Psalms 17
The Book of Psalms
܀ ܡܙܡܘܪܐ ܝܙ ܀
ܨܠܽܘܬܶܗ ܕܕܰܘܺܝܕ ܟܰܕ ܐܶܬܪܕܶܦ ܡܶܢ ܫܳܐܳܘܠ
1 ܫܡܰܥ ܡܳܪܝܳܐ ܩܰܕܺܝܫܳܐ ܘܚܽܘܪ ܒܒܳܥܽܘܬܝ̱. ܘܨܽܘܬ ܨܠܽܘܬܝ̱ ܕܠܳܐ ܡܶܢ ܣܶܦ̈ܘܳܬܳܐ ܢܰܟܽܘܠܬܳܢ̈ܝܳܬܳܐ.
2 ܡܶܢ ܩܕܳܡܰܝܟ ܕܺܝܢܝ̱ ܢܶܦܽܘܩ. ܘܥܰܝܢܰܝ̈ܟ ܢܶܚ̈ܙܝܳܢ ܬܪܺܝܨܽܘܬܳܐ.
3 ܒܚܰܪܬ ܠܶܒܝ̱ ܘܰܣܥܰܪܬܳܢܝ̱ ܒܠܺܠܝܳܐ. ܘܰܒܩܰܝܬܳܢܝ̱ ܘܠܳܐ ܐܶܫܟܰܚܬ ܒܺܝ ܥܰܘܠܳܐ. ܘܠܳܐ ܥܒܰܪܘ ܥܰܠ ܦܽܘܡܝ̱ ܥܒ̈ܳܕܶܐ ܕܰܒܢܰܝ̈ܢܳܫܳܐ.
4 ܒܡܰܡܠܠܳܐ ܕܣܶܦ̈ܘܳܬܳܐ. ܐܶܠܳܐ ܢܛܰܪܬܳܢܝ̱ ܡܶܢ ܐܽܘܖ̈ܚܳܬܳܐ ܒܺܝ̈ܫܳܬܳܐ.
5 ܣܰܡܶܟܬ ܗܶܠܟ̈ܳܬܝ̱ ܒܰܫܒܺܝ̈ܠܰܝܟ ܕܠܳܐ ܢܙܽܘ̈ܥܳܢ ܦܣ̈ܳܥܳܬܝ̱.
6 ܐܶܢܳܐ ܩܪܺܝܬܳܟ ܡܶܛܽܠ ܕܰܥܢܰܝܬܳܢܝ̱. ܐܰܠܳܗܳܐ ܨܠܺܝ ܐܶܕܢܳܟ ܠܘܳܬܝ̱ ܘܰܫܡܰܥ ܡܶܠܰܝ̈.
7 ܘܰܥܒܶܕܳܝܗܝ̱ ܬܶܕܡܽܘܪܬܳܐ ܠܚܰܣܝܳܟ. ܘܦܳܪܽܘܩܳܐ ܠܰܐܝܠܶܝܢ ܕܰܡܣܰܒܪܺܝܢ. ܡܶܢ ܐܰܝܠܶܝܢ ܕܩܳܝܡܺܝܢ ܠܽܘܩܒܰܠ ܝܰܡܺܝܢܳܟ.
8 ܢܰܛܰܪܰܝܢܝ̱ ܐܰܝܟ ܒܳܒܬܳܐ ܕܥܰܝܢܳܐ. ܘܰܒܛܶܠܳܠܳܐ ܕܟܶܢ̈ܦܰܝܟ ܣܰܬܰܪܰܝܢܝ̱.
9 ܡܶܢ ܩܕܳܡ ܚܰܛܳܝ̈ܶܐ ܗܳܠܶܝܢ ܕܒܰܙܽܘܢܝ̱. ܘܰܒܥܶܠܕ̈ܒܳܒܶܝܗ̇ ܕܢܰܦܫܝ̱ ܕܣܳܡܘ ܥܠܰܝ.
10 ܣܟܽܘܪ ܦܽܘܡܗܽܘܢ ܕܡܰܠܶܠܘ̱ ܫܰܒܰܗܪܳܢܽܘܬܳܐ.
11 ܫܰܒܚܽܘܢܝ̱ ܘܗܳܫܳܐ ܟܰܪܟܽܘܢܝ̱. ܣܳܡܘ ܥܰܝܢܰܝ̈ܗܽܘܢ ܕܢܰܪܡܽܘܢܳܢܝ̱ ܒܰܐܪܥܳܐ.
12 ܕܳܡܶܝܢ ܠܰܐܪܝܳܐ ܕܒܳܥܶܐ ܠܡܶܬܒܰܪ. ܘܰܐܝܟ ܓܽܘܪܝܳܐ ܕܰܐܪܝܳܐ ܕܝܳܬܶܒ ܒܛܽܘܫܝܳܐ.
13 ܩܽܘܡ ܡܳܪܝܳܐ ܩܕܳܡ ܐܰܦܰܝ̈ܗܽܘܢ ܘܰܐܒܪܶܟ ܐܶܢܽܘܢ. ܘܦܰܨܳܗ̇ ܠܢܰܦܫܝ̱ ܡܶܢ ܖ̈ܰܫܺܝܥܶܐ ܘܡܶܢ ܚܰܪܒܳܐ.
14 ܘܡܶܢ ܡܺܝ̈ܬܶܐ ܕܡܳܝܬܺܝܢ ܡܶܢ ܐܺܝܕܰܝ̈ܟ ܡܳܪܝܳܐ. ܘܡܶܢ ܡܺܝ̈ܬܶܐ ܕܚܶܦܪܳܐ. ܬܦܰܠܶܓ ܐܶܢܽܘܢ ܒܚܰܝ̈ܶܐ. ܘܣܺܝ̈ܡܳܬܳܟ ܡܠܺܝ ܟܰܪܣܗܽܘܢ. ܢܶܣܒܥܽܘܢ ܒܢܰܝ̈ܳܐ ܘܢܶܫܒܩܽܘܢ ܫܰܪܟܳܐ ܠܰܒܢܰܝ̈ܗܽܘܢ.
15 ܐܶܢܳܐ ܕܶܝܢ ܒܙܰܕܺܝܩܽܘܬܳܐ ܐܶܚܙܶܐ ܐܰܦܰܝ̈ܟ. ܘܶܐܣܒܰܥ ܡܳܐ ܕܶܐܬܬܥܺܝܪܰܬ ܗܰܝܡܳܢܽܘܬܳܟ.