Psalms 38
The Book of Psalms
܀ ܡܙܡܘܪܐ ܠܚ ܀
ܒܳܥܽܘܬܶܗ ܕܕܰܘܺܝܕ ܕܰܠܘܳܬ ܐܰܠܳܗܳܐ. ܡܶܛܽܠ ܚܛܺܝܬܶܗ ܕܰܠܘܳܬ ܒܰܪܬ ܫܒܰܥ
1 ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ̱. ܐܳܦܠܳܐ ܒܚܶܡܬܳܟ ܬܶܪܕܶܝܢܝ̱.
2 ܡܶܛܽܠ ܕܓܶܐܖ̈ܰܝܟ ܐܶܬܩܒܰܥܘ ܒܺܝ. ܘܶܐܬܬܢܺܝܚܰܬ ܐܺܝܕܳܟ ܥܠܰܝ.
3 ܠܰܝܬ ܫܠܳܡܳܐ ܠܒܶܣܪܝ̱ ܡܶܢ ܩܕܳܡ ܚܶܡܬܳܟ. ܘܠܰܝܬ ܫܠܳܡܳܐ ܠܓܰܖ̈ܡܰܝ ܡܶܢ ܩܕܳܡ ܚܛܳܗܰܝ̈.
4 ܡܶܛܽܠ ܕܣܰܟ̈ܠܘܳܬܝ̱ ܥܒܰܖ̈ܝ̱ ܠܪܺܝܫܝ̱. ܘܰܐܝܟ ܡܰܘܒܠܳܐ ܝܰܩܺܝܪܬܳܐ ܝܺܩܰܖ̈ܝ̱ ܠܺܝ.
5 ܣܖ̈ܺܝ ܘܶܐܬܡ̈ܣܺܝ ܚܒܳܖ̈ܳܬܝ̱. ܘܡܶܢ ܩܕܳܡ ܣܰܟ̈ܠܘܳܬܝ̱ ܙܳܥܶܬ ܛܳܒ.
6 ܘܟܽܠܶܗ ܝܰܘܡܳܐ ܒܰܟܡܺܝܪܽܘܬܳܐ ܗܰܠܟܶܬ.
7 ܡܶܛܽܠ ܕܩܽܘܖ̈ܨܠܰܝ ܐܶܬܡܠܺܝܘ ܙܰܘܥܬܳܐ. ܘܠܰܝܬ ܫܠܳܡܳܐ ܠܒܶܣܪܝ̱.
8 ܙܳܥܶܬ ܘܰܕܘܺܝܬ ܛܳܒ. ܘܢܳܗܶܓ ܗ̱ܘܺܝܬ ܡܶܢ ܢܶܗܡܬܶܗ ܕܠܶܒܝ̱.
9 ܡܳܪܝܳܐ ܩܕܳܡܰܝܟ ܗܺܝ ܟܽܠܳܗ̇ ܪܶܓܰܬܝ̱. ܘܬܶܢ̈ܚܳܬܝ̱ ܡܶܢܳܟ ܠܳܐ ܡܛܰܫ̈ܝܳܢ.
10 ܠܶܒܝ̱ ܐܶܬܗܦܶܟ. ܘܚܰܝܠܝ̱ ܫܰܒܩܰܢܝ̱. ܘܢܽܘܗܪܳܐ ܕܥܰܝ̈ܢܰܝ ܠܳܐ ܗܘܳܐ ܠܘܳܬܝ̱.
11 ܖ̈ܳܚܡܰܝ ܘܚܰܒܖ̈ܰܝ ܠܽܘܩܒܰܠ ܟܺܐܒܝ̱ ܩܳܡܘ. ܘܩܰܖ̈ܺܝܒܰܝ ܒܪܽܘܚܩܳܐ ܩܳܝܡܺܝܢ ܗ̱ܘܰܘ.
12 ܘܰܐܚܕܽܘܢܝ̱ ܐܰܝܠܶܝܢ ܕܒܳܥܶܝܢ ܠܢܰܦܫܝ̱ ܘܨܳܒܶܝܢ ܠܒܺܝܫܬܝ̱. ܘܡܰܠܶܠܘ ܫܽܘܩܪܳܐ ܘܢܶܟܠܳܐ. ܝܰܘܡܳܐ ܟܽܠܶܗ ܪܳܢܶܝܢ ܗ̱ܘܰܘ.
13 ܐܶܢܳܐ ܕܶܝܢ ܐܰܝܟ ܚܰܪܫܳܐ ܠܳܐ ܫܳܡܰܥ ܗ̱ܘܺܝܬ. ܘܰܐܝܟ ܕܽܘܓܳܐ ܠܳܐ ܦܶܬܚܶܬ ܦܽܘܡܝ̱.
14 ܘܰܗܘܺܝܬ ܐܰܝܟ ܓܰܒܪܳܐ ܕܠܳܐ ܫܳܡܰܥ ܘܠܰܝܬ ܡܰܟܣܳܢܽܘܬܳܐ ܒܦܽܘܡܶܗ.
15 ܡܶܛܽܠ ܕܠܳܟ ܣܰܟܺܝܬ ܡܳܪܝܳܐ. ܘܰܥܢܰܝܬܳܢܝ̱ ܡܳܪܝܳܐ ܐܰܠܳܗܝ.
16 ܡܶܛܽܠ ܕܶܐܡܪܶܬ ܕܠܳܐ ܢܶܚܕܽܘܢ ܠܺܝ. ܘܠܳܐ ܢܶܬܬܪܺܝܡܽܘܢ ܥܠܰܝ ܒܙܰܘܥܬܳܐ ܕܖ̈ܶܓܠܰܝ.
17 ܡܶܛܽܠ ܕܶܐܢܳܐ ܠܚܰܫܳܐ ܡܛܰܝܰܒ ܐ̱ܢܳܐ. ܘܟܺܐܒܝ̱ ܠܽܘܩܒܰܠܝ̱ ܗܽܘ ܒܟܽܠܙܒܰܢ.
18 ܡܶܛܽܠ ܕܶܐܚܰܘܶܝܟ ܣܰܟ̈ܠܘܳܬܝ̱. ܘܶܐܬܕܰܟܶܐ ܡܶܢ ܚܛܳܗܰܝ̈.
19 ܒܥܶܠܕ̈ܒܳܒܰܝ ܐܶܬܥܰܫܰܢܘ ܘܰܚܙܰܘ. ܘܰܣܓܺܝܘ ܣܳܢ̈ܰܐܝ ܕܫܽܘܩܪܳܐ.
20 ܦܰܪܥܽܘܢܝ̱ ܒܺܝܫܬܳܐ ܚܠܳܦ ܛܳܒܬܳܐ. ܘܣܰܩܪܽܘܢܝ̱ ܥܰܠ ܕܰܒܥܺܝܬ ܛܳܒܬܳܐ.
21 ܠܳܐ ܬܶܫܒܩܰܢܝ̱ ܡܳܪܝܳܐ ܐܰܠܳܗܝ ܘܠܳܐ ܬܰܪܚܶܩ ܡܶܢܝ̱. ܐܶܠܳܐ ܟܰܬܰܪ ܠܥܽܘܕܪܳܢܝ̱ ܘܰܦܪܽܘܩܰܝܢܝ̱.