Psalms 86
The Book of Psalms
܀ ܡܙܡܘܪܐ ܦܘ ܀
ܐܰܡܺܝܪ ܠܕܰܘܺܝܕ ܐܰܝܟ ܨܠܽܘܬܳܐ ܡܶܕܶܡ ܡܶܢ ܦܽܘܡ ܚܶܙܰܩܝܳܐ ܡܰܠܟܳܐ ܟܺܐܢܺܐ. ܟܰܕ ܚܕܺܝܪܺܝܢ ܗܘܰܘ ܠܶܗ ܐܳܬܽܘܖ̈ܳܝܶܐ ܘܫܳܐܶܠ ܡܶܢ ܐܰܠܳܗܳܐ ܓܗܳܝܬܳܐ ܕܡܶܢܗܽܘܢ
1 ܨܠܺܝ ܡܳܪܝܳܐ ܐܶܕܢܳܟ ܘܰܥܢܺܝܢܝ̱. ܡܶܛܽܠ ܕܡܶܣܟܺܢܳܐ ܐ̱ܢܳܐ ܘܒܳܝܫܳܐ.
2 ܢܰܛܰܪ ܠܢܰܦܫܝ̱ ܡܶܛܽܠ ܕܛܳܒ ܐܰܢ̱ܬ. ܦܪܽܘܩ ܠܥܰܒܕܳܟ ܐܰܢ̱ܬ ܐܰܠܳܗܳܐ ܕܰܡܣܰܒܰܪ ܒܳܟ.
3 ܪܰܚܶܡܥܠܰܝ ܡܳܪܝܳܐ. ܡܶܛܽܠ ܕܰܠܘܳܬܳܟ ܐܶܩܪܶܐ ܒܟܽܠܝܽܘܡ.
4 ܚܰܕܳܐ ܢܰܦܫܶܗ ܕܥܰܒܕܳܟ. ܡܶܛܽܠ ܕܰܠܘܳܬܳܟ ܡܳܪܝܳܐ ܐܰܪܺܝܡܶܬ ܢܰܦܫܝ̱.
5 ܡܶܛܽܠ ܕܰܐܢ̱ܬ ܡܳܪܝܳܐ ܛܳܒ ܐܰܢ̱ܬ. ܘܣܰܓܺܝܐܳܐ ܛܰܝܒܽܘܬܳܟ ܠܟܽܠ ܕܩܳܪܶܝܢ ܠܳܟ.
6 ܨܽܘܬ ܡܳܪܝܳܐ ܨܠܽܘܬܝ̱ ܘܰܫܡܰܥ ܒܩܳܠܳܐ ܕܰܓܥܳܬܝ̱.
7 ܒܝܘܡܳܐ ܕܽܐܘܠܨܳܢܝ̱ ܩܪܺܝܬܳܟ ܘܰܥܢܰܝܬܳܢܝ̱.
8 ܠܰܝܬ ܐܰܟܘܳܬܳܟ ܡܳܪܝܳܐ ܐܰܠܳܗܰܢ ܘܠܰܝܬ ܐܰܝܟ ܥܒܳܕܰܝ̈ܟ.
9 ܟܽܠܗܽܘܢ ܥܰܡ̈ܡܶܐ ܕܰܥܒܰܕܬ ܢܺܐܬܽܘܢ ܘܢܶܣܓܕܽܘܢ ܠܳܟ ܡܳܪܝܳܐ. ܘܰܢܫܰܒܚܽܘܢ ܠܰܫܡܳܟ.
10 ܡܶܛܽܠ ܕܪܰܒ ܐܰܢ̱ܬ. ܥܳܒܶܕ ܐܰܢ̱ܬ ܬܶܕܡܖ̈ܳܬܳܐ ܐܰܢ̱ܬ ܐܰܠܳܗܳܐ ܒܰܠܚܽܘܕܰܝܟ.
11 ܚܰܘܳܢܝ̱ ܡܳܪܝܳܐ ܐܽܘܪܚܳܟ ܘܶܐܗܰܠܶܟ ܒܩܽܘܫܬܳܐ. ܢܶܚܕܶܐ ܠܶܒܝ̱ ܒܰܐܝܠܶܝܢ ܕܕܳܚܠܺܝܢ ܠܰܫܡܳܟ.
12 ܐܰܘܕܶܐ ܠܳܟ ܡܳܪܝܳܐ ܐܰܠܳܗܝ ܡܶܢ ܟܽܠܶܗ ܠܶܒܝ̱. ܘܶܐܫܰܒܰܚ ܫܡܳܟ ܠܥܳܠܰܡ.
13 ܡܶܛܽܠ ܕܛܰܝܒܽܘܬܳܟ ܣܶܓܝܰܬ ܥܠܰܝ. ܘܦܰܨܺܝܬ ܢܰܦܫܝ̱ ܡܶܢ ܫܝܽܘܠ ܬܰܚܬܳܝܬܳܐ.
14 ܐܰܠܳܗܳܐ ܥܰܘ̈ܳܠܶܐ ܩܳܡܘ̱ ܥܠܰܝ. ܘܰܟܢܽܘܫܬܳܐ ܕܥܰܫܺܝ̈ܢܶܐ ܒܥܰܐܗ̇ ܠܢܰܦܫܝ̱ ܘܠܳܐ ܐܶܬܕܰܟܪܽܘܟ.
15 ܘܰܐܢ̱ܬ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ. ܢܰܓܺܝܪ ܪܽܘܚܳܐ ܘܣܰܓܺܝ ܛܰܝܒܽܘܬܳܐ ܘܩܽܘܫܬܳܐ.
16 ܐܶܬܦܰܢ ܥܠܰܝ ܘܪܰܚܶܡ ܥܠܰܝ. ܗܰܒ ܚܰܝܠܳܐ ܠܥܰܒܕܳܟ ܘܰܦܪܽܘܩ ܠܒܰܪ ܐܰܡܬܳܟ.
17 ܘܰܥܒܶܕ ܥܰܡܝ̱ ܐܳܬܳܐ ܛܳܒܬܳܐ. ܕܢܶܚܙܽܘܢ ܣܳܢ̈ܰܐܝ ܘܢܶܒܗܬܽܘܢ. ܕܰܐܢ̱ܬ ܡܳܪܝܳܐ ܥܰܕܰܪܬܳܢܝ̱ ܘܒܰܝܰܐܬܳܢܝ̱.