Psalms 114
The Book of Psalms
܀ ܡܙܡܘܪܐ ܩܝܕ ܀
ܒܝܰܕ ܩܰܕ̈ܡܳܝܳܬܳܐ ܕܶܐܣܬܥܰܪ ܡܰܪܬܶܐ ܠܥܰܡܳܐ ܕܠܳܐ ܢܶܣܓܕܽܘܢ ܠܰܦܬܰܟܖ̈ܶܐ ܐܶܠܳܐ ܠܰܐܠܳܗܳܐ ܥܳܒܶܕ ܛܳܒܳܬܗܽܘ̈ܢ
1 ܟܰܕ ܢܳܦܶܩ ܐܺܝܣܪܳܐܝܠ ܡܶܢ ܡܶܨܪܶܝܢ ܘܰܕܒܶܝܬ ܝܰܥܩܽܘܒ ܡܶܢ ܥܰܡܳܐ ܠܳܥܽܘܙܳܐ.
2 ܗܘܳܐ ܝܺܗܽܘܕܳܐ ܩܽܘܕܫܶܗ ܘܺܐܝܣܪܳܐܝܠ ܬܶܫܒܽܘܚܬܶܗ.
3 ܝܰܡܳܐ ܚܙܳܝܗܝ̱ ܘܰܥܪܰܩ. ܘܝܽܘܪܕܢܳܢ ܗܦܰܟ ܠܒܶܣܬܪܶܗ.
4 ܛܽܘܖ̈ܶܐ ܪܰܩܶܕܘ ܐܰܝܟ ܐܰܝ̈ܠܶܐ. ܘܖ̈ܳܡܳܬܳܐ ܐܰܝܟ ܐܶܡܖ̈ܶܐ ܕܥܳܢ̈ܳܐ.
5 ܡܳܐ ܠܳܟ ܝܰܡܳܐ ܕܰܥܪܰܩܬ ܘܝܽܘܪܕܢܳܢ ܕܰܗܦܰܟܬ ܠܒܶܣܬܪܳܟ.
6 ܘܛܽܘܖ̈ܶܐ ܕܪܰܩܶܕܬܽܘܢ ܐܰܝܟ ܐܰܝ̈ܠܶܐ ܘܖ̈ܳܡܳܬܳܐ ܐܰܝܟ ܐܶܡܖ̈ܶܐ ܕܥܳܢ̈ܳܐ. ܡܶܢ ܩܕܳܡ ܡܳܪܝܳܐ ܙܳܥܰܬ ܐܰܪܥܳܐ.
7 ܡܶܢ ܩܕܳܡ ܐܰܠܳܗܶܗ ܕܝܰܥܩܽܘܒ.
8 ܕܰܗܦܰܟ ܛܰܪܳܢܳܐ ܠܶܐܓ̈ܡܶܐ ܕܡܰܝ̈ܳܐ. ܘܟܺܐܦܳܐ ܫܰܪܺܝܪܬܳܐ ܠܡܰܒܽܘ̈ܥܶܐ ܕܡܰܝ̈ܳܐ.
9 ܠܳܐ ܠܰܢ ܡܳܪܝܳܐ ܠܳܐ ܠܰܢ. ܐܶܠܳܐ ܠܰܫܡܳܟ ܩܰܕܺܝܫܳܐ ܗܰܒ ܐܺܝܩܳܪܳܐ ܥܰܠ ܛܰܝܒܽܘܬܳܟ ܘܥܰܠ ܩܽܘܫܬܳܟ.
10 ܕܠܳܐ ܢܺܐܡܪܽܘܢ ܥܰܡ̈ܡܶܐ ܐܰܝܟܰܘ ܐܰܠܳܗܗܽܘܢ.
11 ܐܰܠܳܗܰܢ ܒܰܫܡܰܝܳܐ ܗܽܘ ܘܟܽܠ ܕܨܳܒܶܐ ܥܳܒܶܕ.
12 ܦܬܰܟܖ̈ܶܐ ܕܥܰܡ̈ܡܶܐ ܣܺܐܡܳܐ ܘܕܰܗܒܳܐ ܥܒܳܕ ܐܺܝܕܰܝ̈ܳܐ ܕܒܰܪܢܳܫܳܐ.
13 ܦܽܘ̈ܡܶܐ ܐܺܝܬ ܠܗܽܘܢ ܘܠܳܐ ܡܡܰܠܠܺܝܢ. ܥܰܝ̈ܢܶܐ ܐܺܝܬ ܠܗܽܘܢ ܘܠܳܐ ܚܳܙܶܝܢ.
14 ܐܶܕܢ̈ܶܐ ܐܺܝܬ ܠܗܽܘܢ ܘܠܳܐ ܫܳܡܥܺܝܢ. ܢܚܺܝܖ̈ܶܐ ܐܺܝܬ ܠܗܽܘܢ ܘܠܳܐ ܡܪܺܝܚܺܝܢ.
15 ܒܺܐܝ̈ܕܰܝܗܽܘܢ ܠܳܐ ܡܳܝܫܺܝܢ ܘܰܒܖ̈ܶܓܠܰܝܗܽܘܢ ܠܳܐ ܡܗܰܠܟܺܝܢ ܘܠܳܐ ܡܡܰܠܠܺܝܢ ܒܓܰܓܖ̈ܳܬܗܽܘܢ.
16 ܐܰܟܘܳܬܗܽܘܢ ܢܶܗܘܽܘܢ ܥܳܒܽܘ̈ܕܰܝܗܽܘܢ ܘܟܽܠ ܕܰܬܟܺܝܠܺܝܢ ܥܠܰܝܗܽܘܢ.
17 ܕܒܶܝܬ ܝܺܣܪܳܐܶܝܠ ܬܟܺܝܠܺܝܢ ܥܰܠ ܡܳܪܝܳܐ. ܗܽܘܝܽܘ ܥܳܕܽܘܪܗܽܘܢ ܘܰܡܣܰܝܥܳܢܗܽܘܢ.
18 ܕܒܶܝܬ ܐܰܗܪܽܘܢ ܬܟܺܝܠܺܝܢ ܥܰܠ ܡܳܪܝܳܐ. ܗܽܘܝܽܘ ܥܳܕܽܘܪܗܽܘܢ ܘܰܡܣܰܝܥܳܢܗܽܘܢ.
19 ܕܳܚ̈ܠܰܘܗ̱ܝ ܕܡܳܪܝܳܐ ܬܟܺܝܠܺܝܢ ܥܰܠ ܡܳܪܝܳܐ. ܗܽܘܝܽܘ ܥܳܕܽܘܪܗܽܘܢ ܘܰܡܣܰܝܥܳܢܗܽܘܢ.
20 ܡܳܪܝܳܐ ܥܰܗܕܰܢ ܘܒܰܪܟܰܢ. ܢܒܰܪܶܟ ܠܰܕܒܶܝܬ ܐܺܝܣܪܳܐܝܠ. ܢܒܰܪܶܟ ܠܰܕܒܶܝܬ ܐܰܗܪܽܘܢ.
21 ܢܒܰܪܶܟ ܡܳܪܝܳܐ ܠܕܳܚ̈ܠܰܘܗ̱ܝ ܙܥܽܘܖ̈ܶܐ ܥܰܡ ܖ̈ܰܘܪܒܶܐ.
22 ܢܰܘܣܶܦ ܥܠܰܝܟܽܘܢ ܡܳܪܝܳܐ. ܥܠܰܝܟܽܘܢ ܘܥܰܠ ܒܢܰܝ̈ܟܽܘܢ.
23 ܒܪܺܝܟܺܝܢ ܐܢ̱ܬܽܘܢ ܠܡܳܪܝܳܐ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ.
24 ܫܡܰܝ̈ ܫܡܰܝܳܐ ܕܡܳܪܝܳܐ ܘܰܐܪܥܳܐ ܝܰܗܒܳܗ̇ ܠܰܒܢܰܝ̈ܢܳܫܳܐ.
25 ܠܳܐ ܡܺܝ̈ܬܶܐ ܢܫܰܒܚܽܘܢ ܠܡܳܪܝܳܐ ܐܳܦܠܳܐ ܟܽܠ ܢܳܚ̈ܬܰܝ ܚܶܫܽܘܟܳܐ.
26 ܚܢܰܢ ܕܶܝܢ ܢܒܰܪܶܟ ܠܡܳܪܝܳܐ ܡܶܟܺܝܠ ܘܰܥܕܰܡܳܐ ܠܥܳܠܰܡ.