Psalms 78
The Book of Psalms
܀ ܡܙܡܘܪܐ ܥܚ ܀
ܡܰܪܬܝܳܢܽܘܬܳܐ ܕܰܠܘܳܬ ܥܰܡܳܐ ܟܰܕ ܡܰܠܶܦ ܠܗܽܘܢ ܠܡܶܛܰܪ ܢܳܡܽܘܣܳܐ ܘܡܰܥܶܗ̱ܗ ܠܗܽܘܢ ܐܰܝܠܝܢ ܛܰܝ̈ܒܘܳܬܳܐ ܐܶܣܬܥܰܪ ܡܶܢ ܐܰܠܳܗܳܐ ܠܘܳܬ ܓܶܢܣܗܽܘܢ
1 ܥܰܡܝ̱ ܨܽܘܬܘ ܢܳܡܽܘܣܝ̱ ܘܶܐܬܛܦܺܝܣܘ̱. ܘܰܨܠܰܘ ܐܶܕܢܰܝ̈ܟܽܘܢ ܠܡܶܠܰܘ̈ܗܝ̱ ܕܦܽܘܡܝ̱.
2 ܗܳܐ ܓܶܝܪ ܐܶܦܬܰܚ ܦܽܘܡܝ̱ ܒܡ̈ܰܬܠܶܐ. ܘܺܐܡܰܪ ܦ̈ܶܠܳܐܬܳܐ ܕܡܶܢ ܩܕܺܝܡ.
3 ܐܰܝܠܶܝܢ ܕܰܫܡܰܥܢ ܝܺܕܰܥܢ ܐܶܢܶܝܢ. ܐܳܦ ܐܰܝܠܶܝܢ ܕܰܐܒܳܗܰܝ̈ܢ ܐܶܫܬܰܥܺܝܘ ܠܰܢ.
4 ܕܠܳܐ ܢܟܰܣܶܐ ܡܶܢ ܒܢܰܝ̈ܗܽܘܢ. ܐܶܠܳܐ ܠܕܳܪܳܐ ܐ̱ܚܪܺܢܳܐ ܢܶܫܬܰܥܶܐ ܬܶܫܒ̈ܚܳܬܶܗ ܕܡܳܪܝܳܐ ܘܚܰܝܠܶܗ ܘܬܶܕܡܖ̈ܳܬܶܗ ܕܰܥܒܰܕ.
5 ܕܰܐܩܺܝܡ ܣܳܗܕܽܘܬܶܗ ܒܝܰܥܩܽܘܒ. ܘܢܳܡܽܘܣܶܗ ܣܳܡ ܒܺܝܣܪܳܐܶܝܠ. ܐܰܝܟ ܕܦܰܩܶܕ ܠܰܐܒܳܗܰܝ̈ܢ.
6 ܕܢܰܘܕܥܽܘܢ ܠܰܒܢܰܝ̈ܗܽܘܢ. ܕܢܶܕܥܽܘܢ ܠܕܳܪܳܐ ܐ̱ܚܪܺܢܺܐ. ܒܢܰܝ̈ܳܐ ܕܡܶܬܝܰܠܕܺܝܢ ܘܩܳܝܡܺܝܢ. ܕܢܶܫܬܰܥܽܘܢ ܠܰܒܢܰܝ̈ܗܽܘܢ.
7 ܕܢܶܗܘܶܐ ܣܰܒܪܗܽܘܢ ܒܰܐܠܳܗܳܐ. ܘܠܳܐ ܢܶܛܥܽܘܢ ܥܒܳܕܰܘ̈ܗܝ̱ ܕܰܐܠܳܗܳܐ. ܘܦܽܘܩܕܳܢܰܘ̈ܗܝ̱ ܢܶܛܪܽܘܢ.
8 ܘܠܳܐ ܢܶܗܘܽܘܢ ܐܰܝܟ ܐܰܒܳܗܰܝ̈ܗܽܘܢ. ܕܳܪܳܐ ܒܺܝܫܳܐ ܘܰܡܡܰܪܡܪܳܢܳܐ. ܕܳܪܳܐ ܕܠܳܐ ܐܰܬܩܶܢ ܠܶܒܶܗ. ܘܠܳܐ ܗܰܝܡܶܢ ܒܰܐܠܳܗܳܐ ܕܪܽܘܚܶܗ.
9 ܒܢܰܘ̈ܗܝ̱ ܕܰܐܦܪܶܝܡ ܕܰܡܬܰܚܘ̱ ܝܰܬܪܳܐ ܘܰܫܕܰܘ ܒܩܶܫܬܳܐ ܘܰܗܦܰܟܘ̱ ܒܝܰܘܡܳܐ ܕܰܩܪܳܒܳܐ.
10 ܥܰܠ ܕܠܳܐ ܢܛܰܪܘ ܩܝܳܡܶܗ ܕܰܐܠܳܗܳܐ. ܘܰܒܢܳܡܽܘܣܶܗ ܠܳܐ ܨܒܰܘ ܠܰܡܗܰܠܳܟܽܘ.
11 ܘܰܛܥܰܘ ܥܒܳܕܰܘ̈ܗܝ ܘܬܶܕܡܖ̈ܳܬܶܗ. ܕܚܰܘܺܝ ܐܶܢܽܘܢ ܩܕܳܡ ܐܰܒܳܗܰܝ̈ܗܽܘܢ.
12 ܕܰܥܒܰܕ ܬܶܕܡܖ̈ܳܬܳܐ ܒܰܐܪܥܳܐ ܕܡܶܨܪܶܝܢ ܘܰܒܚܰܩ̈ܠܳܬܳܐ ܕܨܳܥܳܢ.
13 ܬܪܰܥ ܝܰܡܳܐ ܘܰܐܥܒܰܪ ܐܶܢܽܘܢ. ܘܰܐܩܺܝܡ ܡܰܝ̈ܳܐ ܐܰܝܟ ܕܰܒܙܶܩ̈ܶܐ.
14 ܕܰܒܰܪ ܐܶܢܽܘܢ ܒܺܐܝܡܳܡܳܐ ܒܰܥܢܳܢܳܐ ܘܟܽܠܶܗ ܠܺܠܝܳܐ ܒܙܰܗܪܳܐ ܕܢܽܘܪܳܐ.
15 ܬܪܰܥ ܛܰܪܳܢܳܐ ܒܡܰܕܒܪܳܐ. ܘܰܐܫܩܺܝ ܐܶܢܽܘܢ ܐܰܝܟ ܕܡܶܢ ܬܗܽܘܡܳܐ ܪܰܒܳܐ.
16 ܐܰܦܶܩ ܖ̈ܳܕܰܝܳܐ ܡܶܢ ܟܺܐܦܳܐ. ܘܰܪܕܰܘ ܡܰܝ̈ܳܐ ܐܰܝܟ ܢܰܗܖ̈ܰܘܳܬܳܐ.
17 ܘܰܐܘܣܶܦܘ ܬܽܘܒ ܥܰܡܳܐ ܠܡܶܚܛܳܐ. ܘܠܰܡܡܰܪܡܳܪܽܘ ܠܰܡܪܰܝܡܳܐ ܒܨܶܗܝܳܐ.
18 ܘܢܰܣܺܝܘ ܠܰܐܠܳܗܳܐ ܒܠܶܒܗܽܘܢ ܠܡܶܫܐܰܠ ܡܶܐܟܽܘܠܬܳܐ ܠܢܰܦܫܗܽܘܢ.
19 ܘܰܪܛܶܢܘ ܥܰܠ ܐܰܠܳܗܳܐ ܘܶܐܡܰܪܘ. ܕܰܠܡܳܐ ܡܶܫܟܰܚ ܐܰܠܳܗܳܐ ܠܡܶܣܕܰܪ ܠܰܢ ܦܳܬܽܘܖ̈ܶܐ ܒܡܰܕܒܪܳܐ.
20 ܐܶܢ ܡܚܳܐ ܠܛܰܪܳܢܳܐ ܘܰܪܕܰܘ ܡܰܝ̈ܳܐ ܘܖ̈ܶܓܠܳܬܳܐ ܐܰܪܕܺܝ. ܕܰܠܡܳܐ ܐܳܦ ܠܰܚܡܳܐ ܡܶܫܟܰܚ ܠܡܶܬܰܠ ܠܰܢ. ܐܰܘ ܡܛܰܝܶܒ ܡܶܐܟܽܘܠܬܳܐ ܠܥܰܡܶܗ.
21 ܡܶܛܽܠ ܗܳܢܳܐ ܫܡܰܥ ܡܳܪܝܳܐ ܘܰܪܓܶܙ. ܘܢܽܘܪܳܐ ܐܶܚܕܰܬ ܒܝܰܥܩܽܘܒ. ܐܳܦ ܪܽܘܓܙܳܐ ܣܠܶܩ ܒܺܝܣܪܳܐܶܝܠ.
22 ܥܰܠ ܕܠܳܐ ܗܰܝܡܶܢܘ ܒܰܐܠܳܗܳܐ. ܘܠܳܐ ܣܰܒܰܪܘ ܠܦܽܘܪܩܳܢܶܗ. ܘܰܦܩܰܕ ܠܰܥܢܳܢ̈ܶܐ ܡܶܢ ܠܥܶܠ. ܘܬܰܖ̈ܥܶܐ ܕܰܫܡܰܝܳܐ ܐܶܬܦܬܰܚܘ̱.
23 ܐܰܚܶܬ ܠܗܽܘܢ ܡܰܢܢܳܐ ܠܡܶܐܟܰܠ. ܘܠܰܚܡܳܐ ܕܰܫܡܰܝܳܐ ܝܰܗܒ ܠܗܽܘܢ.
24 ܠܰܚܡܳܐ ܕܡܰܠܰܐܟ̈ܶܐ ܐܶܟܰܠ ܒܰܪܢܳܫܳܐ. ܘܨܰܝܕܳܐ ܫܰܕܰܪ ܠܗܽܘܢ ܠܡܶܣܒܰܥ.
25 ܐܰܫܶܒ ܖ̈ܽܘܚܶܐ ܒܰܫܡܰܝܳܐ. ܘܰܕܒܰܪ ܒܥܽܘܫܢܶܗ ܠܬܰܝܡܢܳܐ.
26 ܐܰܚܶܬ ܠܗܽܘܢ ܒܶܣܪܳܐ ܐܰܝܟ ܥܰܦܪܳܐ. ܘܰܐܝܟ ܚܳܠܳܐ ܕܝܰܡ̈ܡܶܐ ܦܳܪܰܚܬܳܐ ܕܓܶܦܳܐ.
27 ܘܰܢܦܰܠܝ̈ ܒܡܰܫܖ̈ܝܳܬܗܽܘܢ ܚܕܳܖ̈ܰܝ ܡܰܫܟܢܰܝ̈ܗܽܘܢ.
28 ܘܶܐܟܰܠܘ ܘܰܣܒܰܥܘ ܛܳܒ. ܘܰܖ̈ܓܺܝܓܳܬܗܽܘܢ ܝܰܗܒ ܠܗܽܘܢ.
29 ܘܠܳܐ ܦܪܰܩܘ ܡܶܢ ܖ̈ܓܺܝܓܳܬܗܽܘܢ. ܘܥܰܕ ܡܶܐܟܽܘܠܬܗܽܘܢ ܒܦܽܘܡܗܽܘܢ.
30 ܪܽܘܓܙܶܗ ܕܰܐܠܳܗܳܐ ܣܠܶܩ ܒܗܽܘܢ. ܘܰܩܛܰܠ ܡܶܢ ܥܰܬܺܝܖ̈ܰܝܗܽܘܢ. ܘܠܰܓ̈ܒܰܝܳܐ ܕܺܝܣܪܳܐܶܝܠ ܐܰܒܪܶܟ.
31 ܒܗܳܠܶܝܢ ܟܽܠܗܶܝܢ ܚܛܰܘ. ܘܬܽܘܒ ܠܳܐ ܗܰܝܡܶܢܘ ܒܬܶܕܡܖ̈ܳܬܶܗ.
32 ܓܰܡܰܪܘ ܒܰܣܪܺܝܩܽܘܬܳܐ ܝܰܘܡܰܝ̈ܗܽܘܢ. ܘܰܫܢܰܝ̈ܗܽܘܢ ܡܣܰܪܗܒܳܐܺܝܬ.
33 ܡܳܐ ܕܩܳܛܶܠ ܗ̱ܘܳܐ ܠܗܽܘܢ ܒܳܥܶܝܢ ܗ̱ܘܰܘ ܠܶܗ. ܘܗܳܦܟܺܝܢ ܗ̱ܘܰܘ ܘܰܡܩܰܕܡܺܝܢ ܠܘܳܬܶܗ.
34 ܥܶܗܰܕܘ ܕܰܐܠܳܗܳܐ ܗܽܘ ܥܳܕܽܘܪܗܽܘܢ. ܘܰܐܠܳܗܳܐ ܡܪܰܝܡܳܐ ܦܳܪܽܘܩܗܽܘܢ.
35 ܪܰܚܡܽܘܗ̱ܝ ܒܦܽܘܡܗܽܘܢ. ܘܰܒܠܶܫܳܢܗܽܘܢ ܟܰܕܶܒܘ ܒܶܗ.
36 ܠܶܒܗܽܘܢ ܠܳܐ ܐܰܬܩܶܢܘ ܥܰܡܶܗ. ܘܠܳܐ ܗܰܝܡܶܢܘ ܒܰܩܝܳܡܶܗ.
37 ܘܗܽܘ ܡܪܰܚܡܳܢ ܘܫܳܒܶܩ ܚܛܳܗ̈ܶܐ ܘܠܳܐ ܡܚܰܒܶܠ. ܡܰܣܓܶܐ ܠܡܰܗܦܳܟܽܘ ܪܽܘܓܙܶܗ ܘܠܳܐ ܡܥܺܝܪ ܟܽܠܳܗ̇ ܚܶܡܬܶܗ.
38 ܘܶܐܬܕܟܰܪ ܕܒܶܣܪܳܐ ܐܶܢܽܘܢ. ܪܽܘܚܳܐ ܕܳܐܙܳܠܐ ܘܠܳܐ ܗܳܦܟܳܐ.
39 ܗܶܢܽܘܢ ܡܰܪܡܪܽܘܗ̱ܝ ܒܡܰܕܒܪܳܐ. ܘܰܐܪܓܙܽܘܗ̱ܝ ܒܰܐܫܺܝܡܽܘܢ.
40 ܘܰܗܦܰܟܘ̱ ܘܢܰܣܺܝܘ ܠܰܐܠܳܗܳܐ. ܘܰܠܩܰܕܺܝܫܳܐ ܕܺܝܣܪܳܐܶܝܠ ܓܰܪܶܓܘ.
41 ܘܠܳܐ ܐܶܬܕܟܰܪܘ ܐܺܝܕܶܗ ܝܰܘܡܳܐ ܕܰܦܪܰܩ ܐܶܢܽܘܢ ܡܶܢ ܐܰܠܽܘܨܳܐ.
42 ܕܰܥܒܰܕ ܒܡܶܨܪܶܝܢ ܐܳܬܘ̈ܳܬܶܗ. ܘܬܶܕܡܖ̈ܳܬܶܗ ܒܚܰܩ̈ܠܳܬܳܐ ܕܨܳܥܳܢ.
43 ܕܰܗܦܰܟ ܢܰܗܖ̈ܰܘܳܬܗܽܘܢ ܠܰܕܡܳܐ ܘܖ̈ܳܕܰܝܗܽܘܢ ܕܠܳܐ ܢܶܫܬܽܘܢ ܡܰܝ̈ܳܐ.
44 ܫܰܕܰܪ ܥܠܰܝܗܽܘܢ ܚܰܠܽܘܛܳܐ ܘܶܐܟܰܠ ܐܶܢܽܘܢ. ܐܘܖ̈ܕܥܶܐ ܘܚܰܒܶܠ̈ܝ ܐܶܢܽܘܢ.
45 ܝܰܗܒ ܠܩܰܡܨܳܐ ܥܰܠ̈ܠܳܬܗܽܘܢ ܘܠܶܐܘܰܬܗܽܘܢ ܠܙܳܚܠܳܐ.
46 ܬܰܒܰܪ ܒܒܰܪܕܳܐ ܓܽܘܦܢܰܝ̈ܗܽܘܢ. ܘܬܺܐܢܰܝ̈ܗܽܘܢ ܒܰܓܠܺܝܕܳܐ.
47 ܐܰܫܠܶܡ ܠܒܰܪܕܳܐ ܒܥܺܝܪܗܽܘܢ. ܘܩܶܢܝܳܢܗܽܘܢ ܠܝܰܩܕܳܢܳܐ.
48 ܫܰܕܰܪ ܥܠܰܝܗܽܘܢ ܚܶܡܬܳܐ ܕܪܽܘܓܙܶܗ. ܚܶܡܬܳܐ ܘܪܽܘܓܙܳܐ ܐܘܠܨܳܢܳܐ. ܫܰܕܰܪ ܒܝܰܕ ܡܰܠܰܐܟܳܐ ܒܺܝܫܳܐ.
49 ܘܰܬܪܰܥ ܫܒܺܝ̈ܠܶܐ ܒܺܝ̈ܫܶܐ. ܘܠܳܐ ܚܣܰܟ ܡܶܢ ܡܰܘܬܳܐ ܢܰܦ̈ܫܳܬܗܽܘܢ. ܘܚܰܝ̈ܘܳܬܗܽܘܢ ܠܡܰܘܬܳܐ ܐܰܫܠܶܡ.
50 ܩܰܛܶܠ ܟܽܠ ܒܽܘܟܖ̈ܶܐ ܕܡܶܨܪܶܝܢ. ܪܺܝܫ ܟܽܠܶܗ ܝܰܠܕܗܽܘܢ ܒܡܰܫܟܢܳܐ ܕܚܳܡ.
51 ܐܰܫܩܶܠ ܠܥܰܡܶܗ ܐܰܝܟ ܥܳܢ̈ܳܐ. ܘܕܰܒܰܪ ܐܶܢܽܘܢ ܐܰܝܟ ܓܙܳܪܳܐ ܒܡܰܕܒܪܳܐ.
52 ܐܰܫܪܺܝ ܐܶܢܽܘܢ ܒܣܰܒܪܳܐ ܘܠܳܐ ܕܚܶܠܘ. ܘܠܰܒܥܶܠܕ̈ܒܳܒܰܝܗܽܘܢ ܟܰܣܺܝ ܝܰܡܳܐ.
53 ܐܰܝܬܺܝ ܐܶܢܽܘܢ ܠܰܬܚܽܘܡܳܐ ܕܩܽܘܕܫܶܗ. ܠܗܳܢܳܐ ܛܽܘܪܳܐ ܕܰܩܢܳܬ ܝܰܡܺܝܢܶܗ.
54 ܐܰܘܒܶܕ ܡܶܢ ܩܕܳܡܰܝܗܽܘܢ ܥܰܡ̈ܡܶܐ. ܘܰܐܪܡܺܝ ܐܶܢܽܘܢ ܒܚܰܒܠܳܐ ܕܝܳܪܬܽܘܬܶܗ. ܘܰܫܪܰܘ ܒܡܰܫܟ̈ܢܰܝܗܽܘܢ ܫܰܒ̈ܛܶܐ ܕܺܝܣܪܳܐܶܝܠ.
55 ܢܰܣܺܝܘ ܘܡܰܪܡܰܪܘ ܠܰܐܠܳܗܳܐ ܡܪܰܝܡܳܐ. ܘܣܳܗܕ̈ܘܳܬܶܗ ܠܳܐ ܢܛܰܪܘ.
56 ܘܰܗܦܰܟܘ ܘܕܰܓܶܠܘ ܐܰܝܟ ܐܰܒܳܗܰܝ̈ܗܽܘܢ. ܘܶܐܬܗܦܶܟܘ ܐܰܝܟ ܩܶܫܬܳܐ ܢܟܺܝܠܬܳܐ.
57 ܘܰܐܪܓܙܽܘܗ̱ܝ ܒܰܥܠܰܘ̈ܳܬܗܽܘܢ. ܘܒܰܦܬܰܟܖ̈ܰܝܗܽܘܢ ܐܰܛܢܽܘܗ̱ܝ.
58 ܘܰܫܡܰܥ ܐܰܠܳܗܳܐ ܘܶܐܬܚܰܡܰܬ. ܘܰܪܓܶܙ ܛܳܒ ܥܰܠ ܝܺܣܪܳܐܶܝܠ.
59 ܘܰܛܥܳܐ ܠܡܰܫܟܢܳܐ ܕܫܺܝܠܽܘ. ܡܰܫܟܢܳܐ ܕܰܫܪܳܐ ܒܶܝܬ ܒܢܰܝ̈ܢܳܫܳܐ.
60 ܝܰܗܒ ܠܰܫܒܺܝܬܳܐ ܥܰܡܶܗ ܘܬܶܫܒܽܘܚܬܶܗ ܒܺܐܝܕܳܐ ܕܳܐܠܽܘܨܳܐ.
61 ܐܰܫܠܶܡ ܥܰܡܶܗ ܠܚܰܪܒܳܐ. ܘܰܐܗܡܺܝ ܡܶܢ ܝܳܪܬܽܘܬܶܗ.
62 ܠܓܰܕܽܘܕܰܝ̈ܗܽܘܢ ܐܶܟܠܰܬ ܢܽܘܪܳܐ. ܘܰܒܬܽܘ̈ܠܳܬܗܽܘܢ ܐܶܬܛܰܖ̈ܰܦܝ̱.
63 ܘܟܳܗܢܰܝ̈ܗܽܘܢ ܢܦܰܠܘ̱ ܒܚܰܪܒܳܐ. ܘܰܐܖ̈ܡܠܳܬܗܽܘܢ ܠܳܐ ܐܶܬܒܰܟܺܝ̱̈.
64 ܐܶܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ.
65 ܡܚܳܐ ܠܰܒܥܶܠܕ̈ܒܳܒܰܘܗ̱ܝ ܠܒܶܣܬܪܶܗ. ܘܚܶܣܕܳܐ ܕܥܳܠܡܳܐ ܝܰܗܒ ܠܗܽܘܢ.
66 ܐܰܣܠܺܝ ܠܡܰܫܟܢܳܐ ܕܝܰܘܣܶܦ. ܘܰܒܫܰܒܛܳܐ ܕܰܐܦܪܶܝܡ ܠܳܐ ܐܶܬܪܰܥܺܝ.
67 ܓܒܳܐ ܠܫܰܪܒܬܳܐ ܕܺܝܗܽܘܕܳܐ. ܠܛܽܘܪܳܐ ܕܨܶܗܝܽܘܢ ܕܰܪܚܶܡ.
68 ܒܢܳܐ ܥܰܠ ܪܰܘܡܳܐ ܡܰܩܕܫܶܗ. ܘܒܰܐܪܥܳܐ ܐܰܬܩܢܶܗ ܠܥܳܠܰܡ.
69 ܘܰܓܒܳܐ ܠܕܰܘܺܝܕ ܥܰܒܕܶܗ. ܘܕܰܒܪܶܗ ܡܶܢ ܓܙܳܪܳܐ ܕܥܳܢ̈ܳܐ.
70 ܘܡܶܢ ܒܶܣܬܰܪ ܥܳܢ̈ܳܐ ܕܡܰܝܢܩܳܐ. ܠܡܶܪܥܳܐ ܠܝܰܥܩܽܘܒ ܥܰܡܶܗ ܘܠܺܝܣܪܳܐܶܝܠ ܝܳܪܬܽܘܬܶܗ.
71 ܘܰܪܥܳܐ ܐܶܢܽܘܢ ܒܬܰܡܺܝܡܽܘܬܳܐ ܕܠܶܒܶܗ. ܘܰܒܣܽܘܟܳܠܳܐ ܕܺܐܝܕܰܘ̈ܗܝ̱ ܕܰܒܰܪ ܐܶܢܽܘܢ.