Psalms 5
The Book of Psalms
܀ ܡܙܡܘܪܐ ܗ ܀
ܡܶܬܢܰܒܶܐ ܥܰܠ ܡܶܬܬܰܘܝܳܢܽܘܬܳܐ ܕܥܰܡܳܐ ܝܺܣܰܪܠܳܝܳܐ ܕܰܒܒܳܒܶܠ
1 ܡܶܠܰܝ̈ ܨܽܘܬ ܡܳܪܝܳܐ ܘܶܐܣܬܰܟܠ ܒܰܗܓܳܝܝ̱.
2 ܨܽܘܬ ܠܩܳܠܳܐ ܕܰܓܥܳܬܝ̱ ܡܰܠܟܝ̱ ܘܰܐܠܳܗܝ̱. ܡܶܛܽܠ ܕܰܠܘܳܬܳܟ ܗܽܘ ܡܨܰܠܳܐ ܐ̱ܢܳܐ.
3 ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ̱. ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ.
4 ܡܶܛܽܠ ܕܰܐܠܳܗܳܐ ܐܰܢ̱ܬ ܠܳܐ ܨܳܒܶܐ ܪܽܘܫܥܳܐ. ܘܠܳܐ ܢܶܥܡܰܪ ܥܰܡܳܟ ܒܺܝܫܳܐ.
5 ܘܠܳܐ ܢܩܽܘܡܽܘܢ ܫܰܒܰܗܖ̈ܳܢܶܐ ܩܕܳܡ ܥܰܝܢܰܝ̈ܟ. ܣܢܰܝܬ ܠܟܽܠ ܥܳܒܕܰ̈ܝ ܫܽܘܩܪܳܐ.
6 ܘܬܰܘܒܶܕ ܠܰܡ̈ܡܰܠܠܰܝ ܕܰܓܳܠܽܘܬܳܐ. ܠܓܰܒܪܳܐ ܐܳܫܰܕ ܕܡܳܐ ܘܢܰܟܽܘܠܬܳܢܳܐ ܢܰܣܠܶܝܘܗ̱ܝ ܡܳܪܝܳܐ.
7 ܘܶܐܢܳܐ ܒܣܽܘܓܳܐܐ ܕܛܰܝܒܽܘܬܳܟ ܐܶܥܽܘܠ ܠܒܰܝܬܳܟ. ܘܶܐܣܓܽܘܕ ܒܗܰܝܟܠܳܐ ܕܩܽܘܕܫܳܟ.
8 ܒܕܶܚܠܬܳܟ ܡܳܪܝܳܐ ܕܰܒܰܪܰܝܢܝ̱ ܘܰܒܙܰܕܺܝܩܽܘܬܳܟ. ܡܶܛܽܠ ܒܥܶܠܕ̈ܒܳܒܰܝ ܬܪܽܘܨ ܩܕܳܡܰܝ ܐܽܘܪܚܳܟ.
9 ܡܶܛܽܠ ܕܠܰܝܬ ܒܦܽܘܡܗܽܘܢ ܟܺܐܢܽܘܬܳܐ. ܐܶܠܳܐ ܥܰܘܠܳܐ ܒܓܰܘܗܽܘܢ. ܘܰܐܝܟ ܩܰܒܖ̈ܶܐ ܦܬܺܝ̈ܚܶܐ ܓܰܓܖ̈ܳܬܗܽܘܢ. ܘܠܶܫܳܢܰܝ̈ܗܽܘܢ ܡܗܰܦܟܺܝܢ.
10 ܢܚܰܝܶܒ ܐܶܢܽܘܢ ܐܠܗܳܐ. ܘܢܶܦܠܽܘܢ ܡܶܢ ܡܽܘܠܟܳܢܰܝ̈ܗܽܘܢ. ܘܰܒܣܽܘܓܳܐܐ ܕܥܰܘܠܗܽܘܢ ܕܚܽܘܩ ܐܶܢܽܘܢ. ܡܶܛܽܠ ܕܡܰܪܡܪܽܘܟ.
11 ܢܶܚܕܽܘܢ ܟܽܠ ܕܰܡܣܰܒܪܺܝܢ ܒܳܟ ܘܰܠܥܳܠܰܡ ܢܫܰܒܚܽܘܢܳܟ ܘܬܶܥܡܰܪ ܒܗܽܘܢ. ܘܢܶܬܥܰܫܢܽܘܢ ܒܳܟ ܟܽܠ ܖ̈ܳܚܡܰܝ ܫܡܳܟ.
12 ܡܶܛܽܠ ܕܰܐܢ̱ܬ ܬܒܰܪܶܟ ܠܙܰܕܺܝ̈ܩܶܐ. ܡܳܪܝܳܐ ܐܰܝܟ ܣܰܟܪܳܐ ܡܩܰܒܰܠܬܳܐ ܬܰܥܛܦܰܢܝ̱.