Psalms 45
The Book of Psalms
܀ ܡܙܡܘܪܐ ܡܗ ܀
ܡܶܬܢܰܒܶܐ ܥܰܠ ܡܫܺܝܚܳܐ ܡܳܪܰܢ. ܘܥܰܠ ܩܽܘܝܳܡܳܗ̇ ܕܥܺܕܬܳܐ ܩܰܕܺܝܫܬܳܐ
1 ܐܰܒܰܥ ܠܶܒܝ̱ ܦܶܬܓܳܡ̈ܶܐ ܛܳܒ̈ܶܐ. ܘܺܐܡܰܪ ܥܒܳܕܰܝ̈ ܠܡܰܠܟܳܐ. ܠܶܫܳܢܝ̱ ܩܰܢܝܶܗ ܕܣܳܦܪܳܐ ܡܗܺܝܪܳܐ.
2 ܫܰܦܺܝܪ ܒܚܶܙܘܶܗ ܡܶܢ ܒܢܰܝ̈ܢܳܫܳܐ. ܐܶܬܢܣܶܟܘ ܖ̈ܰܚܡܶܐ ܥܰܠ ܣܶܦ̈ܘܳܬܳܟ. ܡܶܛܽܠ ܗܳܢܳܐ ܒܰܪܟܳܟ ܐܰܠܳܗܳܐ ܠܥܳܠܰܡ.
3 ܐܰܪܡܳܐ ܣܰܝܦܳܐ ܒܚܰܨܰܝ̈ܟ ܓܰܢ̱ܒܳܪܳܐ. ܗܶܕܪܳܟ ܘܫܽܘܒܚܳܟ.
4 ܘܫܽܘܒܚܳܟ ܙܳܟܶܐ. ܪܟܰܒ ܥܰܠ ܡܶܠܬܳܐ ܕܩܽܘܫܬܳܐ ܘܡܽܘܟܳܟܳܐ ܕܙܰܕܺܝܩܽܘܬܳܐ. ܢܳܡܽܘܣܳܟ ܒܕܶܚܠܬܳܐ ܕܝܰܡܺܝܢܳܟ.
5 ܓܶܐܖ̈ܰܝܟ ܫܢܺܝܢܺܝܢ ܘܥܰܡ̈ܡܶܐ ܢܶܦܠܽܘܢ ܬܚܽܘܬܰܝܟ. ܒܠܶܒܳܐ ܕܰܒܥܶܠܕ̈ܒܳܒܰܘܗ̱ܝ ܕܡܰܠܟܳܐ.
6 ܟܽܘܪܣܝܳܟ ܐܰܠܳܗܳܐ ܠܥܳܠܰܡ ܥܳܠܡܺܝܢ. ܫܰܒܛܳܐ ܦܫܺܝܛܳܐ ܫܰܒܛܳܐ ܕܡܰܠܟܽܘܬܳܟ.
7 ܪܚܶܡܬ ܙܰܕܺܝܩܽܘܬܳܐ ܘܰܣܢܰܝܬ ܥܰܘܠܳܐ. ܡܶܛܽܠ ܗܳܢܳܐ ܡܰܫܚܳܟ ܐܰܠܳܗܳܐ ܐܰܠܳܗܳܟ ܡܶܫܚܳܐ ܕܚܰܕܽܘܬܳܐ ܝܰܬܺܝܪ ܡܶܢ ܚܰܒܖ̈ܰܝܟ.
8 ܡܽܘܪܳܐ ܘܩܰܣܝܳܐ ܘܶܐܣܛܰܩܛܳܐ ܡܒܰܣܡܝܢ ܟܽܠܗܽܘܢ ܠܒܽܘ̈ܫܰܝܟ. ܡܶܢ ܗܰܝܟܠܳܐ ܪܺܫܳܝܳܐ ܡܶܢ ܠܘܳܬܝ̱ ܚܰܕܝܽܘܟ.
9 ܒܰܪܬ ܡܰܠܟܳܐ ܒܫܽܘܒܚܳܐ ܩܳܡܰܬ. ܘܡܰܠܟܬܳܐ ܡܶܢ ܝܰܡܺܝܢܳܟ. ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ.
10 ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱. ܘܰܛܥܳܝ ܥܰܡܶܟܝ̱ ܘܒܶܝܬ ܐܰܒܽܘܟܝ̱.
11 ܕܢܶܬܪܰܓܪܰܓ ܡܰܠܟܳܐ ܠܫܽܘܦܪܶܟܝ̱. ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ.
12 ܘܒܰܪܬ ܨܽܘܪ ܬܶܣܓܽܘܕ ܠܶܗ. ܒܩܽܘܖ̈ܒܳܢܶܐ ܐܰܦܰܝ̈ܟܝ̱ ܢܶܒܥܽܘܢ ܥܰܬܺܝܖ̈ܰܘܗ̱ܝ ܕܥܰܡܳܐ.
13 ܘܟܽܠܶܗ ܫܽܘܒܚܳܗ̇ ܕܒܰܪܬ ܡܰܠܟܳܐ ܡܶܢ ܠܓܰܘ. ܘܰܡܨܰܒܰܬ ܠܒܽܘܫܳܗ̇ ܒܕܰܗܒܳܐ ܛܳܒܳܐ.
14 ܒܩܽܘܖ̈ܒܳܢܶܐ ܬܺܐܙܰܠ ܠܡܰܠܟܳܐ. ܘܢܰܘܒܠܽܘܢ ܒܬܽܘ̈ܠܳܬܳܐ ܚܰܒܖ̈ܳܬܳܗ̇ ܒܳܬܪܳܗ̇.
15 ܘܢܺܐܙ̈ܳܠ̱ܢ ܒܚܰܕܽܘܬܳܐ ܘܰܒܒܰܣܺܝܡܽܘܬܳܐ. ܘܢܶܥ̈ܠܳܢ ܠܗܰܝܟܠܶܗ ܕܡܰܠܟܳܐ.
16 ܚܠܳܦ ܐܰܒܳܗܰܝ̈ܟܝ̱ ܢܶܗܘܽܘܢ ܒܢܰܝ̈ܟܝ̱. ܥܒܶܕ ܐܶܢܽܘܢ ܫܰܠܺܝ̈ܛܶܐ ܒܟܽܠܳܗ̇ ܐܰܪܥܳܐ.
17 ܘܢܶܬܕܟܰܪ ܫܡܳܟ ܒܟܽܠ ܕܳܪ ܘܕܳܪ. ܡܶܛܽܠ ܗܳܢܳܐ ܢܰܘܕܽܘܢ ܠܳܟ ܥܰܡ̈ܡܶܐ ܠܥܳܠܰܡ ܥܳܠܡܺܝܢ.