Psalms 98
The Book of Psalms
܀ ܡܙܡܘܪܐ ܨܚ ܀
ܥܰܠ ܦܽܘܢܳܝܶܗ ܬܡܺܝܗܳܐ ܕܥܰܡܳܐ ܕܡܶܢ ܒܳܒܶܠ ܡܒܰܕܶܩ ܘܰܡܙܰܡܶܢ ܠܟܽܠܢܳܫ ܠܬܰܘܕܺܝܬܳܐ ܕܰܐܠܳܗܳܐ
ܥܰܠ ܦܽܘܢܳܝܶܗ ܕܥܰܡܳܐ ܕܡܶܢ ܒܳܒܶܠ ܡܶܬܢܰܒܶܐ ܒܰܕܡܽܘܬ ܬܶܫܒܽܘܚܬܳܐ ܘܬܰܘܕܺܝܬܳܐ
1 ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܡܶܛܽܠ ܕܬܶܕܡܽܘܪܬܳܐ ܥܒܰܕ. ܦܪܰܩܬܶܗ ܝܰܡܺܝܢܶܗ ܘܰܕܪܳܥܶܗ ܩܰܕܺܝܫܳܐ.
2 ܚܰܘܺܝ ܡܳܪܝܳܐ ܦܽܘܪܩܳܢܶܗ ܘܰܠܥܺܝܢ ܥܰܡ̈ܡܶܐ ܓܠܳܐ ܙܰܕܺܝܩܽܘܬܶܗ.
3 ܐܶܬܕܟܰܪ ܛܰܝܒܽܘܬܶܗ ܘܗܰܝܡܳܢܽܘܬܶܗ ܠܰܕܒܶܝܬ ܝܺܣܪܳܐܶܝܠ ܘܰܚܙܰܘ ܟܽܠܗܽܘܢ ܥܶܒܖ̈ܶܝܗ̇ ܕܰܐܪܥܳܐ ܦܽܘܪܩܳܢܶܗ ܕܰܐܠܳܗܰܢ.
4 ܫܰܒܰܚܘ ܠܡܳܪܝܳܐ ܟܽܠܳܗ̇ ܐܰܪܥܳܐ. ܐܶܬܦܰܨܚܘ̱ ܘܰܙܡܰܪܘ ܘܫܰܒܰܚܘ̱.
5 ܙܡܰܪܘ ܠܡܳܪܝܳܐ ܒܟܶܢܳܖ̈ܶܐ ܘܰܒܩܳܠܳܐ ܕܰܙܡܳܪܳܐ.
6 ܘܰܒܩܳܠܳܐ ܕܩܰܖ̈ܢܳܬܳܐ ܫܰܒܰܚܘ ܩܕܳܡ ܡܰܠܟܳܐ ܡܳܪܝܳܐ.
7 ܢܙܽܘܥ ܝܰܡܳܐ ܒܰܡܠܳܐܶܗ. ܬܺܒܶܝܠ ܘܥܳܡܽܘܖ̈ܶܝܗ̇.
8 ܢܰܗܖ̈ܰܘܳܬܳܐ ܢܶܩܫܽܘܢ ܟܰܦܳܐ ܐܰܟܚܕܳܐ ܘܛܽܘܖ̈ܶܐ ܢܫܰܒܚܽܘܢ ܩܕܳܡ ܡܳܪܝܳܐ.
9 ܕܳܐܬܶܐ ܠܰܡܕܳܢܳܗ̇ ܠܰܐܪܥܳܐ. ܕܳܐܶܢ ܬܺܒܝܠ ܒܙܰܕܺܝܩܽܘܬܳܐ ܘܰܠܥܰܡ̈ܡܶܐ ܒܰܬܪܺܝܨܽܘܬܳܐ.