܕܰܬܟܺܝܠܺܝܢ ܥܠܰܘܗ̱ܝ.