Psalms 41
The Book of Psalms
܀ ܡܙܡܘܪܐ ܡܐ ܀
ܐܰܡܺܝܪ ܠܕܰܘܺܝܕ ܥܰܠ ܚܶܙܰܩܝܳܐ. ܘܕܰܐܝܠܶܝܢ ܕܶܐܣܬܥܰܪ ܠܘܳܬܶܗ ܡܶܢ ܖ̈ܳܚܡܰܘܗ̱ܝ ܒܙܰܒܢܳܐ ܕܟܽܘܪܗܳܢܶܗ
1 ܛܽܘܒܰܘܗ̱ܝ ܠܡܰܢ ܕܚܳܐܰܪ ܒܡܶܣܟܺܢܳܐ. ܒܝܰܘܡܳܐ ܕܒܺܝܫܬܳܐ ܢܦܰܠܛܺܝܘܗ̱ܝ ܡܳܪܝܳܐ.
2 ܡܳܪܝܳܐ ܢܢܰܛܪܺܝܘܗ̱ܝ ܘܢܰܚܶܝܘܗ̱ܝ ܘܢܰܛܐܶܒ ܠܶܗ ܒܰܐܪܥܳܐ. ܘܠܳܐ ܢܰܫܠܡܺܝܘܗ̱ܝ ܠܰܒܥܶܠܕ̈ܒܳܒܰܘܗ̱ܝ.
3 ܡܳܪܝܳܐ ܢܣܰܡܟܺܝܘܗ̱ܝ ܥܰܠ ܥܰܪܣܳܐ ܕܟܺܐܒܰܘ̈ܗܝ̱. ܘܟܽܠܶܗ ܡܰܫܟܒܶܗ ܗܦܰܟ ܒܟܽܘܪܗܳܢܶܗ.
4 ܐܶܢܳܐ ܐܶܡܪܶܬ ܕܰܐܢ̱ܬ ܗܽܘ ܡܳܪܝ̱ ܪܰܚܶܡܥܠܰܝ. ܘܰܐܣܳܗ̇ ܠܢܰܦܫܝ̱ ܡܶܛܽܠ ܕܰܚܛܺܝܬ ܠܳܟ.
5 ܒܥܶܠܕ̈ܒܳܒܰܝ ܐܶܡܰܪܘ ܥܠܰܝ ܒܺܝܫܬܳܐ. ܐܶܡܰܬܝ̱ ܕܶܝܢ ܡܺܝܬ ܘܶܐܒܰܕ ܫܡܶܗ.
6 ܘܐܶܡܰܬܝ ܕܳܐܬܶܝܢ ܗ̱ܘܰܘ ܠܡܶܚܙܝܰܢܝ̱ ܕܰܓܳܠܽܘܬܳܐ ܡܡܰܠܠܺܝܢ ܗ̱ܘܰܘ. ܘܰܒܠܶܒܗܽܘܢ ܚܳܫܠܺܝܢ ܗ̱ܘܰܘ ܒܺܝܫܬܳܐ. ܢܳܦܩܺܝܢ ܗ̱ܘܰܘ ܠܫܽܘܩܳܐ ܘܰܡܡܰܠܠܺܝܢ.
7 ܘܶܐܬܠܰܚܰܫܘ ܥܠܰܝ ܐܰܟܚܕܳܐ ܟܽܠܗܽܘܢ ܣܳܢ̈ܰܐܝ. ܘܶܐܬܚܰܫܰܒܘ ܥܠܰܝ ܒܺܝܫܬܳܐ.
8 ܒܡܶܠܬܳܐ ܕܥܰܘܠܳܐ ܪܳܢܶܝܢ ܗ̱ܘܰܘ. ܡܶܟܺܝܠ ܕܰܫܟܶܒ ܠܳܐ ܡܰܘܣܶܦ ܠܰܡܩܳܡ.
9 ܐܳܦ ܓܰܒܪܳܐ ܫܳܐܶܠ ܫܠܳܡܝ̱ ܕܰܬܟܺܝܠ ܐ̱ܢܳܐ ܥܠܰܘܗ̱ܝ ܐܳܟܶܠ ܠܰܚܡܝ̱ ܕܰܬܟܺܝܠ ܐ̱ܢܳܐ ܥܠܰܘܗ̱ܝ ܣܰܓܺܝ ܐܶܬܢܟܶܠ ܥܠܰܝ.
10 ܘܰܐܢ̱ܬ ܡܳܪܝܳܐ ܪܰܚܶܡ ܥܠܰܝ. ܘܰܐܩܺܝܡܰܝܢܝ̱ ܘܶܐܦܪܽܘܥ ܐܶܢܽܘܢ.
11 ܒܗܳܕܶܐ ܝܶܕܥܶܬ ܕܨܳܒܶܐ ܐܰܢ̱ܬ ܒܺܝ. ܡܶܛܽܠ ܕܠܳܐ ܡܰܒܐܶܫ ܠܺܝ ܒܥܶܠܕܒܳܒܝ̱.
12 ܠܺܝ ܕܶܝܢ ܒܬܰܡܺܝܡܽܘܬܝ̱ ܣܰܡܶܟܬܳܢܝ̱ ܘܰܐܩܺܝܡܬܳܢܝ̱ ܩܕܳܡܰܝܟ ܠܥܳܠܰܡ.
13 ܒܪܺܝܟ ܗܽܘ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܐܰܡܺܝܢ ܘܰܐܡܺܝܢ.